VOV4.Sêdang - Tơdroăng “Hyôh internet ƀă kơmăi tĭnh ăm o” xua Chin phuh tơbleăng hiăng ƀă dế tơbleăng kơhnâ a kong pơlê Dak Lak ƀă tơdroăng ki veăng dêi hên khu râ, kơvâ cheăng ƀă khu mơdró kâ, khu ki ai hiâm mơno hơ-ui. Klêi kơ’nâi môi khế tơbleăng, tơdroăng kố hiăng veăng kum châ hên kơxô̆ liăn ƀă kơmăi tĭnh kơnâ lối 5 rơtal liăn. Ing mê veăng kum ăm hên rơpŏng ki ai tơdroăng rêh ối xơpá a kơpong hngế hngo châ xúa kơmăi, troăng hyôh internet ăm kuăn ‘nĕng hriâm tung pơla ai pơreăng COVID-19 a kong pơlê ki dế tâ tú rơ-iêo.

Ối tơkôm pro mơ-éa tơdah sim data tê kơtê dêi hngêi măng internet Vinaphone xua VNPT tơring Čư Mgar tŏng kum a hngêi trung dêi kuăn kơdrâi, ngoh Y Rít Kƀuôr, môi rơpŏng ai tơdroăng rêh ối pá puât a ƀuôn Sút Mđưng, cheăm Čư Suê tối ăm ‘nâi, tơdroăng ki mơ-eăm kố ai pơxúa. Rơpŏng ngoh ai péa ngế kuăn dế hriâm râ má môi ƀă râ má péa, pơrá hriâm mơ’no tơdrêng tung um tiô troăng măng internet xua pơreăng COVID-19 xông tâ tú ó. Rơpŏng ngoh ôh tá ai liăn vâ tơdjêp troăng măng internet, tâng nâp liăn phôn vâ po 3G, 4G ăm mâu kuăn hriâm mơ’no tơdrêng tung um tiô troăng măng internet mê cho tâi liăn hên, cho pá ƀă rơpŏng kơtiê môi tiah ngoh. Ƀă sim tê kơtê kơtâu têi châ tŏng kum, tơdroăng tô tuăn ‘na măng hôm têi lơ ôh ăm kuăn hriâm mơ’no tơdrêng tung um tiô troăng măng ineternet dêi rơpŏng ngoh hiăng châ tŏng kum:

“Ngế kân hriâm lâm 7, ngế kŭn hriâm lâm 1. Ai ngế hriâm peăng kơxo, ai ngế hriâm peăng kơxê. Xuân hriâm ing phôn râng kŏng tê, á thế mơ-eăm tê. Mơnê VNPT hiăng tŏng kum, tŏng kum vâi krâ a kơpong hơngế hơngo, vâ kuăn ‘nĕng châ hriâm online’’.

Hngêi măng internet troh rêm hngêi trung hriâm tŏng kum sim data tê kơtê

Jâ Nguyễn Thị Bích Ngọc, Cô pơkuâ hngêi trung râ má môi Lê Thị Hồng Gấm, cheăm Čư Sê, tơring Čư Mgar tối ăm ‘nâi, ƀă ki phá tơ-ê a kơpong hơngế hơngo, kơpong hdroâng kuăn ngo, hên rơpŏng trâm hên pá puât ƀă troăng măng ăm kuăn hriâm mơ’no tơdrêng tung um tiô troăng măng Internet.

Tơdrêng amê, tơdroăng pơreăng tung tơring ối xông tâ tú ó, tơdroăng hriâm mơ’no tơdrêng tung um tiô troăng măng internet mơni kô ối ton. Tơdroăng tŏng kum sim data tê kơtê dêi mâu hngêi măng internet môi tiah VNPT, Viettel ăm nôu pâ hok tro ƀă thái cô hiăng kum hên ăm tơdroăng hnê ƀă hriâm dêi hngêi trung:

“Kố cho tơdroăng tŏng kum ki phá tơ-ê, xua tâi tâng mâu vâi o hok tro trâm pá, măng internet vâ hriâm ôh tá tơniăn. Xua mê tơdroăng tŏng kum kố cho tơtro ăm mâu vâi o tung tơdroăng hriâm mơ’no tơdrêng tung um tiô troăng măng internet, mê xuân pro tơ’lêi hlâu ăm nôu pâ hok tro, xua nôu pâ hok tro a kố pá puât’’.

Cho môi tung mâu khu tê mơdró ối má môi tung pêi pro tơdroăng “hyôh măng internet ƀă kơmăi tĭnh ăm o’’ tung tơring, pôa Trịnh Văn Dũng, kăn phŏ pơkuâ tê mơdró VNPT Dak Lak tối ăm ‘nâi, ing Khu pơkuâ hnê hriâm ƀă hnê mơjiâng tuăn ngôa rơkê, tíu cheăng hiăng tŏng kum liăn ƀă tơmeăm lối 1 rơtal liăn.

Rơtế amê, tíu cheăng hiăng tơ’nôm mâu  trăng hrik mơ’no hyôh măng vâ tơniăn hyôh măng ăm vâi hdrêng a kơpong hơngế, hơngo hriâm tiô troăng măng internet. Tơdrêng amê, a mâu tíu tê mơdró troăng măng internet râ tơring xuân tơkŭm tŏng kum sim data, tŏng kum liăn măng tê kơtê tiô tơdroăng nôkố:

“Pơreăng COVID-19 dế xông tâ tú ó môi tiah nôkố mê tâi tâng mâu hngêi trung tung kong pơlê tá hâi hriâm tơkŭm. Mâu vâi o hok tro xuân thế hriâm online ƀă tung kơxô̆ mê ai hên rơpŏng mâu vâi o trâm pá, ôh tá ai tơmeăm khoăng, ôh tá ai măng internet vâ hriâm. Ing tơdroăng mê, ing Khu pơkuâ hnê hriâm ƀă hnê mơjiâng tuăn ngôa rơkê, VNPT hiăng tơkŭm po kơxô̆ liăn tŏng kum rôe kơmăi tĭnh ƀảng ƀă sim data, kơxô̆ liăn kố  kơnâ 1 rơtal liăn’’.

Lối 400.000 ngế hok tro a Dak Lak xuân dế hriâm mơ’no tơdrêng tung um tiô troăng măng internet

Tiô xêo ngăn dêi Khu pơkuâ hnê hriâm ƀă mơjiâng tuăn ngôa rơkê kong pơlê Dak Lak, klêi kơ’nâi môi khế tơdế pêi pro tơdroăng ‘’hyôh măng internet ƀă kơmăi vi tĭnh ăm o’’, troh nôkố lâp kong pơlê hiăng tơdah tơdroăng tŏng kum liăn ƀă kế tơmeăm kơnâ lối 5 rơtal liăn. Tung mê, krê kăn ƀô̆, mơngế pêi cheăng tung kŏng đoân kơvâ hiăng veăng tơlo châ kơxô̆ liăn dâng 4 rơtal liăn ăm kơxô̆ liăn ‘’kơmăi tĭnh ăm o’’. Kơxô̆ liăn ki ê xua mâu khu tê mơdró, mâu ngế ai hiâm mơno lĕm tŏng kum.

Pôa Đỗ Tường Hiệp, Kăn phŏ pơkuâ Khu pơkuâ hnê hriâm ƀă hnê mơjiâng tuăn ngôa rơkê kong pơlê Dak Lak tối ăm ‘nâi, kơxô̆ liăn ƀă tơmeăm hiăng veăng tơlo kô châ pơtroh a mâu kơbong hnê hriâm. Ngăn tiô tơdroăng nôkố, mâu ƀơrô kô rôe tơmeăm ăm mâu hok tro ai tơdroăng rêh ối pá puât ối tung rơpŏng kơtiê, rơpŏng vâ chê kơtiê, hok tro pá puât xua tơdjâk dêi pơreăng COVID-19. Nôkố tơdroăng xuân pơtối mơhnhôk veăng tơlo vâ mơhnhôk tâi tâng pơlê pơla veăng:

‘’Vi ƀan kong pơlê hiăng hnê mơhno Khu pơkuâ hnê hriâm ƀă hnê mơjiâng tuăn ngôa rơkê veăng tơbleăng pơkâ pêi vâ mơhnhôk tâi tâng pơlê pơla, mâu kơ koan tung khu cheăng kal kí xuân môi tiah kuăn pơlê tung kong pơlê veăng môi tuăn, veăng tơlo ăm kơvâ hnê hriâm, ăm mâu hok tro pá puât, cho mâu hok tro kơtiê, hok tro tro tơdjâk xua pơreăng kân COVID-19 châ ai kơmăi tĭnh, tơmeăm hriâm tâp tơdrêng mơ’no tung um tiô troăng măng internet tơtro má môi, tơniăn tơdroăng pơtê troh hngêi trung laga ôh tá pơtê tơdroăng hriâm tâp’’.

Lâp kong pơlê Dak Lak nôkố ai lối 400.000 ngế hok tro mâu râ hriâm, xua tơdroăng pơreăng COVID-19 xông tâ tú ó, hok tro lâp kong pơlê dế thế hriâm mơ’no tơdrêng tung um tiô troăng măng internet. Laga, tiô xêo dêi kơvâ hnê hriâm, ai troh 67.000 hok tro ôh tá ai phôn, kơmăi vi tĭnh, troăng kơxái măng internet vâ hriâm mơ’no tơdrêng tung um, mâu ngế ki kố tâi tâng cho ối tung mâu rơpŏng kơtiê, vâ chê kơtiê a kơpong hơngế, hơngo.

Tơdroăng tŏng kum dêi mâu khu râ, mâu kơvâ cheăng ƀă mâu khu tê mơdró, mâu ngế ai hiâm mơno lĕm tŏng kum ing tơdroăng ‘’hyôh măng internet ƀă kơmăi vi tĭnh ăm o” dế djâ tơdroăng ki phiu ro ăm hên hok tro a kơpong hơngế hơngo, kum ăm tơdroăng hnê ƀă hriâm châ tơ’lêi hlâu.

Công Bắc chêh

A Sa Ly tơplôu ƀă tơbleăng