VOV4.Xơ Đăng - Kơxo lơ 27/12, a Hà Nội, Vi ƀan xiâm Măt trâ̆n Tơnêi têa Việt Nam tơkŭm po Rôh hôp ‘no tơdrêng ing troăng hyôh Internet rôh má 11 Khu kăn hnê ngăn Vi ƀan xiâm Măt trâ̆n Tơnêi têa Việt Nam hneăng má 9. Tơpui a rôh hôp, pôa Đỗ Văn Tiến, Kăn xiâm hnê ngăn Vi ƀan xiâm Măt trâ̆n Tơnêi têa Việt Nam tối nhên, tơdroăng cheăng dêi Măt trâ̆n Tơnêi têa Việt Nam hơnăm 2021 ai hên tơdroăng ki tơ’lêi hlâu la xuân athế trâm hên mâu tơdroăng ki xơpá, pơloăng mơnúa, malối cho tơdroăng ki tơdjâk hên dêi pơreăng kân COVID-19.

Mâu tơdroăng ki hiăng pêi pro châ tiah mê dêi khu xiâm ngăn Măt trâ̆n rêm râ cho hâk tơngăm khât. ‘Na hnoăng cheăng ki kal hơnăm 2022, pôa Đỗ Văn Chiến, Kăn hnê ngăn Vi ƀan xiâm Măt trâ̆n Tơnêi têa Việt Nam tối nhên, Khu pơkuâ ngăn hiăng hnê mơhno mơjiâng túa pơkâ nhên, tơkŭm tung 3 kơvâ cheăng ki kal. Má môi cho, mơdêk ki khât, rơkê tung tơdroăng séa ngăn tơbleăng pơlê pơla. má péa cho, pơkâ hên mâu tơdroăng ki pơloăng mơnúa vâ hmâng, chêh tơkŭm rơkong tơpui tối pâ thế dêi kuăn pơlê vâ rĕng tối tơbleăng tơdrêng ăm Đảng ƀă Tơnêi têa. Má pái cho mơdêk hnoăng cheăng tơrŭm tê mơdró pêi pro chiâng ivá rơdêi dêi khu xiâm pơkuâ Măt trâ̆n Tơnêi têa sap ing Tơnêi têa troh kong pơlê.

Katarina Nga tơplôu ƀă tơbleăng