VOV4.Sêdang - Hngêi phâk Sơn La (ối a bêng Tô Hiệu, pơlê kong kơdrâm Sơn La, kong pơlê Sơn La) cho tíu tơbâ Tơnêi têa ki tơviah, rêm hơnăm tơdah vâ chê 300 rơpâu ngế tơmối lo ing mâu kong pơlê, pơlê kong kân tung lâp tơnêi ƀă kong têa ê troh lăm pôu ngăn, hriăn plĕng, tăng ‘nâi tơdroăng ton nah. Hngêi phâk Sơn La châ khu xâ Pơhlăng mơjiâng pro a hơnăm 1908. Tíu kố hiăng kroăng phâk 1.017 ngế kŏng san, cho hngêi trung hriâm kăch măng, tíu ki hnê mâu ngế ki kal dêi kăch măng Việt Nam.

Tíu xôi tơbâ Hngêi phâk Sơn La

Kố cho môi tung mâu tíu troh pôu ngăn ton nah ai pơxúa ƀă cho “tíu ki kal” vâ hnê tối, hnê hriâm tiô khôi hmâ kăch măng ăm rơxông hơnăm ối nếo tơ’nôm loi nhuô̆m, hâk tơngăm ‘na tơdroăng pâ nhuô̆m ƀă tăng ‘măn tơ’nôm mâu hlá mơ-éa, kế tơmeăm ki ai tơdjâk, Hngêi phâk Sơn La đi đo mơ-eăm mơdêk ki kơnía dêi tíu xôi tơbâ ton nah tung hnoăng cheăng hnê hriâm khôi hmâ kăch măng ăm rơxông hơnăm ối nếo ƀă tơmối troh pôu ngăn.

Katarina Nga tơplôu ƀă tơbleăng