VOV4.Xơ Đăng -  A Hà Nội hâi lơ 8/12, Khu xiâm pơkuâ ngăn Kăn sat têa kơxĭ Việt Nam pơkuâ po Rôh hôp ‘no tơdrêng ing troăng hyôh internet ƀă mâu ngế ki pơkuâ xiâm Kăn sat têa kơxĭ mâu kong têa châu Á rôh má 17 ƀă tơdroăng ki veăng dêi mâu ngế ki pơkuâ xiâm pơkuâ ngăn lêng kăn sat têa kơxĭ pêi pro luât têa kơxĭ ối tung 20 to kong têa, 1 kơpong tơnêi tơníu, 1 khu tơrŭm kong têa ê ƀă 3 ngế kăn ki séa ngăn. Kố cho rôh hôp rôh apoăng châ tơkŭm po tiô tơdroăng ki ‘no tơdrêng ing troăng hyôh internet.

Kố cho tơdroăng cheăng ki tơƀrê, veăng kum kơhnâ ăm tơdroăng ki mơdêk tơrŭm cheăng pơla mâu khu lêng pêi pro luât a châu Á, xua tơdroăng pơkâ ƀă tơdroăng ki pơxúa tơdjuôm ăm tơdroăng gak kring, tơniăn, hơniâp lĕm ƀă mơnhông mơdêk a kơpong ƀă tung lâp plâi tơnêi. Rôh hôp kố po ƀă 2 tơdroăng ki hơniâp ro tơrŭm tơroâ, loi tơngah ƀă tơdrăng. Kố cho rôh tơ’lêi vâ khu lêng kăn sat têa kơxĭ mâu kong têa tăng ‘nâi, mơnhên ƀă mơdêk mâu kơvâ tơrŭm cheăng krá tơniăn tâ vâ rơtế ƀă dêi rơpó pơkâ tơleăng mâu tơdroăng ki pêi pro luât têa kơxĭ. Tơdroăng ki tơdjuôm ivá pơkâ tơleăng mâu tơdroăng ki mơnhâu gak kring ki ôh tá tiah hmâ, mâu tơdroăng pơloăng mơnúa nếo ai a têa kơxĭ pâ thế mơdêk tơrŭm cheăng pơla mâu kong têa ‘na rak tơniăn gak kring tơniăn a têa kơxĭ.

Katarina Nga tơplôu ƀă tơbleăng