Rơnó tô khăng khoăng 2025 – 2026, lâp Quân khu 5 ti tăng, tơkŭm a môi tíu 481 kơxêng kiâ mô đô̆i. Tung hneăng má 1 dêi tơdroăng pêi cheăng, sap hâi lơ 15/3 troh lơ 1/11/2026, mâu khu ki chiâ rôu xo tơkŭm môi tíu 390 kơxêng kiâ mô đô̆i tung tơnêi têa, 6 kơxêng kiâ mô đô̆i a kong têa Lếo ƀă 35 kơxêng kiâ a kong têa Kul. Quân khu 5 mơ-eăm ti tăng, chiâ rôu xo tơkŭm môi tíu vâ chê 1.000 kơxêng kiâ mô đô̆i, kêi đeăng mơjiâng ‘noăng chư chêh ‘na mô đô̆i hlâ tung tơplâ xâ, tơnâp kiâ mô đô̆i.

Quân khu pơtối tơrŭm ƀă kơ koan cheăng 3 kong pơlê Nam Lào ƀă 4 kong pơlê dêi kong têa Kul mơnhên tối tơdroăng, tơkŭm po ti tăng, mơ-eăm chiâ rôu xo tơkŭm lối 100 kơxêng kiâ mô đô̆i a péa kong têa pú hmâ tung rơnó tô hơnăm 2026 – 2027. Hơnăm 2027, Quân khu châ pơkâ kêi đeăng mơgêi tung pơlê, pro lơgât ti tăng, chiâ rôu xo tơkŭm môi tíu rôh 2 ƀă xo mâuh sinh phẩm dêi 100% nhŏng o mô đô̆i ki hlâ tung tơplâ xâ tá hâi tŭm tơdroăng tíu ối tung pơlê.