VOV4.Sêdang - Tơdroăng ki pơkuâ ngăn mâu ngế ing tíu ê mot rêh ối tung kong pơlê cho vâ hbrâ mơdât pơreăng pơtối châ tâ tú tung pơlê pơla, tơdrêng mê, hnối ai troăng hơlâ kum pêt pơkeăng vaccine ăm kuăn pơlê vâ khoh kâi châ hbhrâ mơdât ki tâ tú ing pơreăng COVID-19, mê cho troăng hơlâ ki hbrâ mơdât pơreăng ki mâu kong pơlê a kơpong Tây Nguyên dế pêi pro krâu kơhnâ khât, chôa ‘lâng pro pơhôi iâ tung mơdât prôk lăm, mot lo, ‘mâi mơnhông tơdroăng pêi cheăng kâ – rêh ối pơlê pơla.

Klêi kơ’nâi 2 măng tĭng mơdât prôk lăm, mot lo pơlê kong kơdrâm Ƀuôn Ma Thuột, kong pơlê Dak Lak pơtối châ ‘nâi mâu tíu ki ai hên mâu ngế ki tâ pơreăng nếo tung pơlê pơla. Tiah mê, Ƀuôn Ma Thuột ôh tá pơkâ xúa xếo tơdroăng pơkâ 16 tung lâp lu, mê pêi pro tơdroăng ki tí tăng kơpong ki mơdât mot lo ki tơtro, po rơdâ séa ngăn pơreăng ƀă mơdêk pâk vaccine hbrâ mơdât pơreăng COVID-19. Môi tiah a tíu ki ai hên ngế tâ nếo châ ‘nâi a cheăm Ea Kao, Pơlê kong kơdrâm Ƀuôn Ma Thuột bu xúa pơkâ 16 ƀă cheăm kố sap ing hâi lơ 2/10, mơdât 4 to thôn, pơlê ki ai ngế tâ pơreăng, séa ngăn têa môh ƀă tâi tâng kuăn pơlê tung kơpong ki mơdât mot lo ƀă pâk 1 rơpâu klŏng vaccine ăm vâi krâ nhŏng o.

Pôa Đoàn Ngọc Thượng, kăn phŏ hnê ngăn Vi ƀan Pơlê kong kơdrâm Ƀuôn Ma Thuột, ăm ‘nâi:

“Bă tơdroăng pơkâ vaccine tro má môi cho vaccine troh rĕng má môi ƀă kuăn pơlê, mê ngin hiăng pêi cheăng ƀă pơkâ thế kong pơlê tŏng kum vaccine vâ rĕng pâk ăm vâi krâ nhŏng o, pro tiah lâi châ pâk vaccine ăm tâi tâng vâi krâ nhŏng o ƀă tơdroăng ki hên má môi vâ pro tíu ki tơniăn, vâ pôi tá ăm pơreăng châ tâ tú ngi pơlê, cheăm ki ê”.

Dak Lak tơdah mâu ngế ki vêh a tíu gak cho kông 14

Séa ngăn kơtăng, kâi hbrâ mơdât kơpong ki ai pơreăng, rak vế tơniăn ƀă po rơdâ kơpong ngiât, mê cho túa ki tá khu pơkuâ tơdroăng kal kí a pơlê kong kơdrâm Ƀuôn Ma Thuột, kong pơlê Dak Lak xuân môi tiah kơpong Tây Nguyên rak tơniăn hbrâ mơdât pơreăng COVID-19. Cho kong pơlê ki ai kơxô̆ ngế tâ pơreăng hên má môi kơpong, riân troh tâi măng tĭng hdrối, Dak Lak ‘nâi ai lối 2 rơpâu ngế yương tĭnh ƀă SARS-CoV-2. Pêi pro tro tơdroăng ki vê hdró kơpong vâ hbrâ mơdât pơreăng, troh nôkố, hiăng ai 9/15 to tơring, cheăm a Dak Lak châ pơ’lêh kơpong ngiât ƀă tơbleăng mâu hnoăng cheăng mơnhông mơdêk cheăng kâ rêh ối pơlê pơla hiăng vâ vêh tiah hmâ.

A kong pơlê Gia Lai, xuân rĕng kâi hbrâ mơdât mâu tíu ki ai hên ngế tâ châ ‘nâi tung pơlê pơla, kong pơlê xuân dế rak vế châ cho kơpong ngiât dêi tơnêi têa. Pơkâ ivá, châ chăn dêi kuăn pơlê cho ki xiâm, kong pơlê ‘mâi mơnhông mâu tơdroăng cheăng kâ rêh ối pơlê pơla tiô túa ki hbrâ kơchăng.

Pôa Võ Ngọc Thành, kăn hnê ngăn Vi ƀan kong pơlê Gia Lai tối nhên:

“Túa pơkâ hbrâ mơdât pơreăng tung tơdroăng nếo mê xuân hiăng châ hnê mơhno nhên. Drêng pin tá hâi ai tơdroăng vâ pâk vaccine ăm kuăn pơlê tung lâp lu lối tơdế pơ’leăng mâ mơngế mê môi tơdroăng ki ê pin pơtối pâ thế Tơnêi têa kum tơ’nôm vaccine vâ rĕng châ pâk ăm kuăn pơlê; ki ê mê xuân athế pêi pro kơtăng pơkâ 5K. Pakĭng mê, cho athế tơmiât nhên xuân athế séa ngăn kơtăng mâu ngế ki mot ing ê, mâu tíu gak a mâu bo cheăng mot lo tung kong pơlê athế pêi pro tiô túa ki đi đo krá tơniăn, hbrâ mơdât tro. Má péa, cho athế pêi pro tro hnoăng cheăng séa ngăn mâu ngế ing ê mot tung kong pơlê; séa ngăn, pơkâ tơleăng mâu ngế ki pro xôi luât; pôi tá tơngôu”.

Mơdêk pâk vaccine COVID-19

Tơdroăng tơdjuôm tung hnoăng cheăng hbrâ mơdât pơreăng COVID-19 a mâu kong pơlê kơpong Tây Nguyên ki hên mâu ngế ki tâ pơreăng mê pơrá vêh sap ing kong pơlê ki ê. Ki xiâm môi tiah Lâm Đồng, troh nôkố tung kơxô̆ ngế tâ COVID-19 mê ai vâ chê 1/3 cho ngế ki vê rơxế, ngế ki kum ngế ki vê rơxế chơ kế tơmeăm ing kong pơlê ki kố ngi kong pơlê ki ê ƀă ngế ki ai tơdjâk. Kong pơlê hiăng xúa hên troăng hơlâ pêi pro kơtăng tung hbrâ mơdât pơreăng pơto chơ kế tơmeăm ƀă ngế ki vê rơxế, ngế ki kum ngế ki vê rơxế sap ing tíu gak mot tung kong pơlê troh a mâu tíu ki pơtroh kế tơmeăm, xing xoăng ối pơtê tơkŭm, kơjo pâk vaccine ăm mâu ngế ki kố.

Vâ hbrâ mơdât pơreăng, nôkố mâu kong pơlê Tây Nguyên xuân dế pơtối séa ngăn krá mâu ngế ki ing kong pơlê ki ê mot tung kong pơlê. Malối cho sap ing hâi lơ 1/10, drêng mâu kong pơlê, pơlê kong kân peăng Hdroh pro pơhôi tơdroăng ki klâ ối krê, kơxô̆ mơngế vêh dêi ngi kong pơlê tâk hên, mâu kong pơlê dế athế tơmiât nhên mâu túa pơkâ tơdah xo kuăn pơlê vêh dêi ngi pơlê. A rôh hôp khu pơkuâ ngăn Đảng ƀô̆ kong pơlê Dak Nông po a hâi lơ 1/10, pôa Hồ Văn Mười, kăn hnê ngăn Vi ƀan kong pơlê tối, tơdroăng ki xơpá nôkố cho pro tah lâi tơdah xo kuăn pơlê dế ối kreăng a kơpong ki ai pơreăng, pôi tá ăm vâi hmôu pơ vêh xêh:

“Dak Nông cho a troăng ki sap ing mâu kong pơlê peăng Hdroh ngi Tây Nguyên, tơdroăng nôkố pin tơdah xo vâi krâ nhŏng o vêh môi tiah lâi, pôi tá chiâng lôi vâi krâ nhŏng o hmôu pơ vêh hmâng vâ, tâng vêh athế vêh tơniăn môi tah hdrối. Dak Nông nôkố liăn ngân ôh ti ai cho 2 tơdroăng: môi cho mâu ngế cheăng khăm pơlât, péa cho khu ki gak vâ rak tơniăn ăm vâi krâ nhŏng o vêh hên cho tơdroăng ki pá”.

Tiô tơdroăng ăm ‘nâi apoăng dêi Khu hnê hbrâ mơdât pơreăng COVID-19 kong pơlê Dak Lak, sap ing kơhâi dế hâi lơ2/10 troh kơhâi dế lơ 3/10 ai dâng 7 rơpâu toăng rơxế tŭm túa vâ chê 10 rơpâu ngế sap ing mâu kong pơlê peăng Hdroh vêh ƀă tơkâ luâ kong pơlê Dak Lak. Tung mê, krê kuăn pơlê Dak Lak ai vâ chê 3 rơpâu ngế. Vâ rak tơniăn hnoăng cheăng hbrâ mơdât pơreăng COVID-19, tâi tâng mâu kuăn pơlê vêh sap ing Dak Lak troh kơpong tơkŭm a hngêi trung hdroâng kuăn ngo ai tíu kâ koi ối pơtê Nơ Trang Lơng vâ test rĕng.

Klêi mê khu ki ai tơdjâk kô athế xoăng kuăn pơlê tiô rêm tơring ƀă mâu tơring cheăm kô lăm tơdah xo kuăn pơlê dêi tơná vêh ƀă klâ ăm ối krê tiô pơkâ. Pôa Trịnh Quang Trí, kăn pơkuâ Tíu xiâm châi tamo kong pơlê Dak Lak ăm ‘nâi: Rôh kố, mâu kuăn pơlê vêh, kơbố hiăng pâk tŭm 2 trum vaccine ƀă ‘nâi âm tĭnh ƀă SARS –CoV-2 rơtế ƀă mâu ngế ki pâk 1 trum, klêi séa ngăn âm tĭnh rơpŏng hngêi kô klâ ăm ối krê rak tơniăn tiô pơkâ dêi Khu xiâm ngăn pơkeăng ƀă khăm pơlât, pơrá châ kong pơlê ăm klâ ối krê a hngêi.

Kuăn pơlê ki tá hâi pâk vaccine, kô châ klâ ăm ối krê tơkŭm klêi kơ’nâi test rĕng a tíu tơkŭm. Xuân tiô pôa Trịnh Quang Trí, ƀă lối 3 rơpâu ngế vêh ngi Dak Lak tung pơla kố, kơvâ ngăn pơkeăng ƀă khăm pơlât hiăng athế pơtroh mâu khu ki cheăng vâ pêi pro hnoăng cheăng xing xoăng, séa ngăn pơreăng vâ rĕng châ ‘nâi F0, kơdroh ki tâ tú.

“Nôkố tơdroăng khăm pơlât tŭm test rĕng vâ séa ngăn ăm tâi tâng kuăn pơlê ki vêh. Laga, ƀă kơxô̆ ngế vêh gá hên ƀă pin tơdah xo tung môi tíu ki ôh tá kân rơdâ, ki ê nếo kong prâi sap ing hâi kố troh chôu ki kố ai mê pro pá ăm khu ki ngăn pơkeăng vâ séa ngăn pơreăng. Xua to lâi hâi hdrối nah ai mâu tíu ki ai pơreăng a pơlê kong kơdrâm xuân môi tiah a Ƀuôn Hồ mê mâu khu ki ai tơdjâk troh ‘na khăm pơlât xuân môi tiah khu ki toê xo têa môh a mâu tíu pêi cheăng kố xua mê ivá tung to lâi hâi hdrối nah xuân hlo xơpá. Laga, kơmăng hnah CDC hiăng pơtroh lối 30 ngế kăn ƀô̆ ngăn pơkeăng vâ pơtối toê xo têa môh séa ngăn pơreăng ƀă kơxo kố hiăng hơ’lêh kơxô̆ kăn ƀô̆ kố”.

Nôkố, mâu kong pơlê Tây Nguyên xuân pơklât thế séa ngăn kơtăng a mâu tíu gak a troăng kân vâ hbrâ mơdât pơreăng tâ tú. Tơdroăng kố mơni kô rak vế kơpong ngiât, pro tơ’lêi hlâu ăm mâu tơring, cheăm tung tơdroăng ki pro pơhôi, rế hía rế ‘mâi mơnhông mâu kơpong cheăng kâ rêh ối pơlê pơla. La mâu tíu séa ngăn xuân ối hlo hâ ho tơdjâk troh tơdroăng ki chơ mâu kế tơmeăm ing tơring ki kố ngi tơring ki ê. Chiâng vâ hlo, drêng kơxô̆ ngế kuăn pơlê pâk vaccine hbrâ mơdât COVID-19 tá hâi hên, vaccine iâ, mê tơdroăng ki pro pơhôi klâ krê a kong pơlê Tây Nguyên xuân rế hía rế kơchăng, ki hên cho pêi pro tung kơpong rak tơniăn mâu tơdroăng ki rơhêng vâ dêi tơdroăng rêh ối cheăng kâ.

Minh Huệ chêh

Katarina Nga tơplôu ƀă tơbleăng