VOV4.Sêdang - Kơxo lơ 8/10, Hngêi trung Đại hok Kinh tế - Đaị học Quốc gia Hà Nội tơrŭm ƀă hngêi trung Đại học Hải Phòng, hngêi trung Đại học Thương mại ƀă Khu rak ngăn Kơpong cheăng kâ Hải Phòng tơkŭm po hôp khoa hok pơxá “FDI lâp plâi tơnêi ƀă túa tơpui dêi khu mơdró kâ FDI a Việt Nam tung pơla tơdroăng nếo”. Tiô tơdroăng ăm ‘nâi a rôh hôp, kơxô̆ liăn FDI lâp plâi tơnêi tối tơdjuôm ƀă FDI a Việt nam tối krê hiăng ƀă dế tro tơdjâk ó rơdêi sap ing pơreăng kân COVID-19. Laga, kơxô̆ liăn ‘no cheăng tơdrêng ing kong têa ê a tơnêi têa tung 9 khế hơnăm kố xuân châ lối 22 rơtal liăn dollars, tâk 4,4% tâng vâ pơchông ƀă khế kố hơnăm nah.

Kố cho môi tơdroăng chía tơniăn, mơhno tối tơdroăng ki loi tơngah dêi mâu khu ki ‘no liăn cheăng, rah xo Việt Nam cho tíu troh ki tơtro tung cheăng kâ, tê mơdró. Maluâ tiah mê, mâu kăn xuân tối mâu tơdroăng ki tá hâi châ pêi pro tung tơdroăng ki tơ’mot DFI dêi tơnêi têa pin tung tung pơla hdrối kố nah môi tiah: Tơdroăng ki ‘mêi ‘na hyôh kong prâi, tơdroăng ki ôh tá mơhúa ‘na gak kring on tơhrik, kring vế liăn ngân sap ing mâu tơdroăng tơkêa DFI.

‘Na troăng hơlâ tơ’mot FDI rơxông nếo tung la ngiâ, mâu kăn tối, tơnêi têa kal ai mâu troăng hơlâ kơjo kum hên, cho tơdroăng ki tơxup tơbriât, vâ tơ’mot mâu khu mơdró kâ ‘no liăn cheăng tung la ngiâ.

Katarina Nga tơplôu ƀă tơbleăng