VOV4.Xơ Đăng - A Hngêi hôp Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i prếi pôa Xay-xổm-phon Phôm-vi-hản, kăn xiâm hnê ngăn Kuô̆k hô̆i tơnêi têa Kŏng hòa Yân chủ Nhân yân Lếo hiăng pơkuâ po rôh hôp tơpui tơno ‘na tơdroăng ki rơkê plĕng tung hnoăng cheăng pơla Kuô̆k hô̆i Việt Nam ƀă Kuô̆k hô̆i Lếo. Rôh hôp cho tơdroăng pêi pro ki nhên vâ hơ’lêh mâu tơdroăng cheăng tơrŭm, tơpui tơno ăm dêi rơpó mâu tơdroăng ki rơkê plĕng pơla péa Kuô̆k hô̆i tung kơvâ cheăng mơjiâng luât, séa ngăn, pơkâ mâu tơdroăng ki kal dêi tơnêi têa.

Tung hneăng hơnăm hdrối kố nah, Kuô̆k hô̆i péa tơnêi têa hiăng tơkŭm po 8 Rôh hôp tung mê ai 4 Rôh hôp xua kăn xiâm hnê ngăn péa tơnêi têa rơtế tơkŭm po. Pôa Vương Đình Huệ, kăn xiâm hnê ngăn Kuô̆k hô̆i tối tiah kố, ing mâu Rôh hôp, Kuô̆k hô̆i péa tơnêi têa hiăng tối mâu tơdroăng ki rơkê plĕng tung hnoăng cheăng pơla Kuô̆k hô̆i Việt Nam ƀă Kuô̆k hô̆i Lếo tơkŭm tơpui tơno ‘na Tơdroăng cheăng ki kơ-êng ƀă tiâ mơnhên a hneăng hôp Kuô̆k hô̆i Việt Nam ƀă tơdroăng ki rơkê plĕng dêi Kuô̆k hô̆i Việt Nam tung tơdroăng ki séa ngăn, pơkâ mâu tơdroăng tơkêa ki kal dêi tơnêi têa ai pơxúa khât ƀă tơdroăng ki mơnhông mơdêk cheăng kâ rêh ối pơlê pơla dêi tơnêi têa.

Katarina Nga tơplôu ƀă tơbleăng