VOV4.Xơ Đăng - Kơmăng lơ 19/11, leh tơbâ mâu kuăn pơlê ki hlâ tung pơla ai pơreăng kân COVID-19 po a tíu ki mơ’no xiâm cho Hô̆i trường Thống Nhất, Pơlê kong kân Hồ Chí Minh ƀă Công viên Thống Nhất, Pơlê kong kân Hà Nội. A tíu ki mơ’no xiâm a Hô̆i trường Thống Nhất, Pơlê kong kân Hồ Chí Minh, mâu kăn Đảng, Tơnêi têa ai mâ tung rôh leh tơbâ chôu nhang, pleăng reăng tơbâ mâu nhŏng o, kuăn pơlê, kuăn pơlê Việt Nam a kong têa ê, mâu lêng tung lâp tơnêi têa hlâ xua COVID-19.

Tơbâ mâu ngế ki hlâ hía, hnê pơchân mâu ngế ki ối rêh kơdo mơ-eăm

Teăng mâ Đảng ƀă Tơnêi têa, pôa Đỗ Văn Chiến, kăn pơkuâ tíu xiâm Đảng, kăn hnê ngăn Vi ƀan xiâm Măt trâ̆n Tơnêi têa Việt Nam tối tơdroăng ki pâ nhuô̆m ó khât, hơlêm tơdroăng ki sĭng khéa troh ƀă rơpŏng hngêi ki ai ngế hlâ tung pơla ai pơreăng kân COVID-19. Pôa Chiến tối nhên, xua pơreăng tâ tú rơ-iô, mê maluâ hiăng mơ-eăm, la ai hên ngế tá hâi châ tơkŭm ‘mé tơniăn tiô khôi túa tơlá.

Túa leh kơ'nêi on trĭng a têa vâ koh tơbâ mơngế hlâ hía xua pơreăng COVID-19

Troh hâi lơ 19/11, lâp tơnêi têa ai lối 23 rơpâu ngế hlâ xua COVID-19, tung mê pơlê kong kân Hồ Chí Minh lối 74% ƀă lối 17 rơpâu ngế hía. Pơreăng kân COVID-19 hiăng pro hía hên tơdroăng, pro chiâng ai mâu tơdroăng ki châi heăng. Tơbâ mâu ngế ki hlâ lêk xuân cho rơkong hnê pơchân rêm ngế pin ‘na tơdroăng ki rơ-iô dêi pơreăng. Nôkố, tơdroăng ki tơplâ ƀă COVID-19 xuân pơtối tâ tú rơ-iô, pin athế khên tơnôu tâ hdrối, pôi tá chiâng tơngôu.

Katarina Nga tơplôu ƀă tơbleăng