Tiô Khu pơkuâ ngăn lêng cheăm Đặng Thùy Trâm, kăn ƀô̆, mố đô̆i ƀă kăn teăng mâ pơkuâ kong pơlê tơkŭm tăng rôu a kơpong Hngêi pơkeăng Đức Phổ châ hlo tơ’nôm 2 to kơxêng kiâ mố đô̆i rơtế ƀă hên tơmeăm ki ê. Mâu tơmeăm ki tăng hlo mê cho chế pơraxut, kơxái kơxu, ếo, on kơđĕng ƀă hơkê. Mâu kơxêng kiâ mố đô̆i hiăng châ pơcháu ăm Ƀơrô cheăng Túa lĕm tro – Pơlê pơla cheăm Đặng Thùy Trâm rak ngăn tiô pơkâ.

Lối 6 khế pêi pro “Cheăng pêi thâ 500 hâi măng mơdêk rơdêi tăng rôu, tơkŭm ƀă mơnhên inâi kơxêng kiâ mố đô̆i”, kong pơlê Quảng Ngãi hiăng klêi tơdroăng ki tơdah xo túa ƀă 13.514 tơnâp kiâ mố đô̆i tá hâi ‘nâi inâi, rĕng tâ túa pơcháu dêi kong pơlê 45 hâi ƀă túa pơcháu dêi Tơnêi têa 5 khế. Tơdrêng amê hlối tơdah xo châ 4.929 túa ADN nhŏng o mố đô̆i, châ lối 80%.