VOV4.Xơ Đăng - Kơxo lơ 13/12, a Hà Nội, tung Rôh po hneăng hôp tơpui kâ rôh má 31, hiăng po Rôh hôp tơpui kâ lâp tơnêi têa rôh má 20 tiô tơdroăng ki ‘no tơdrêng ing troăng um tơvi, hyôh Internet, tơdjêp ƀă mâu tíu ki mơ’no tung tơnêi têa ƀă kong têa ê. Rôh hôp tơpui kâ rôh má 20 cho rôh ki kal vâ mâu kong pơlê, mâu khu xiâm, kơvâ cheăng Tơnêi têa, mâu Kơ koan teăng mâ Việt Nam a kong têa ê ƀă mâu kong têa tơrŭm cheăng kong têa ê rơtế mơnhên tối ‘na mâu tơdroăng ki klêi kơ’nâi hiăng châ rơhéa tung tơpui kâ kong pơlê, pơkâ mâu troăng hơlâ vâ mơdêk tơrŭm, mơdêk ki tơƀrê tơbleăng hnoăng cheăng kố tung la ngiâ.

A Rôh hôp, pôa Bùi Thanh Sơn, ngế xiâm tơpui kâ tối: Sap ing Rôh hôp tơpui kâ lâp tơnêi têa rôh má 19 hơnăm 2018 troh nôkố, tơdroăng kong têa ê ƀă tung kơpong hiăng hlo ôh tá tơniăn ó khât. Tung mê, pơreăng kân COVID-19 ton hiăng vâ chê 2 hơnăm hdrối nah hiăng ƀă dế tơdjâk ó troh mâu kơvâ cheăng kal kí, cheăng kâ rêh ối pơlê pơla dêi mâu kong têa ƀă tơdroăng ki trâm tơpui ƀă kong têa ê.

Xua tơdroăng ki pơkuâ dêi Đảng, tơdroăng hnê mơhno kơhnâ, tơƀrê dêi Chin phuh, tơdroăng ki veăng tŏng kum dêi mâu khu pơkuâ tơdroăng kal kí, mâu kong pơlê hiăng tơkŭm tơkâ luâ xơpá, pơloăng mơnúa tung hbrâ mơdât pơreăng, rak vế mơnhông cheăng kâ rêh ối pơlê pơla ƀă mot tơrŭm cheăng ƀă kong têa ê.

Katarina Nga tơplôu ƀă tơbleăng