VOV4.Xơ Đăng - Kơxo lơ 2/12, hiăng po Rôh hôp tơdjêp tê ƀă roê pơla Pơlê kong kân Hồ Chí Minh ƀă mâu kong pơlê, pơlê kong kân tung lâp tơnêi têa. Tơpui a rôh hôp, pôa Đỗ Thắng Hải, ngế xiâm phŏ ngăn cheăng kơmăi kơmok ƀă tê mơdró mơnhên tói khât tơdroăng ki rak tơniăn tung tơdroăng ki tê kế tơmeăm ki kal ăm dâng 10 rơtuh ngế a Pơlê kong kân Hồ Chí Minh tung pơla ai mâu tơdroăng ki xơpá má môi drêng pơreăng xông tâ tú ó.

Rôh hôp tơdjêp tê roê pơla pơlê kong kân Hồ Chí Minh ƀă mâu kong pơlê

Vâ mơdêk tơƀrê pêi pro tơdroăng, tŏng kum khu mơdró kâ ‘mâi mơnhông tơdroăng cheăng mơjiâng pro tê mơdró, pôa Đỗ Thắng Hải pơkâ thế kăn pơkuâ Vi ƀan hnê ngăn Pơlê kong kân Hồ Chí Minh, Khu ngăn cheăng kơmăi kơmok ƀă tê mơdró mâu kong pơlê ƀă mâu khu mơdró kâ kal mơdêk tơƀrê pêi pro tơdroăng tơrŭm tê mơdró, malối cho mâu tơdroăng ki rak tơniăn yă tung kơchơ mơdró ƀă tơdroăng ki tơdjêp tê ƀă roê kế tơmeăm ing tơdroăng tơkŭm tung tŏng kum mơnhông kơchơ mơdró tê kế tơmeăm pêi lo ing chiâk deăng, kế tơmeăm xúa ki kal.

Katarina Nga tơplôu ƀă tơbleăng