VOV4.Xơ Đăng - A Hà Nội, kăn teăng mâ Chile a Việt nam hiăng tơkŭm po leh tơbâ 50 hơnăm hâi mơjiâng tơrŭm cheăng tơpui kâ Việt Nam – Chile cho kong têa tê mơdró kâ má 4 dêi Việt Nam a kơpong châu Mih Latinh ƀă Việt Nam cho kong têa kân má môi dêi Chile tung khu ASEAN, ƀă kơxô̆ liăn pêi lo ing tê mơdró tung khế 10 hơnăm kố châ a kơlo 1,6 rơtal dollars.

A rôh leh, pôa Nguyễn Quốc Dũng, ngế xiâm phŏ ngăn tơpui kâ hiăng hvái ngăn rôh tơrŭm cheăng tung 50 hơnăm hdrối nah; tơdrêng amê hnối ăm ‘nâi kơxô̆ liăn pêi lo ing tê mơdró pơla péa pâ 9 khế apoăng hơnăm 2021 hiăng vâ châ 1,470 rơtal dollars (tâk 59% tâng vâ pơchông ƀă khế kố hơnăm 2020). Việt Nam prếi Chile pơtối tơrŭm krá ƀă tŏng kum dêi rơpó vâ hbrâ mơdât ƀă pơreăng kân, mơhno tối tơdroăng ki tơrŭm tơroâ pơla kuăn pơlê péa tơnêi têa.

Katarina Nga tơplôu ƀă tơbleăng