VOV4.Sêdang - Kơxê lơ 10/9, pôa Phạm Minh Chính, kăn cheăng tung tíu xiâm kal kí, Ngế pro xiâm phŏ hnê ngăn má môi tơnêi têa rơtế ƀă pôa Vương Nghị, kăn xiâm pơkuâ, Ngế xiâm tơpui kâ kong têa Sinuâ rơtế pơkuâ po rôh hôp má 13 Vi ƀan hnê mơhno tơrŭm cheăng pơla Việt Nam – Sinuâ. A rôh hôp, péa pâ môi tuăn mơdêk tơkŭm po mâu rôh lăm pôu, trâm mâ khu kăn xiâm; tối tơbleăng tơƀrê mâu tơdroăng tơrŭm cheăng pơla péa Đảng; mơdêk hnoăng cheăng ki kal dêi péa Khu xiâm tơpui kâ tung tơdroăng xing xoăng, mơdêk tơrŭm cheăng péa tơnêi têa; tơbleăng tro mâu troăng hơlâ trâm mâ, tơrŭm tung mâu kơvâ cheăng gâk kring, pêi pro luât pơkâ; tối tơbleăng tơdroăng ki kal ƀă tơrŭm ‘na hbrâ mơdât pơreăng Covid-19, tung mê ai tơrŭm cheăng ‘na vaccine.

Tâ tá hneăng hôp khu kăn xiâm Việt Nam ƀă Sinuâ

Pôa Vương Đình Huệ tơbleăng Sinuâ kô kum tơ’nôm 3 rơtuh klŏng vaccine ăm Việt Nam tung hơnăm kố, mơdêk kơxô̆ vaccine kum dêi Sinuâ tâk troh 5,7 rơtuh klŏng. ‘Na tơdroăng a têa kơxĭ, péa pâ môi tuăn pơtối pêi pro kơtăng ki hlê plĕng tơdjuôm dêi khu kăn xiâm, séa ngăn tro mâu tơdroăng ki ôh tá môi tuăn, ôh tá ai tơdroăng ki pro pá, po rơdâ tơxup tơbriât, rơtế ƀă dêi rơpó rak vế hơniâp lĕm, tơniăn a Biển Đông.

Katarina Nga tơplôu ƀă tơbleăng