VOV4.Sêdang - Kơxê lơ 31/8, a Tíu xiâm mơ’no Rơ’jiu Tơnêi têa, 58 Quán Sứ, Hà Nội, Rơ’jiu Việt Nam tơkŭm po Leh ăm mâu kăn ƀô̆, khu chêh hlá tơbeăng ki pleăng dêi hnoăng cheăng lăm troh a mâu kong pơlê peăng Hdroh. Khu kăn ƀô̆, khu chêh hlá tơbeăng ki pleăng dêi hnoăng cheăng rôh kố ai 12 ngế, lăm troh a Pơlê kong kân Hồ Chí Minh ƀă mâu kong pơlê peăng Hdroh xua pôa Phạm Mạnh Hùng, kăn xiâm phŏ pơkuâ Rơ’jiu Việt Nam pro kăn pơkuâ khu kố.

Khu kố ai hnoăng cheăng mơdêk hnê mơhno, tối tơbleăng, hnê tối ‘na hnoăng cheăng hbrâ mơdât pơreăng COVID-19 ƀă mâu tơdroăng kal ki ê a mâu um tơvi, rơ’jiu dêi Rơ’jiu Việt Nam. A rôh leh ăm mâu kăn ƀô̆, khu chêh hlá tơbeăng ki mơhnŏng vâ lăm xêh dêi Rơ’jiu Việt Nam pơrá tối hiăng hbrâ rơnáu veăng rơtế ƀă mâu khu ki hbrâ mơdât pơreăng, tối tơbleăng ‘na pơreăng. Rơhêng vâ ai hên tơdroăng ki kal, tíu ngăn ki hên, cho khât ‘na hnoăng cheăng hbrâ mơdât pơreăng dêi tơnêi têa.

Katarina Nga tơplôu ƀă tơbleăng