VOV4.Sêdang - Tung măng tĭng hdrối, a kơpong Tây Nguyên, malối cho 2 kong pơlê Dak Lak ƀă Kon Tum potối hlo ai hên mâu ngế ki tro tâ pơreăng COVID-19, tung mê, ki tô tuăn má môi cho mâu ngế ki tâ tú tung pơlê pơla. Drêng ai tơdroăng kố, khu kăn pơkuâ ƀă mâu khu râ hiăng thăm mơdêk tơdroăng séa mơnhên ngăn vâ mơdât tơdroăng tâ tú pơreăng. Khu ƀok thái pơkeăng dêi Hngêi pơkeăng kân Chợ Rẫy xuân hiăng lăm troh a Dak Lak vâ veăng kum tung hbrâ mơdât pơreăng COVID-19.

A kong pơlê Kon Tum, klêi kơ’nâi ai lối chât ngế tro yương ti\nh ƀă SARS-CoV2 tung pơlê pơla, ing măng ti\ng hdrối, khu râ, kơvâ cheăng dêi kong pơlê hiăng hdró kơpong ki tâ tú pơreăng tung lâp kơpong, vâ tí tăng mâu ngế ki chiâng F1, F2, F3 vâ mơdât tơdroăng tâ tú pơreăng COVID-19 tung pơlê pơla ƀă mâu kơpong ki tro klâ kơtăn tơchoâm. Klêi kơ’nâi mê, Vi ƀan hnê ngăn kong pơlê Kon Tum hiăng tơkŭm po hneăng hôp mơ’no tơdrêng tung um tiô troăng hyôh internet ƀă 10 tơring, pơlê kong kơdrâm ƀă 102 to cheăm, bêng, pơlê kân dêi kong pơlê. Xông tơpui hnê mơhno tối a hneăng hôp ki kal mê, pôa Lê Ngọc Tuấn, Kăn hnê găn Vi ƀan hnê ngăn kong pơlê Kon Tum pơkâ thế, mâu tơring, cheăm kal athế pêi pro lĕm tro tơdroăng ki hdró kơpong ki ai pơreăng, tơdrêng amê, hnối pêi pro tro mâu tơdroăng cheăng ki vâ mơdât pơreăng COVID-19 tâ tú tung pơlê pơla ƀă mâu kơpong ki ăm klâ ối krê:

‘’Mâu kơpong ki ăm klâ ối krê cho kơdrâm mơngế, mơni kô tơ’lêi tâ tú dêi pó tung mê. Khu pơkuâ ngăn kơpong ki ăm klâ ối krê xuân athế thăm séa mơnhên ngăn kơpong ki klâ ối krê, kơpong ki khăm pơlât. Ăm klâ krê dêi a hngêi tiô kơ Khu ki ngăn ‘na hbrâ tơplâ mơdât COVID-19 pơlê pơla, tâi tâng khu râ pơkuâ hnê ngăn cheăng kal kí xuân athế séa mơnhên ngăn. Tâng hlo ai ngế ki lâi klâ ối krê a hngêi ôh tá rak vế tro tiô pơkâ kô athế djâ ngế ki mê lăm klâ ối a kơpong ki kơdrâm mơngế’’.

Môi kơpong ki séa ngăn ivá pơlê pơla klêi kơ’nâi klâ ối kơtăn a bêng Lê Lợi, pơlê kong kơdrâm Kon Tum

A hneăng hôp tơpui tơno ƀă khu chêh hlá tơbeăng a khế 10 kố nah, châ Khu hnê mơhno cheăng dêi Khu kăn pơkuâ hnê ngăn Đảng kong pơlê Kon Tum tối ăm ‘nâi, khu kố kô pơtối rak vế tơdroăng pơkuâ gak ngăn troăng kân dêi kong pơlê. Kố cho mâu tíu gak ngăn tí xê gak ngăn to mâu rơxế, xua mê, kong pơlê xuân ối rak vế mâu tíu ki gak ngăn mê. Ki păng ‘nâng ăm hlo, khu râ pơkuâ cheăng hiăng châ hlo ai mâu tíu ki yương ti\nh ƀă SARS-CoV2 a tíu gak ngăn vâ mơdât mơngế tâ tú pơreăng a kơxô̆ 1 Sao Mai, pơlê kong kơdrâm Kon Tum ƀă Tíu gak ngăn séa ngăn mơngế tâ pơreăng kơxô̆ 2 văng Lò Xo, tơring Đăk Glei a troăng kân Hồ Chí Minh. Ƀă mâu tơdroăng ki tâ tú pơreăng COVID-19 tung mâu kơpong ki klâ ối kơtăn mê tung pơlê ƀă pá gong kong pơlê, pôa Nguyễn Đình Cầu, Kăn phŏ ngăn Ƀơrô Vi ƀan hnê ngăn kong pơlê Kon Tum tối ăm ‘nâi:

‘’Klêi kơ’nâi ăm klâ ối krê plâ 14 hâi mê a kơpong ki ăm klâ ối krê ai hên ngế tôe xo têa môh roh má 3 pơrá âm tĭnh tâi tâng. La xuân ai mâu vâi ki ‘nâ, prếo 2 troh 3 hâi kơ’nâi; lơ 4 troh 5 hâi kơ’nâi mê vâi yương tĭnh nếo. Ki kố pin kô ‘nâi nhên tơkéa vâ tối tơdroăng ki pơreăng hiăng mot tung châ ton, thăm nếo, lo pá gong lơ ‘nâi vâi ai tâ tú mâu vâi ki ê lơ ôh. Ki má péa nếo, tơdroăng ki ăm klâ ối krê la ối tơchôam pú hên tung môi to kơbong, lơ veăng amê, hiăng tơniăn la vâi prếo a hngêi krê tơná xuân tá hâi teăm rak tro tiô pơkâ, ôh tá pêi pro tơdrăng mê khoh chiâng pro tâ tú tung pơlê pơla. Tơdroăng séa ngăn dêi Khu ki hbrâ, tơplâ, mơdât pơreăng pêi pro tá hâi teăm tâi dêi hnoăng cheăng tơná’’.

Khu pêi cheăng dêi Hngêi pơkeăng kân Chợ Rẫy tí tăng lăm ngăn a kơbong tơdah xo mơngế tamo châi a Hngêi pơkeăng kân kơpong Tây Nguyên

Drêng ai tơdroăng ki kuăn pơlê hiăng tâi hâi khế klâ ối krê, vâi vêh dêi a hngêi ah, drêng mê nếo ‘nâi ngế ki mê hiăng tâ tú pơreăng SARS – CoV 2, ing mê, khoh chiâng pro tâ tú tung pơlê pơla, xuân ai mâu tơring, pơlê kong kơdrâm dêi kong pơlê Kon Tum mơhnhôk kuăn pơlê mơhnŏng ối krê xêh a kơpong ki ăm klâ ối krê tơ’nôm pá 7 hâi nếo.

A kong pơlê Dak Lak, măng tĭng hdrối hiăng chiâng tíu ki tô tuăn ó khât ‘na COVID-19, xua ai hên khu ngế ki tro tâ tú pơreăng, malối a pơlê kong kơdrâm Ƀuôn Ma Thuột. Thăm nếo, ai 1 hâi ki ‘nâ hiăng hlo ai 174 ngế tro tâ pơreăng COVID-19, kố cho hneăng ki tâ tú hên ó sap nah tá troh nôkố, riân sap ing hâi ki pơreăng hneăng má 4 xông tâ tú. Tung mê, ai chât ngế ki châ hlo tung pơlê pơla, tơkŭm hên cho mâu tơring Čư̆ Mgar, Krông Ƀuk, pơlê kong krâm Ƀuôn Hồ ƀă pơlê kong kơdrâm Ƀuôn Ma Thuột.

Drêng ai tơdroăng mê, măng tĭng hdrối, khu ƀok thái pơkeăng dêi hngêi pơkeăng kân Chợ Rẫy hiăng troh a Dak Lak vâ veăng kum hbrâ tơplâ mơdât pơreăng COVID-19. Tung kơxo má ki apoăng drêng troh a kong pơlê Dak Lak, khu cheăng dêi Hngêi pơkeăng kân Chợ Rẫy hiăng ai chôu phut pêi cheăng ƀă mâu kăn ƀă khu ƀok thái pơkeăng dêi Hngêi pơkeăng kân kơpong Tây Nguyên. Ƀok thái pơkeăng Nguyễn Đại Phong, Kăn pơkuâ hngêi pơkeăng kân kơpong Tây Nguyên tối ăm ‘nâi: Mâu tơdroăng ki veăng hnê tối dêi Khu ki kum cheăng khăm pơlât ‘na tơdroăng tăng pơlât mơngế ki klâ ăm ối krê, mơngế ki châi tamo kô kum hngêi pơkeăng pêi pro tơtro ƀă tơ’lêi hlâu tâ tung tơdroăng cheăng khăm pơlât mơngế tamo châi COVID-19.

‘’Khu ƀok thái pơkeăng ing Hngêi pơkeăng kân Chợ Rẫy vâi hiăng rơkê plĕng hên tung tơdroăng khăm pơlât mơngế tamo châi xua COVID-19 a Pơlê kong kân Hồ Chí Minh, xuân môi tiah pơlât a mâu hngêi pơkeăng kơpong peăng Hdroh, peăng Tơdế tơnêi têa, khu ki mê troh a pin kố vâ kum ăm Hngêi pơkeăng kân kơpong Tây Nguyên châ hlo tâi tâng mâu tơdroăng ki hngêi pơkeăng tá hâi teăm ai tŭm tơmeăm khoăng, pơkeăng khăm pơlât. Tơdroăng ki kal, vâi kô kum ăm Hngêi pơkeăng ‘na tơdroăng khăm pơlât ƀă tâi tâng mâu kế tơmeăm, kơmăi kơmok, vâi kô châ tŏng kum ing Hngêi pơkeăng kân Chợ Rẫy rơtế ƀă Khu xiâm ngăn ‘na pơkeăng ƀă khăm pơlât.

Măng tĭng hdrối, khu kăn ƀô̆ ngăn ‘na pơkeăng ƀă khăm pơlât dêi Hngêi pơkeăng kân Chợ Rẫy hiăng lăm ngăn mâu hngêi pơkeăng pơlât pơtân, mâu kơpong ki pơlât, kơpong ăm klâ ối krê; veăng kum ăm kong pơlê ‘na tơdroăng vâ xing xoăng tung khăm pơlât, ăm mơngế tamo châi troh ối pơlât; veăng mâu hneăng hôp ƀă Khu hnê mơhno tung hbrâ tơplâ mơdât pơreăng COVID-19 dêi kong pơlê Dak Lak; hôp mơ’no tơdrêng tung um tiô troăng hyôh internet ƀă mâu khu ƀok thái pơkeăng ƀă mâu kăn pơkuâ dêi kong pơlê, mâu tíu xiâm ngăn ‘na pơkeăng ƀă khăm pơlât. Dế nôkố, mâu ƀok thái pơkeăng, mâu ngế ki kum cheăng dêi Hngêi pơkeăng kân Chợ Rẫy pơtối ối tơ’nôm pá 1 măng tĭng ah nếo vâ kum kong pơlê Dak Lak tung hbrâ, tơplâ, mơdât pơreăng, hnối kum khăm pơlât mơngế tamo châi xua tâ pơreăng COVID-19.

VOV Tây Nguyên

Nhat Lisa tơplôu ƀă tơbleăng