VOV4.Xơ Đăng - A pơlê kong kơdrâm Ƀuôn Ma Thuột, Tíu xiâm hnê mơhnhôk pêi chiâk deăng – Hdrê loăng pêt, mơnăn păn ƀă Ká xi xŏng kong pơlê Dak Lak tơrŭm ƀă Tíu xiâm hnê mơhnhôk pêi chiâk deăng Tơnêi têa tơkŭm po hôp mơgêi tơdroăng tơkêa “Mơjiâng ƀă mơnhông túa pơkâ pêt tơvât mâu hdrê loăng plâi kâ tung kơdrum pêt kơphế kơpong Tây Nguyên” hneăng hơnăm 2019 -2021, pêi pro a 4 to kong pơlê Tây Nguyên, mê cho Dak Lak, Dak Nông, Gia Lai ƀă Lâm Đồng, ƀă 115 ha tơnêi pêt tơvât plâi ƀơr ƀă plâi sầu riêng tung kơdrum kơphế.

Tây Nguyên mơjiâng tơƀrê túa pơkâ pêt tơvât loăng plâi kâ tung kơdrum kơphế

Krê a Dak Lak, tung hơnăm (2019 -2021), tơdroăng tơkêa mơjiâng pro châ 55 ha tơnêi pêt tơvât a mâu tơring Čư̆ Mgar, Krông Ƀuk, Krông Năng, Ea Hleo ƀă pơlê kong krâm Ƀuôn Hồ, ƀă 55 rơpŏng kuăn pơlê veăng tung tơdroăng tơkêa hiăng tŏng kum túa pơkâ 70% ‘na hdrê ƀă pơkeăng xôh kơdê oâ hdrong, phon rơvât; tơkŭm po mâu lâm hnê, khoa hok kih thuât hnê ăm mâu rơpŏng veăng tung túa pơkâ xúa.

Tiô tối hdrối, drêng loăng plâi kâ hiăng pơxiâm ai plâi ah kô pêi lo liăn tâk lối 20% tâng vâ pơchông ƀă pêt to hdrê kơphế, kơdroh tơdroăng ki ôh tá mơhúa ‘na yă drêng kơchơ mơdró kế tơmeăm pêi lo ing chiâk deăng ai hên tơdroăng ki hơ’lêh.

Katarina Nga tơplôu ƀă tơbleăng