VOV4.Sêdang - Tiô xêo dêi kơvâ pêi chiâk deăng, kong pơlê Dak Lak nôkố ai troh 62 long, rơchôa, hno têa tro tơ’nhê kal châ mơ’no liăn rơnêu. Drêng ai tơdroăng kố, a rơnó mêi têa kân lân lu, mâu tíu cheăng, cheăm, tơring a kong pơlê Dak Lak dế mơnhông pêi 4 tơdrêng vâ tơniăn ăm mâu long, rơchôa, hno têa [a\ kơpong pá xôp.

Sap ing apoăng khế 9 troh nôkố, long rơchoâ têa Ea Drăng, a pơlêkân Ea Drăng, tơring Ea Hleo, kong pơlê Dak Lak, pơtối mơ’têa vâ hiăng vâ troh rôh kong mê têa lân lu. Pôa Nguyễn Văn Hiếu, kăn pơkuâ Kŏng ti pêi cheăng tiô rơnó môi tung khu rak ngăn long têa Dak Lak a tơring Ea Hleo, ăm ‘nâi, xua ing rôh ki têa plêng plế kơpong veăng hdroh a hơnăm 2013 troăng ki mơ’no têa kŭn, mê mot tung rơnó mê hngê, tíu pêi cheăng kố thế klâ xoăng ngế gâk plâ hâi plâ măng a tíu ki kố vâ mơ’no têa, rak tơniăn ăm tíu kuăn pơlê rêh ối a pơlê kân Ea Drăng.

Troăng têa hiu chiâng ối kŭn, long Ea Drăng chiâng mơ’no têa rĕng tâ xua hiăng vâ ai têa lân lu

 ‘Na rơchoâ, long têa kố mê ƀăng tơnêi gá troh 58,6 km mê têa chiâng ‘măn bu 1,217 rơtuh khô̆i, mê ngăn tung tơdroăng ki tối pơtâng ‘na hyôh kong prâi mê tíu pêi cheăng kô mơ’no têa tiah lâi ăm tơtro. Nôkố tâng mơ’no dâng 30 – 40 met karê tung môi giây gá hiăng plêng plế a  mâu kơdrum kơchâi dêi kuăn pơlê, mê cho tiô tơdroăng ki ai khât môi tiah mê mê tíu pêi cheăng đi đo athế pro kơdroh kơlo têa chu ối iâ vâ pro tíu, tơkŭm xo têa kong mê ing mâu tíu troh, ví tơdroăng ki tơdjâk troh kuăn pơlê”.

Séa ngăn tơdroăng ôh tá tơniăn dêi kong prâi, xing xoăng mâu ngế gâk a mâu rơchoâ long ki ôh tá krá, ƀă túa pơkâ 4 tơdrêng, mâu tơring cheăm, mâu tíu pêi cheăng rak ngăn rơchoâ long têa a kong pơlê Dak Lak dế hbrâ rơnáu pêi pro mâu túa pơkâ rơchoâ long têa tung rơnó mê hngê.

Rơtêa ƀuôn Pu Huê ôh tá ai têa plêng plế, têa kô plêng plế a troăng ki lăm tung cheăm Ea Ktur – Čư̆ Wi drêng ai têa kong mê.

Pôa Trịnh Văn Quang, rak ngăn rơchoâ long têa ƀuôn Pu Huê, ăm ‘nâi, rơchoâ kơdât têa dêi rơchoâ long têa châ tơrŭm pro ƀă long rơchoâ ối a troăng mot tung cheăm Ea Ktur, Čư̆ Wi, Ea Hu dêi tơring Čư̆ Kuin, la ôh tá kơchuâ chêh ki plêng plế mơ’no têa. Tơdroăng kố pro long têa ƀuôn Pu Huê đi đo trâm tơdroăng ki ôh tá tơniăn drêng ai kong mê têa kân lân lu:

Rơchoâ têa tro tơ’nhiê ó, rơchoâ têa Phù Mỹ (tơring Ea Hleo) ôh tá chiâng vâ ‘măn têa

Tơdroăng pơkâ dêi klŏng têa ƀă tơdroăng ki mơ’no têa ki kố mê ôh tá rak tơniăn ăm tơdroăng ki mơ’no têa, mê têa oh tá kâi châ mơ’no tâi pơklât thế tơkâ luâ troăng kô pro ôh tá tơniăn ăm rơchoâ têa, malối cho tơniăn ăm kuăn mơngế ki prôk lăm a troăng ki kố. Mê mot tung rơnó mê hngê ngin pêi pro kơtăng tiô túa pơkâ ki hiăng kĭ, drêng lâi ai tơbleăng kong mê têa lân lu mê athế pơtroh mâu ngế ki gâk a péa to ko troăng ƀă mơ’no têa, tâng ai tơdroăng klâi ‘lo mê athế rak tơniăn tro má môi. Xuân rơhêng vâ tung la ngiâ ah rêm râ kơvâ cheăng séa ngă, hriăn plĕng vâ ai troăng hơlâ ‘mâi rơnêu ‘no liăn cheăng rak tơniăn ăm rơchoâ long têa kố xuân môi tiah tơdroăng tơniăn ăm troăng prôk lăm tung cheăm kố.

Tiô tối tơbleăng dêi Khu ngăn chiâk deăng ƀă mơnhông thôn pơlê, kong pơlê Dak Lak, lâp kong pơlê nôkố ai 785 to rơchoâ long, kum ăm tơdroăng ki tôh ăm lối 262 rơpâu ha hdrê loăng pêt tŭm túa (tơ’mô dâng 82% ƀăng tơnêi hdrê loăng kal châ tôh têa).

Mâu nhâ huăn a long têa Ea Msen (tơring Čư̆ Kuin), mơni kô ôh tá tơniăn drêng kong mê têa lân lu.

Vâ rak tơniăn hdrối kong mê khía mot, têa lân lu kong pơlê hiăng séa ngăn, rĕng ‘mâi rơnêu 18 to long têa ki kal, ki hiăng ôh tá krá mơni kô trâm tơdroăng xía vâ. Laga, nôkố kong pơlê 62 to long têa ki hiăng tơ’nhiê kal ‘mâi rơnêu ƀă tâi tâng kơxô̆ liăn ‘no lối 360 rơtal liăn:

Tiô pôa Nguyễn Thành Long, kăn ngăn rơchoâ long têa Dak Lak, xua kơxô̆ liăn ‘no ăm kong pơlê iâ, tơdroăng ki ‘mâi rơnêu long têa ki hên pơrá athế pâ tơnêi têa tŏng kum, mê troăng hơlâ xiâm vâ rak tơniăn ăm rơchoâlong têa tung rơnó mê hngê xuân cho mơdêk túa pơkâ 4 tơdrêng, hbrâ rơnáu sap ing cheăm, tơring:

Ƀă mâu tíu pêi cheăng mơjiâng pro mê athế hbrâ rơnáu xing xoăng kơxô̆ liăn ki pơtân, malối cho mâu tíu ki tơ’nhiê mơni kô ôh tá tơniăn cho athế ‘mâi rơnêu tơdrêng. Má péa cho mot tung rơnó mê hngê mê athế xing xoăng ngế gâk plâ hâi plâ măng, tâng m’no têa mê athế tơbleăng hdrối ăm kuăn pơlê ‘nâi. Pakĭng mê athế đi đo séa ngăn ki tơniăn dêi long rơchoâ, tối tơbleăng ăm khu kăn pơkuâ tơring cheăm xuân môi tiah Khu ngăn chiâk deăng ƀă mơnhông thôn pơlê vâ ai troăng ‘mâi rơnêu.

Minh Huệ chêh

Katarina Nga tơplôu ƀă tơbleăng