Tơtêk tung pêi lo kế tơmeăm 9 khế kố nah dêi Dak Lak châ 8.22%, iâ tâ tơdroăng pơcháu; vâ châ pơkâ tơtêk sap ing 10% tơngi klêng tung hơnăm kố, 3 khế mơ’nui hơnăm kong pơlê kal tơtêk lối 13%. Dak Lak dế tơkŭm tah lôi mâu tơdroăng pá puât 'na mơ'no liăn cheăng tơnêi têa, tơnêi tơníu, pro hnoăng mơhá, tơdrêng amê mơdêk mâu kơxô̆ liăn hiăng mơhnhôk rĕng pêi cheăng, tê mơdró.  9 khế hơnăm 2026, kong pơlê Dak Lak hiăng tơkŭm tah lôi mâu tơdroăng pá puât 'na luât pơkâ, tơnêi tơníu, tăng tơnêi ƀă mơ'no liăn cheăng tiô pơkâ "6 nhên".

Tơtêk ‘na pêi lo kế tơmeăm tung 9 khế dêi kong pơlê châ 8.22%; kơxô̆ liăn châ xo ing tê tơmeăm tê ngi kong têa ê châ lối 2.3 rơtal dollars; ôm hyô mơdêk tơdah dâng 8.34 rơtuh rôh ngế tơmối. Vâ pêi châ tơdroăng pơkâ mơdêk 2 kơxô̆, 3 khế mơ’nui hơnăm Dak Lak kal mơ-eăm mơdêk châ lối 13%. Pôa Đỗ Hữu Huy, Kăn hnê ngăn Vi ƀan kong pơlê Dak Lak tối ăm 'nâi, tung 3 khế mơ'nui hơnăm, kong pơlê kal xo hnoăng liăn ngân 7.254 rơtal liăn ƀă mơ'no 8.702 rơtal liăn kơxô̆ liăn 'no mơjiâng tơmeăm khoăng tơnêi têa. Tơdrêng amê, pơkâ thế 3 khế mơ’nui hơnăm athế hơ'lêh rơdêi túa pơkuâ, ôh tá xê to tơkŭm pê klêi mâu tơdroăng pơkâ mê thế mơjiâng tơmeăm ƀă ki pơxúa khât.