VOV4.Sêdang - Kơxo lơ 31/8, a Hà Nội, Ƀơrô cheăng kăn xiâm hnê ngăn tơnêi têa tơkŭm po hôp tơbleăng pơkâ kơ’nêi hdrối tâ hâi khế pơkâ hơnăm 2021 dêi kăn xiâm hnê ngăn tơnêi têa ăm mâu ngế ki kroăng phak dế phak ƀă mâu ngế ki tro kroăng phak dế châ pơtê, pơkâ thế pơtê pêi pro kroăng phak ai tŭm tơdroăng ki châ mốn hdrối hâi khế tiô pơkâ dêi luât. Hơnăm kố, kăn xiâm hnê ngăn tơnêi têa hiăng kĭ pơkâ kơ’nêi lo hdrối hâi khế pơkâ ăm 3 rơpâu 026 ngế ki kroăng phak dế pêi pro hnoăng ki tro kroăng phak ƀă 3 ngế dế châ pơkâ thế pơtê pơtân pêi pro tơdroăng ki kroăng phak, 6 ngế dế châ pơtê pêi pro kroăng phâk, ai tŭm tơdroăng châ kơ’nêi hdrối hâi khế pơkâ hơnăm 2021.

Tơpui ƀă tơbleăng pơkâ kơ’nêi hdrối hâi khế pơkâ hơnăm 2021, pôa Phạm Thanh Hà, kăn phŏ hnê ngăn ƀơrô cheăng kăn xiâm hnê ngăn tơnêi têa ăm ‘nâi tung pơla séa ngăn vâ kơ’nêi ăm lo hdrối hâi khế pơkâ pơrá athế pêi pro tiô mâu tơdroăng pơkâ, mê cho athế châ pêi pro rak tơniăn kơtăng, krá tơniăn, tơdrăng, tơniăn, tro ngế ƀă tro tơdroăng tiô pơkâ ƀă tâi tâng mâu ngế ki kroăng phak ai tŭm tơdroăng châ séa ngăn ƀă ôh tá ăm ngế kroăng phak ki lâi ôh tá ai tŭm tơdroăng tiô pơkâ châ séa ngăn kơ’nêi ăm lo hdrối hâi khế pơkâ.

Katarina Nga tơplôu ƀă tơbleăng