VOV4.Xơ Đăng - Roh kơ-êng ƀă tiâ rơkong kơ-êng a hneăng hôp má 2, Kuô̆k hô̆i hneăng má 15 kô tơkŭm po tung 2 hâi tơdế, pơxiâm sap kơxo kố, hâi lơ 10/11. Mâu ngế xiâm: Pôa Nguyễn Thanh Long, Ngế xiâm ngăn ‘na pơkeăng ƀă khăm pơlât, pôa Đào Ngọc Dung, Ngế xiâm pơkuâ cheăng pêi – mô đô̆i rong ƀă pơlê pơla; pôa Nguyễn Kim Sơn, Ngế xiâm pơkuâ hnê hriâm ƀă hnê mơjiâng tuăn ngôa rơkê; pôa Nguyễn Chí Dũng, Ngế xiâm pơkuâ ‘na pơkâ troăng pêi cheăng ƀă mơ’no liăn cheăng kô tiâ rơkong kơ-êng.

Tiô tối hdrối kơxo hâi pơtăm lơ 12/11, pôa Phạm Minh Chính, Ngế pro xiâm hnê ngăn Chin phuh mơnhên mâu tơdroăng tơdjâk ƀă tiâ rơkong kơ-êng dêi kăn teăng mâ Kuô̆k hô̆i. Hdrối roh kơ-êng, hên mâu kăn teăng mâ Kuô̆k hô̆i ƀă kuăn pơlê tơkôm, mâu roh kơ-êng roh kố phiu ro, tối hên troăng vâ kâi trâng tơniăn, ƀeăn ƀĕng rơkê hbrâ mơdât COVID-19; rak tơniăn, mơnhông cheăng kâ – rêh ối pơlê pơla.

Mâu tơdroăng hbrâ mơdât pơreăng COVID-19 tung pơla kố nah ƀă troăng pêi ton xŏn hbrâ, mơdât pơreăng, troăng pêi ton xŏn pâk vaccine tung la ngiâ châ mâu kăn teăng mâ rơhêng vâ ‘nâi plĕng.

A Sa Ly tơplôu ƀă tơbleăng