Cho thái ki châ xing xoăng hnê a kơpong hdroâng kuăn ngo Đầm Ròn, tơring Dam Rông, kong pơlê Lâm Đồng ing hơnăm 1980, klêi kơ’nâi vâ chê 40 hơnăm pêi klêi rơkê hnoăng cheăng hnê, hơnăm 2018, pôa ông Liêng Jrang Ha Tương, a ƀuôn Dà Teh, cheăm Dà Mrông hiăng troh hơnăm pơtê ƀă châ pơcháu pro kăn pơkuâ ngăn Chi ƀô̆ thôn. A hnoăng cheăng ki nếo kố, pôa Liêng Jrang Ha Tương hiăng mơdêk dêi hnoăng cheăng cho môi ngế đảng viên, rơtế ƀă mâu đảng viên ki ê tung chi ƀô̆ hmâ tơkŭm hôp tơpui tơno, tơbleăng pêi pro tơƀrê mâu tơdroăng pơkâ ‘na tơdroăng kal cho mơnhông cheăng kâ, túa lĕm tro, rêh ối pơlê pơla, mơdêk tơdroăng rêh ối liăn ngân, hiâm mơno ăm kuăn pơlê.

Pôa Liêng Jrang Ha Tương tối, vâ kuăn pơlê tung pơlê kơhnâ pêi chiâk, hơ’lêh pêt mâu hdrê loăng, mơdêk tơƀrê tơdroăng pêt tơmeăm, tơná pôa ƀă mâu đảng viên tung chi ƀô̆ pơrá djâ troăng ahdrối tung pêi mâu tơdroăng. Malối, athế mơdêk hnoăng cheăng đảng viên, kơhnâ hriâm tâp ƀă pêi tiô tuăn tơmiât, hiâm mơno, túa rêh ối Hồ Chí Minh ƀă mâu tơdroăng pêi ki nhên, ki pơxúa.

"Ƀă môi ngế đảng viên cho athế ngế ki djâ troăng ahdrối, athế cho ngế ki pêi ahdrối, ing mê vâi krâ nhŏng o vâi nếo hơ’lêh túa ki rơkê, ngăn hlo nhên ki tơƀrê dêi cheăng tơná pêi. Môi tiah hdrối nah, ngin mơ’no tối mâu túa pơkâ pêi pro nhên khât, ‘na tơdroăng pêt kơchâi drêh xuân môi tiah păn kơ’nôm í, peâp, chu vâ ai liăn ngân xúa tung rơpŏng hngêi. Ing mâu tơdroăng ki hiăng pêi, ngin hiăng pơkâ kơtăng tung tâi tâng kuăn pơlê vâi pêi pro ƀối, hơ’lêh tơdroăng rêh ối cheăng kâ dêi tơná, kơdroh iâ ki xơpá tung ‘no hrê liăn vâ roê kế kâ rêm hâi. Mê xuân cho tơdroăng ki á hlo ƀă môi ngế đảng viên drêng hriâm tâp mê pin athế pêi mâu hnoăng cheăng ki nhên, ai pơxúa môi tiah mê”.

Klêi kơ’nâi 5 hơnăm pro kăn pơkuâ Chi ƀô̆, pôa Liêng Jrang Ha Tương hiăng ‘măn chôu hên tơdroăng ƀă hiâm mơno ki lĕm tro tung rêm ngế kăn ƀô̆, đảng viên ƀă vâi krâ nhŏng o kuăn pơlê tung pơlê. Ing mâu tơdroăng cheăng pêi ki nhên ƀă ki pơxúa tung djâ troăng ahdrối tung pêi chiâk deăng, hơ’lêh pêt mâu hdrê loăng mơdêk pêi lo liăn, hên kuăn pơlê tung pơlê hiăng kơhnâ pêi tiô ƀối.

Ki nhên, hiăng ai vâ chê 50 rơpŏng kuăn pơlê hdroâng kuăn ngo tung pơlê khên tơnôu hơ’lêh ƀăng tơnêi pêt báu môi rơnó ki ôh tá dâi lĕm chiâng pêt loăng păn hdrong, hên rơpŏng pêt tơ’nôm kơchâi drêh, păn tơ’nôm mơnăn mơnoâ, í peâp vâ ôh ti xê to ai kế kâ mê ối tê ăm mâu ngế ki vâ roê lơ tê ăm kơchơ tê mơdró. Ing mê, tơdroăng rêh ối cheăng kâ dêi kuăn pơlê tung pơlê rế hía rế tơniăn ƀă mơnhông. Mâu khôi túa tơlá ki ôh tá tro tung pơkoăng, ‘mé kiâ xuân lôi, mâu khôi túa lĕm tro mâu hdroâng kuăn ngo châ rak vế ƀă mơnhông.

Troăng pơlê mot tung pơlê đi đo ngiât, krúa lĕm, rak vế mâu tơdroăng pơkâ ‘na thôn, pơlê lĕm tro. Pôa Liêng Jrang Ha Tương, hdroâng kuăn ngo K’Ho a ƀuôn Dà Teh, cheăm Dà Mrông ăm ‘nâi:

“Tung thôn Dà Teh ngin ai Kăn pơkuâ chi ƀô̆ thôn pơkuâ mê troăng mot tung thôn pơlê gá lĕm khât, tâi tâng mâu tơdroăng ki ai tung thông pơrá tơniăn, krúa lĕm”.

Thôn Dă Teh, cheăm Dă Mrông, tơring Dam Rông ai vâ chê 220 rơpŏng, vâ chê 1 rơpâu pơ’leăng mâ mơngế, ki hên cho hdroâng kuăn ngo, kơxô̆ rơpŏng kơtiê châ lối tơdế. Kơnôm ing hơ’lêh túa pêi, rế hía rế hơ’lêh pêt mâu hdrê loăng, kơhnâ pêi chiâk deăng xúa khoa hok kih thuât ƀă hên ki ê kơxô̆ rơpŏng kơtiê hiăng chu kơdroh hên ối pá xôp 20%. Tung pơlê pơxiâm ai hên mâu túa pơkâ pêt kế tơmeăm tê châ liăn lối hrĭng tung môi hơnăm.

Ki rơhêng vâ tối, vâ pêi pro tro hnoăng cheăng pơkuâ ngăn thôn pơlê, rak vế tơniăn gâk kring ƀă tơ’lêi hlâu tung tơdroăng hnê tối, mơhnhôk kuăn pơlê pêi pro tro mâu troăng hơlâ pơkâ dêi Đảng, luât dêi tơnêi têa, pôa Liêng Jrang Ha Tương ối pơkâ thế mâu đảng viên tung chi ƀô̆, Khu Kuăn pơlê kơchuâ lơgât pơlê, mơhno nhên hên tơdroăng ki kal ‘na mâu kế tơmeăm bro ki kal pơxúa tung pơlê pơla, troăng prôk, hngêi hôp tơdjuôm pơlê pơla, tíu khôp ƀă tíu bro hngêi ối dêi rêm rơpŏng.

Lơgât kố châ kơtúa lĕm a hngêi mơhno túa lĕm tro pơlê vâ rêm rôh kuăn pơlê, tơmối troh tơkŭm hôp, hriâm tâp vâ tơ’lêi châ hlo, tăng ‘nâi. Tơdrêng amê, xuân cho tơdroăng vâ pơkuâ ngăn tơ’lêi hlâu ‘na pơ’leăng mâ kuăn pơlê, kơxô̆ ngế rêh ối khât, ối pơtân, hơ’lêh lăm ối, pơhlêh lăm ngi ê ƀă hên tơdroăng ki ê chiâng túa pơkâ nếo pơkuâ ngăn thôn, pơlê dế châ po rơdâ a cheăm Dă Mrông tối krê ƀă tơring Dam Rông tối tơdjuôm.

Tiô pôa Nguyễn Hoàng Mai, kăn pơkuâ ngăn Đảng, kăn hnê ngăn Vi ƀan cheăm Dă Mrông, pôa Liêng Jrang Ha Tương cho môi ngế ki châi loi ƀă cho ngế đảng viên ki djâ troăng ahdrối. Ƀă hnoăng cheăng kăn pơkuâ chi ƀô̆ thôn, pôa hiăng veăng kum kơhnâ khât tung hnoăng cheăng mơjiâng Đảng, mơjiâng khu kăn pơkuâ, mơhnhôk kuăn pơlê kơhnâ veăng mơnhông cheăng kâ rêh ối pơlê pơla, kơdroh kơtiê krá tơniăn ƀă tơdjuôm ivá mơjiâng thôn pơlê nếo, cho ngế ki djâ troăng ahdrối kơhnâ vâ mâu đảng viên hơnăm ối nếo pêi tiô ƀối.

 “Dà Teh nôkố cho thôn ai hên tơdroăng ki hiăng hơ’lêh tơƀrê. Ƀă tung kơbong hngêi hôp tơdjuôm dêi thôn xuân hiăng ăm bro mâu túa pêi dêi Chi ƀô̆, khu ngăn kuăn pơlê thôn, dêi mâu chi hô̆i khu râ vâ tơmâng xo mâu tơdroăng cheăng pêi dêi mâu kơ koan kố, rêm khế, rêm hneăng ai mơnhên tối tơdrêng a tíu chêh tơbeăng mê vâ ai tơdroăng ki pơchông vâ mơeăm. Chiâng vâ tối tiah kố, ƀă hnoăng cheăng cho kăn pơkuâ Chi ƀô̆ thôn dêi pôa Liêng Jrang Ha Tương hiăng mơhno hên tơdroăng ki pêi pro klêi kơhnâ, châ Đảng, Khu kăn pơkuâ Vi ƀan hnê ngăn cheăm ai hên rơkong kơdeăn khĕn, mơhnhôk ƀă rơhêng vâ tiah kố tung la ngiâ ah pôa Tương pơtối mơdêk mâu tơdroăng ki pêi pro ƀlêi chiâng kố vâ ăm chi ƀô̆ Dă Teh rế hía rế mơnhông tơƀrê. Chiâng môi chi ƀô̆ ki djâ troăng ahdrối dêi Dà Mrông, ƀă ai hên cheăm ki ê athế hriâm ƀối ƀă pêi tiô.

Xua ing tơdroăng ki kơhnâ, đi đo djâ troăng ahdrối tung pêi pro mâu tơdroăng tơ’noăng xua cheăm tơbleăng, djâ troăng ahdrối vâ đảng viên hơnăm ối nếo ƀă khu kuăn pơlê tung cheăm pêi tiô ƀối, đảng viên Liêng Jrang Ha Tương, Kăn pơkuâ Chi ƀô̆ ƀuôn Dă Teh chiâng ngế ki djâ troăng ahdrối kơhnâ dêi pơlê cheăm, châ xo hên ƀăng khĕn kơdeăn dêi tơring Dam Rông, kong pơlê Lam Đồng.