VOV4.Sêdang - Khu kăn ƀô̆, ngế chêh hlá tơbeăng dêi Rơ’jíu Việt Nam hiăng pleăng hnoăng cheăng lăm pêi cheăng a mâu kong pơlê peăng hdroh tơnêi têa mâu hâi peăng hdroh mơ-eăm tâi ivá hbrâ mơdât pơreăng. Ôh tá xê to hnoăng cheăng ki ƀă rêm ngế chêh hlá tơbeăng veăng roh pêi cheăng djâ hnoăng cheăng chêh hlá tơbeăng, hbrâ lăm troh rêm tíu vâ chêh tơbleăng ăm vâi krâ nhŏng o tơmâng Rơ’jíu mâu tơdroăng dêi tơnêi têa ƀă hiâm mơno dêi ngế chêh hlá tơbeăng Rơ’jíu

Khu kăn ƀô̆, ngế chêh hlá tơbeăng pleăng hnoăng cheăng roh kố ai 12 ngế, lăm troh a Pơlê kong kân Hồ Chí Minh ƀă mâu kong pơlê peăng Hdroh tơnêi têa, xua pôa Phạm Mạnh Hùng, Kăn xiâm phŏ pơkuâ Rơ’jíu Việt Nam pơkuâ xiâm. Khu pleăng hnoăng cheăng ai hnoăng thăm hnê mơhno, tối tơbleăng tơdroăng, pơtâng tối ‘na tơdroăng hbrâ mơdât pơreăng COVID-19 ƀă mâu tơdroăng xiâm tung rơ’jíu, um tơvi, măng internet dêi Rơ’jíu Việt Nam.

Troh mơhnhôk khu kăn ƀô̆, ngế chêh hlá tơbeăng pêi cheăng a mâu kong pơlê peăng Hdroh tơnêi têa, pôa Đỗ Tiến Sỹ, Kăn xiâm pơkuâ Rơ’jíu Việt Nam pói vâ mâu ngế chêh hlá tơbeăng, ngế rah chêh hlá tơbeăng hvât tah lôi mâu tơdroăng pá puât, tơvâ tơvân ‘na tơdroăng rơpŏng, tơdroăng rêh ối rêm hâi, rơtế ƀă khu ki mơdât pơreăng, veăng kum ƀă mâu tơdroăng pá puât dêi kuăn pơlê, khu pú hên vâ kum châ tơ-ƀrê pơkâ pêi kân má môi mơdât ƀă troh tah pơreăng.

Kăn xiâm pơkuâ Rơ’jíu Việt Nam xuân mơhno tơdroăng ki phiu ro ‘na mâu kăn ƀô̆, khu ngế chêh hlá tơbeăng, pói vâ ngế chêh hlá tơbeăng ki pleăng hnoăng cheăng ôh tá xê to chêh tơdroăng ki pleăng hnoăng cheăng, mơ-eăm dêi hên kuăn pơlê, khu pú hên, khu ƀok thái pơkeăng, khu mô đô̆i, kŏng an dế plâ hâi plâ măng pleăng hnoăng cheăng ôh tá pơ’lok tung tơdroăng hbrâ mơdât pơreăng, mê ối xo vế túa ki rơkê tơtro vâ ai mâu ƀai chêh hlá tơbeăng tơxâng ƀă tơdroăng nôkố dêi tơnêi têa:

‘’Khu pleăng hnoăng cheăng cho djâ tơdroăng tơbleăng tối dêi Đảng ủy Rơ’jíu, kố cho tơdroăng ki khŏm mơ-eăm dêi khu râ kăn pơkuâ Rơ’jíu. Xuân loi tơngah mâu khu pleăng hnoăng cheăng rĕng ai ƀai chêh hlá tơbeăng ki tơtro ‘ló păng ‘nâng. Á loi tơngah tung tơdroăng lăm pêi cheăng, mâu khu pleăng hnoăng cheăng kô châ trâm hên tơdroăng rêh ối, ai hên tơdroăng vâ chêh, mê Rơ’jíu Việt Nam rơtế ƀă kơ koan chêh hlá tơbeăng amê ai hên tơdroăng vâ chêh ki kơnía git’’.

A roh leh lo lăm pêi cheăng, mâu ngế chêh hlá tơbeăng pleăng hnoăng cheăng dêi Rơ’jíu Việt Nam tối hbrâ rơnáu veăng rơtế khu ki hbrâ mơdât pơreăng, thăm pơtâng tối nhên ‘na pơreăng. Pói vâ ai hên tơdroăng châ hlo, châ ngăn tơtro, châ tơ-ƀrê tung tơdroăng hbrâ mơdât pơreăng. Thành Lương, ngế chêh hlá tơbeăng, Ƀâng mơhno túa lĕm tro, Rêh ối pơlê pơla (VOV2) tối:

‘’Tơdroăng ki á pói vâ má môi cho ƀă mơngế ki tơmâng dêi Rơ’jíu Việt Nam, drêng tơdah tơdroăng ki ngin chêh tối, tối tơbleăng. Tơdah mâu um ngin pơtroh ing tíu ai pơreăng xông tâ tú ó mê ai tơdroăng ki loi tơngah, ‘nâi nhên kô kâi châ mơdât pơreăng tung la ngiâ’’.

Ƀă kố cho tơdroăng tối dêi Thi Uyên, ngế chêh hlá tơbeăng, cho ngế kơdrâi, Hlá tơbeăng Điê̆n tưh Rơ’jíu Việt Nam (VOV.VN):

‘’Á pói tơngah kô xup um ki khât má môi ‘na môi pơlê kong kân dế rêh ƀă hbrâ mơdât pơreăng. Á hbrâ hiâm mơno rơxông ki tơplâ khên tơnôu dêi mâu jâ pôa nah. Pói tơngah á kô tơkâ hluâ rơxông pá puât kố ƀă chiâng ngế ki châ hlo tơdroăng ƀlêi trâng păng ‘nâng’’.

Lại Hoa – VOV1 chêh

A Sa Ly tơplôu ƀă tơbleăng