VOV4.Xơ Đăng - Ai 76 to kế tơmeăm, troăng hơlâ ki kơhnâ rơkê hiăng châ ôu eăng tung inâi Hlá mơéa trĭng Rơkê plĕng Việt Nam hơnăm 2021. Leh tơbleăng châ po a kơxê lơ 25/11, a Hà Nội, xua Tíu xiâm Măt trâ̆n Tơnêi têa Việt Nam tơrŭm ƀă Khu ngăn ‘na khoa hok ƀă Kong ngê̆ ƀă Khu tơrŭm mâu Khu ngăn ‘na Khoa hok ƀă Kih thuâ̆t Việt Nam tơkŭm po. 76 to kế tơmeăm, troăng hơlâ ki kơhnâ rơkê ki châ ôu eăng tung Hlá mơéa trĭng Rơkê plĕng Việt Nam hơnăm kố châ rah xo sap ing 151 to kế tơmeăm, troăng hơlâ ki rơkê plĕng khoa hok – kong ngê̆ xua mâu khu xiâm, kơvâ cheăng, kong pơlê, pơlê kong kân tbleăng.

Ki rơhêng vâ tối cho Hlá mơéa trĭng Rơkê plĕng Việt Nam hơnăm 2021 hiăng ô eăng 6 to kế tơmeăm ki tơmiât rơkê khoa hok ối tung kơvâ cho ‘na pơlê pơla – hlê plĕng. Malối, tung mâu kế tơmeăm ki châ ô eăng ai mâu tơdroăng ki tơmiât rơkê sap ing mâu ngế ki pêi cheăng, mơjiâng pro kế tơmeăm vâ mơdêk ki dâi lĕm, tơƀrê, veang kum mơnhông cheăng kâ rêh ối pơlê pơla, rak tơniăn pơlê pơla cheăm bêng, gâk kring, rak vế kong prâi tơnêi tíu kong kế nhâ loăng.

Katarina nga tơplôu ƀă tơbleăng