Dak Lak nôkố ai 104 mơ-éa phêp tăng xo tơmeăm tung têa, kơdâm tơnêi ối xêt khât, tung mê ai 12 mơ-éa phêp tăng xo gum tơdrêng mâu tơdroăng tơkêa bro mơ’no liăn cheăng tơnêi têa, 14 hlá mơ-éa phêp ƀă mơnhên xo tơvêh tơmeăm tung kơdâm tơnêi tung kơpong mâu tơdroăng tơkêa bro mơjiâng, ƀă tâi tâng kơxô̆ tơmeăm châ phêp tăng xo lối 8,2 rơtuh met khô̆i.

Krê rơnó IV tung hơnăm 2026, tơdroăng kal vâ dêi 44 tơmeăm, tơdroăng tơkêa bro ƀă kong pơlê dâng 690.000 met khô̆i. Ki hên tơdroăng tơkêa bro hiăng mơnhên châ tíu vâ pơtroh, laga mâu khu pơkuâ xuân tối ôh tá tŭm hmốu, hmốu ki ku kŭn, yă tơmeăm mơjiâng pro hngêi trăng tung kơchơ mơdró tâk hên. Pôa Đỗ Hữu Huy, Kăn hnê ngăn Vi ƀan kong pơlê Dak Lak tối, tơdroăng kố cho xua mâu tíu tăng chiâ xo tá hâi chiâng vâ ăm xúa xua ối trâm pá mơ-éa tơnêi tơníu, kong prâi; kơxô̆ ki vâ pơtroh a mâu tíu chiâ xo tơmeăm tung kơdâm tơnêi ôh tá châ tiô pơkâ.

Kăn hnê ngăn Vi ƀan kong pơlê Dak Lak pơkâ séa ngăn tâi tâng tơdroăng chiâ xo, tê mơdró ing khu tê mơdró ối tung dế troh pơto tơmeăm. ‘Noăng chư chêh ‘na kơxô̆ tơmeăm, hoă đơn điê̆n tưh, hnoăng cheăng hnoăng mơhá ƀă tơdroăng pơto thế châ tơdjêp, pơchông ngăn; xúa kŏng ngê̆ kơxô̆, tuăn ngôa rơkê ƀă um méa vê̆ tinh vâ châ hlo tơdroăng ki ôh tá tơniăn lĕm, ki má lối cho tơdroăng chiâ xo tơmeăm khoăng hluâ pơkâ ăm, chiâ xo a kơmăng lơ pro chiâng tro tơdroăng chiâ xo tơmeăm ki ôh tá ăm phêp.

Ƀă yă tê, Kăn hnê ngăn Vi ƀan kong pơlê Dak Lak pơkâ kơ koan cheăng tơbleăng yă tơmeăm mơjiâng pro hngêi trăng teăm tơdrêng, tơtro nôkố rêm tíu ki châ xo, riân tro kơxô̆ liăn chiâ xo, mơjiâng pro ƀă pơto tơmeăm; ôh tá lôi yă tơbleăng kơtăn lối hơngế yă kơchơ mơdró, pro khu mơdró thế mơdêk yă ing mâu tơdroăng ki ối tung dế. Mâu khu tê mơdró thế tĕm yă, chêh tơbleăng yă ki khât, tê tơmeăm tro yă mơdró, pro mơ-éa đơn tro yă ki khât; ôh tá pro vâ pơxúa ăm dêi tơná, ‘măn kơtôa vâ tối tơmeăm ôh tá ai hên, môi tuăn pơkâ yă lơ mơdêk yă ing mâu hngê mơdró, khu tê mơdró pơto tơmeăm.

“Tung la ngiâ kăn pơkuâ Vi ƀan kô thăm lăm séa ngăn ôh tá tối hdrối tơkŭm a mơ-éa phêp, ivá pêi cheăng, kơxô̆ tơmeăm, xiâm kối yă tê, mơ-éa đơn, pơto, klêi mê hnoăng liăn pơkuâ ƀă tơdroăng pơtroh ăm mâu tơdroăng tơkêa bro. Ki rơhêng vâ tối tơtrŏng mâu pơlê ai ôh tá tơniăn ‘na yă tê, tơdroăng tối ‘na ôh tá tŭm, ‘măn kơtôa tơmeăm ai pro xôi. Drêng ai tơdroăng ki pro xôi mê tối tơbleăng Kăn hnê ngăn Vi ƀan kong pơlê pơkâ mâu kơ koan séa ngăn, mơnhên ngăn tơpui ƀă pêi pro tiô pơkâ”.