VOV4.Sêdang - Tơpui tơno ƀă khu chêh hlá tơbeăng, pôa Hồ Đức Phớc, kăn xiâm rak liăn ngân tơnêi têa pin ăm ‘nâi dế séa ngăn, tí tăng ‘nâi plĕng ăm khu ki ai hnoăng pơkuâ ƀă mâu kơxô̆ liăn tŏng kum ăm khu mơdró kâ, mơdêk cheăng kâ. Tung mê ai séa ngăn kơxô̆ liăn ai 10 rơpâu – 20 rơpâu rơtal liăn kum liăn laih ăm khu mơdró kâ. Pakĭng mê, mơni kô tơbleăng tê phĭu. Tiô pôa Hồ Đức Phớc, tung pơla dế nôkố, vâ pơkâ mơ’no mâu kơxô̆ liăn tŏng kum, mơni kô pêi pro tơdroăng ki ‘no hrê liăn ngân tơnêi têa.

Laga, drêng tơdroăng cheăng kâ hiăng vâ chía tơniăn ƀă mơnhông, kô kơdroh kơxô̆ liăn hrê cho liăn ngân tơnêi têa. Hdrối mê, pôa Nguyễn Phú Cường, kăn xiâm pơkuâ Vi ƀan Liăn ngân dêi Kuô̆k hô̆i ăm ‘nâi, Chin phuh dế chêh pro tơdroăng ki chêh tơkŭm tâi tâng ‘na ‘mâi mơnhông cheăng kâ, ƀă mâu kơxô̆ liăn mơhnhôk, tŏng kum ăm tơdroăng cheăng kâ vâ la ngiâ kố nah kô pơtroh ăm Kuô̆k hô̆i.

Tiô pôa Nguyễn Phú Cường, mâu kơxô̆ liăn, mơhnhôk cheăng kâ ki Chin phuh chêh pro athế ai hên vâ ‘mâi mơnhông cheăng kâ; troăng hơlâ mơnhông pêi pro tơtro ƀă tơdroăng ki trâm nôkố ƀă tơdroăng ki pêi pro tơ’lêi hlâu ăm kuăn pơlê, khu mơdró kâ châ pơxúa.

Nga tơplôu ƀă tơbleăng