VOV4.Xơ Đăng - Rôh hôp khu kăn xiâm tơpui kâ – Cheăng kâ APEC rôh má 32 (AMM 32) nếo po a 18 chôu hâi lơ 8/11 (tiô chôu Việt Nam) ƀă tơdroăng ki veăng hôp dêi 21 to kong têa peăng mâ hâi lo pa hdroh châu Á (ASEAN), Hô̆i đong Tơrŭm cheăng kâ Thái Bình Dương (PECC), Rôh hôp mâu chuăn Thái Bình Dương (PIF), Khu tơrŭm Tê mơdró lâp plâi tơnêi (WTO), ƀă Khu chêh tôm xo rơkong tơdroăng tơkêa dêi Khu lâp kong têa ‘na Kong prâi pro hơ’lêh (UNFCCC).

Tung pơla ai pơreăng kân COVID-19 dế tâ tú rơ-iêo tung lâp lu, tơdjâk troh tâi tâng lâp plâi tơnêi ƀă pro chiâng ai mâu tơdroăng ki tá ai trâm ăm tâi tâng mâu tơdroăng cheăng kâ, hơnăm kố, rôh hôp AMM pơtối châ tơkŭm po tiô tơdroăng ki ‘no tơdrêng ing troăng hyôh internet, tung 2 hâi lơ 8 ƀă lơ 9/11/2021. Rôh hôp châ klâ xoăng chiâng 2 rôh pêi cheăng. Xing xoăng pêi cheăng hâi má 1 po a hâi lơ 8/11 tơkŭm tơpui ‘na túa mơdêk rĕng ‘mâi mơnhông cheăng kâ ing mâu tơdroăng cheăng rơkê plĕng ‘na tê mơdró.

Katarina Nga tơplôu ƀă tơbleăng