VOV4.Sêdang - Pôa Phạm Bình Minh, Ngế pro xiâm phŏ hnê ngăn tơnêi têa nếo ai mơ-éa pơkâ Khu xiâm rak tơniăn troăng klông ƀă rơxế kơtâu pơkuâ, tơrŭm ƀă Vi ƀan Rak tơniăn troăng klông Tơnêi têa thâ séa ngăn, tơbleăng Ngế pro xiâm hnê ngăn Chin phuh rah tŭm mâu kăn cheăng tung Vi ƀan rak tơniăn troăng klông ƀă rơxế kơtâu tơnêi têa; tơdrêng amê pơkâ thế Khu rak tơniăn troăng klông mâu kong pơlê thâ séa ngăn, rah tŭm mâu ngế pêi cheăng tiô hnoăng vâ tơxâng tiô pơkâ tung pêi cheăng rak tơniăn troăng klông ƀă rơxế kơtâu tung rơxông nếo.

Ngế pro xiâm phŏ hnê ngăn tơnêi têa pơkâ Khu xiâm Kŏng an hnê mơhno Kŏng an mâu tíu cheăng, kong pơlê pơtối thăm séa ngăn, pơxâu phak mâu ngế xôi ‘na rak tơniăn troăng prôk ƀă rơxế kơtâu ƀă pơkâ ‘na hbrâ mơdât pơreăng COVID-19; tơtrŏng ôh tá ăm ai chôm drô troăng kân a mâu tíu gak mơdât pơreăng, pro tơdjâk troh prôk troăng pơto tơmeăm khoăng ƀă tơdroăng prôk lăm dêi kuăn pơlê, pro pơreăng tơ’lêi tâ tú.

A Sa Ly tơplôu ƀă tơbleăng