Tơdroăng ki apoăng cho Vi ƀan hnê ngăn tơring Ia H’Drai tơkŭm po Leh tơbleăng pơkâ dêi Vi ƀan hnê ngăn kong pơlê Kon Tum mơnhên cheăm Ia Đal pêi klêi thôn pơlê nếo. Kố cho cheăm tơkăng kong ki má 7 tung tâi tâng 13 to cheăm a tíu tơkăng kong dêi kong pơlê Kon Tum pêi klêi thôn pơlê nếo. Tung mâu hơnăm hdrối mê hía nah Đảng ƀô̆, kăn pơkuâ ƀă vâ chê 5 rơpâu ngế kuăn pơlê cheăm tơkăng kong Ia Đal tơdjuôm ivá, môi hiâm mơno pêi pro Tơdroăng pơkâ dêi tơnêi têa mơjiâng thôn pơlê nếo ƀă pêi châ tơƀrê hên mâu tơdroăng cheăng.

Ing hên kơxô̆ liăn cheăm mơhnhôk tơlo châ lối 49 rơtal liăn ‘no pêi cheăng mơjiâng rak vế mâu tơdroăng pơkâ ‘na hngêi trăng troăng klông; pêi lo liăn rêm ngế châ lối 43 rơtuh liăn môi ngế tung môi hơnăm; kơxô̆ rơpŏng kơtiê, vâ chê kơtiê chu kơdroh ối pá xôp 12%. Pôa Lê Văn Nịa, thôn Ia Đal, cheăm Ia Đal, ăm ‘nâi:

“Kuăn pơlê hlo ro khât xua mơjiâng thôn pơlê nếo cho ăm kuăn pơlê, pro ăm dêi tơná vâ mơnhông mơ-eăm tung rêh ối. Mơjiâng thôn pơlê nếo kuăn pơlê veăng kum hâi pêi cheăng, kum ivá cho pleăng tơnêi pro troăng prôk tung thôn. Mơjiâng thôn pơlê nếo kuăn pơxúa châ pơxúa hên tơdroăng, pro tơ’lêi hlâu ăm tơdroăng pêi cheăng kâ rơpŏng hngêi tơkâ luâ hluăn ing kơtiê krá ton. Túa lĕm tro, cheăng kâ châ mơdêk khât tâng vâ pơchông ƀă hâi hdrối tá hâi mơjiâng thôn pơlê nếo”.

Ƀă tơdroăng ki châ mơnhên pêi klêi thôn pơlê nếo, cheăm Ia Đal cho cheăm a tíu tơkăng kong ki má 7 tung tâi tâng 13 to cheăm a tíu tơkăng kong dêi kong pơlê Kon Tum hiăng ai 48 tung tâi tâng 85 to cheăm dêi kong pơlê pêi klêi thôn pơlê nếo, tung mê, ai 4 to cheăm pêi klêi thôn pơlê nếo mơdêk ƀă 1 to cheăm pêi klêi thôn pơlê nếo tiô túa pơkâ.

Ƀă ivá khŏm mơ-eăm pêi klêi mâu tơdroăng pơkâ vâ pêi cho mơnhông cheăng kâ rêh ối – pơlê pơla pơkâ mơ’no tung hơnăm 2024, a leh lo lăm pêi cheăng mơjiâng thôn pơlê nếo ƀă kơphô̆ rơkê, 10 to tơring, pơlê kong kơdrâm dêi kong pơlê Kon Tum hiăng tơbleăng mâu tơdroăng ki kal nhên vâ mơ-eăm pêi klêi. Tung mê, tơkŭm tung tơdroăng mơjiâng mâu túa pơkâ pêt kế tơmeăm, po pông tơnêi klêng, pêt mơjiâng kế tơmeăm OCOP; mơjiâng nếo, ‘mêng rơnêu mâu troăng prôk, hno, long têa, hngêi hôp tơdjuôm; kum mâu rơpŏng ki xơpá ‘mêng rơnêu hngêi trăng, kơdrum deăng hơ’lêh pêt mâu hdrê loăng ki ai yă kơnâ, thăm mơdêk hnoăng cheăng pơkuâ ngăn rak vế ƀă mơnhông pêt kong.

Cho tơring ai lối 79 km troăng tơkăng kong tơdjêp ƀă tơnêi têa Kul, a Leh lo lăm pêi cheăng mơjiâng thôn pơlê nếo châ po a cheăm Ia Đal, pôa Võ Anh Tuấn, Kăn hnê ngăn Vi ƀan tơring Ia H’Drai ăm ‘nâi:

“Đảng ƀô̆, kăn pơkuâ ƀă Kuăn pơlê dêi tơring pơkâ tơdroăng ki vâ pêi cho mơjiâng tơring troh mơ’nui hơnăm 2025 tơring hiăng pêi châ mâu tơdroăng pơkâ pêi dêi tơring thôn pơlê nếo. Tung mâu tơdroăng Pơkâ dêi Khu pơkuâ ngăn Đảng ƀô̆ tơring xuân hiăng pơkâ mơ’no nhên mâu tơdroăng vâ rêm to cheăm pêi klêi thôn pơlê nếo. Ƀă ki xiâm xuân môi tiah cho túa pơkâ hiăng mơ’no ngin dế mơ-eăm xuân môi tiah hiăng ai troăng prôk ki nhên vâ ăm cheăm Ia Tơi troh mơ’nui hơnăm 2024 pêi klêi thôn pơlê nếo”.

Hlo mơngế Rơteăng hlê plĕng, rak ngăn pơlê pơla tơ’lêi hlâu tung tơdroăng ki mơjiâng túa pơkâ cheăng kâ khu pú hên, ing mâu ngế ki kal xiâm, a cheăm Đăk Na, tơring Tu Mrông, kong pơlê Kon Tum hiăng ai 3 Khu pêi cheăng tơrŭm ƀă 3 Tôh pêi cheăng tơrŭm. Tơdroăng ki veăng tung mâu Khu pêi cheăng tơrŭm hiăng kum kuăn pơlê hơ’lêh túa tơmiât tung pêi cheăng pêt kế tơmeăm. Pôa

Võ Nguyên Sinh, Kăn hnê ngăn Hô̆i đong Kuản trĭ hlối cho kăn pơkuâ Khu pêi cheăng tơrŭm Ôm hyô ƀă Pơkeăng ngiât Siu Puông ƀă 43 ngế ki veăng tơrŭm tung khu pêi cheăng tơrŭm ki hên cho mơngế Rơteăng, ăm ‘nâi:

“Mâu ngế ki veăng tung Khu pêi cheăng tơrŭm mê vâi hơ’lêh túa tơmiât ‘na tơdroăng ki pêt kế tơmeăm, túa tơmiât pêi cheăng kâ. Veăng tung Khu pêi cheăng tơrŭm vâ pêt pơkeăng kong Ngọc Linh mê ối rak vế kong ƀă thăm mơnhông pêt kong krá tơniăn. Xua vâi hơ’lêh túa tơmiât ing mê chiâng ai mâu túa pơkâ pêi cheăng ki ê. Iâ khế hơnăm mê pêt pôm têa tôu, păn í, păn chu vâ xúa tung ôm hyô. Ƀă ki ton xŏn mê ai pôm pơkeăng Ngọc Linh. Vâi ai kơxô̆ liăn pêi lo mâu kế tơmeăm ki iâ khế ƀă ton khế”.

Ƀă hnoăng cheăng cho ngế ki pơkuâ tung mơjiâng thôn pơlê nếo, hên mâu pơlê cheăm hdroâng kuăn dêi kong pơlê Kon Tum hiăng mơ-eăm pêi cheăng pêt kế tơmeăm mơdêk pêi lo tơ’nôm liăn ƀă veăng kum hơ’lêh ngiâ méa thôn pơlê. Riân troh mơ’nui hơnăm 2023 hiăng ai 32 to thôn, pơlê kơpong hdroâng kuăn ngo dêi kong pơlê Kon Tum pêi klêi thôn pơlê nếo.

Tâi tâng mâu cheăm tung kong pơlê pêi châ ing 15 tơdroăng pơkâ thôn pơlê nếo tơngi klêng. Lâp kong pơlê Kon Tum nôkố ai 42 to cheăm plah thôn pơlê nếo, tung mê, hên cheăm kơpong hdroâng kuăn ngo hiăng pêi klêi thôn pơlê nếo.