VOV4.Sêdang - Kơxo lơ 27/10, a tíu pêi cheăng Rơ’jíu xiâm Việt Nam, 58 Quán Sứ, Hà Nội, tơkŭm po Hneăng hôp tơrŭm cheăng Việt Nam – Indonesia roh má IV ƀă troăng mơ’no tơdrêng tung um tiô troăng măng internet ƀă um tơvi. A hneăng hôp, mâu kăn tơpui tơno, tơbleăng ăm pêi pro Tơbleăng mơgêi mơnhên tơdroăng pêi cheăng dêi Khu tung 5 hơnăm hiăng hluâ, pơkâ troăng prôk la ngiâ dêi Khu tung hneăng hơnăm 2021 – 2026.

Thăm tơrŭm krá tơniăn tâ pơla Việt Nam – Indonesia

Hneăng hôp xuân tơkŭm po rah xo Khu pơkuâ xiâm Khu. Khu tơrŭm cheăng Việt Nam – Indonesia hiăng thăm veăng kum tung tơdroăng thăm krá tơniăn, tơrŭm môi tuăn pơla péa pâ, thăm pêi pro tơdroăng tơrŭm, po rơdâ trâm mâ tơpui tơno tung rơxông nếo dêi tơrŭm cheăng ton xŏn. Khu hiăng mơnhông hnoăng kông tơdjêp, tơdjêp pơla mâu khu tơrŭm péa tơnêi têa, kum thăm tơrŭm cheăng, hbrâ mâu khu ngế pêi cheăng ăm mơnhông mơdêk cheăng kâ, rêh ối pơlê pơla, gak kring ki pơxúa tơnêi têa.

A Sa Ly tơplôu ƀă tơbleăng