VOV4.Sêdang -   Pơla hdrối kố nah, a tơring MDrak, kong pơlê Dak Lak hiăng ai tơdroăng loăng kân tung kong tơđôu, kơtong pro kơtê troăng kơxái on tơhrik 220KV, mê tâi tâng tơring MDrak ƀă tơring Ea Kar khoh ôh tá ai on tơhrik. Tiô kơvâ ngăn ‘na on tơhrik ăm ‘nâi, ai lối 750 km troăng kơxái trung thế ki hnhâng tơkâ luâ kơpong kong ki pêt, tung rơnó mêi khía mơhot, mê loăng kô tơ’lêi tơđôu, kơtong pro kơtê troăng kơxái on tơhrik. Kơvâ ngăn ‘na on tơhrik pói rơhêng vâ rêm ngế pêt kong kal athế hbrâ rơnáu, tơrŭm cheăng krá tơniăn tâ vâ rak vế tơniăn troăng kơxái on tơhrik, pôi tá ai tơdroăng ki pro hlâ troh kuăn pơlê ƀă mâu tơmeăm khoăng kuăn pơlê.

Tơdế khế 9, rơpŏng ngoh Vương Đình Hòan, a thôn 7, cheăm Čư̆ San, tơkŭm kếo dêi lối 4 ha keo lai. Ngoh ăm ‘nâi, xua kong loăng keo ai troăng kơxái on tơhrik hnhâng tơkâ luâ, mê hdrối vâ ko loăng, rơpŏng ngoh athế tơbleăng ăm kăn ƀô̆ on tơhrik troh hnê mơhno ko loăng rak tơniăn.

“A chiâk mê tâi tâng bu to loăng keo xo. Apoăng pêt xuân a chê ƀă troăng kơxái. Mê kơ’nâi kố tâng tối tơbleăng tung lâp lu peăng pá on tơhrik mê ngin xuân hbrâ kơchăng ko loăng po rơdâ a kĭng troăng vâ tơniăn on tơhrik vâ rak tơniăn châ chăn ăm dêi rơpŏng hngêi”.

Tiô pôa Thào Seo Lử, kăn pơkuâ thôn 7, cheăm Čư̆ San, a kơpong hngế hngo ki kơtăn ing tíu xiâm tơring lối 50 km, châ xúa on tơhrik tơnêi têa cho tơdroăng ki phiu ro kân ƀă vâi krâ nhŏng o. Xua mê, tơdroăng ki rak tơniăn ăm troăng kơxái on tơhrik tơkâ luâ xuân cho hnoăng cheăng dêi mâu kuăn pơlê.

Rêm ha loăng keo châ xo liăn sap ing 60 – 80 rơtuh, cho liăn ngân ki xiâm dêi kuăn pơlê Čư̆ San, M’Drak

“Sap ing hơnăm 2007 châ toi kơxái on tơhrik krâ ‘măn trăm a kố mê kuăn pơlê phiu ro, mơnê Đảng, Tơnêi têa ƀă peăng on tơhrik. Tơdroăng rêh ối cheăng kâ ngin a kố ki hên cho pêt loăng keo. Mot a rơnó mê khía mơhot mê á xuân hnê tối đi đo ăm vâi krâ nhŏng o pôi tá lôi mâu loăng gá tro kơtong tơđôu a troăng kơxái on tơhrik ah gá tơdjâk troh ivá châ chăn vâi krâ nhŏng o”.

Tâi tâng cheăm Čư̆ San ai 4.800 rơpŏng, ki hên cho hdroâng kuăn ngo Mông ƀă Dao sap ing kong pơlê peăng kơnhŏng mot rêh ối a kố. Pôa Phạm Đăng Đảng, kăn hnê ngăn Vi ƀan cheăm Čư̆ San ăm ‘nâi, tơnêi rơdâ la ngo ngối rơnâk rơnhu ôh tá lĕm mê tơdroăng cheăng kâ sap ing kong pêt kong cho ki xiâm, tơtro ƀă tơdroăng pêi pêt kế tơmeăm dêi kuăn pơlê hdroâng kuăn ngo. Pêt kong loăng keo ôh tá mâ rak ngăn, bu athế ‘no liăn roê hdrê apoăng xo. Klêi kơ’nâi 4 – 5 hơnăm, rêm ha loăng keo châ xo 60 – 80 rơtuh liăn. Xua mê, drêng pêt loăng keo, vâi krâ nhŏng o đi đo xúa mâu ƀăng tơnêi ki hiăng ai hlâu, thăm nếo pêt loăng a kĭng troăng on tơhrik cao áp.

“Tung pơla hdrối kố nah mê kơvâ on tơhrik ƀă cheăm hiăng tơrŭm lĕm tro tung hnê tối mơhnhôk vâi krâ nhŏng o, laga xuân ối ai mâu kơpong mê tá hâi pêi pro khât tiô pơkâ dêi kơvâ on tơhrik pơkâ. Tâng pêi pro môi tiah mê mê ƀăng tơnêi dêi vâi krâ nhŏng o tro pơtê gá hên. Mê khu kăn pơkuâ cheăm rơtế ƀă kơvâ on tơhrik pơtối hnê tối mơhnhôk rơtế ƀă vâi krâ nhŏng o vâ pro tiah lâi tơtro rak tơniăn cheăng kâ dêi kuăn pơlê ƀă tơniăn ăm troăng kơxái on tơhrik”.

Mơni loăng keo kơđôu kơtong a kĭng trăng on tơhrik 22KV a Čư̆ San

Pôa Nguyễn Công Hướng, kăn phŏ pơkuâ On tơhrik Ea Kar, ăm ‘nâi, tiô pơkâ, kuăn pơlê châ phêp pêt loăng kơtăng ing troăng kơxái on tơhrik trung áp dâng 3m. Laga, xua loăng keo lai gá xŏn lối 15m, mơni kô tơđôu kơtong a troăng kơxái, mê kal athế pêt kơtăn ing troăng on tơhrik 20m nếo rak tơniăn. Nôkố, on tơhrik Ea Kar dế rak ngăn mơ’no lối 750km troăng kơxái trung áp xŏn lâp lu a 2 tơring Ea Kar ƀă M’Drak, ki hên cho tơkâ luâ ing mâu kơpong ngo ngối ai kong loăng pêt. Mot tung rơnó mê hngê, mơni kô trâm tơdroăng xâu xía xua ing on tơhrik ƀă loăng kong tơđôu kơtong a troăng kơxái.

Hâi 11/9 kố nah, xua tơdjâk dêi kong mê khía mơhot rôh má 5, kong mê kân, khía têi hiăng pro tơnêi tơhnah tơhnâp, loăng kong tơđôu kơtong a troăng kơxái on tơhrik 22KV ối tung troăng 471F18  pơla Ea Kar ƀă M’Drak, pro pâ on tơhrik ƀă 11.600 rơpŏng. Mâu tíu ki trâm xía vâ a kơpong ngo ki ai to loăng,xơpá ăm hnoăng cheăng ‘mâi rơnêu. Xua mê, vẩak tơniăn on tơhrik tung rơnó mê hngê, kơvâ on tơhrik kal khât tơdroăng ki tơrŭm dêi kuăn pơlê.

Kŏng nhân on tơhrik ‘mâi rơnêu on tơhrik xua loăng kơtong tôu a on tơhrik a M’Drak a hâi lơ 12/9

“Ƀă tơdroăng ki xiâm dêi on tơhrik tơkâ luâ hên kơpong kong pêt loăng cho xơpá kân ăm ngin tung hnoăng cheăng rak ngăn mơ’no on tơhrik. Mê tung la ngiâ ah On tơhrik Ea Kar pơtối ai hên troăng hơlâ pơlâ pêi pro péa tơdroăng, môi tiah pơtối tơrŭm ƀă khu kăn pơkuâ cheăm hnê tối vâ vâi krâ nhŏng o hlê ƀă môi tuăn ƀă kơvâ on tơhrik, tơrŭm lĕm tro tâ nếo ƀă kơvâ on tơhrik vâ rak tơniăn a kĭng troăng tơniăn on tơhrik xuân môi tiah tung tơdroăng ki xúa on tơhrik tơniăn, malối cho tung pơla rơnó mê hngê, khía mơhot”.

On tơhrik ai pơxúa khât tung tơdroăng ki kum mơnhông cheăng kâ rêh ối pơlê pơla. Xua mê, kuăn pơlê kal pêi pro tro tơdroăng pơkâ rak tơniăn kĭng troăng on tơhrik, ôh ti xê cho rak vế châ chăn dêi tơná ƀă rơpŏng hngêi, mê ối veăng kum rak vế on tơhrik pơtối hlối ăm tơdroăng ki rêh ối cheăng kâ.

Katarina Nga tơplôu ƀă tơbleăng