Hneăng tơ’noăng ai 2 ƀảng: Bảng ing tuăn tơmiêt ƀă Ƀảng tơdroăng tơkêa bro. Ƀảng ing tuăn tơmiêt mê ai mâu tơdroăng tơmiêt pơxiâm vâ pêi cheăng hiăng ai hdrối lơ hâi teăm ai tơmeăm, tơmeăm mơdró, túa vâ pêi ƀôi (demo), la hâi châ tơbleăng ăm kơchô mơdró ƀă hâi  teăm ai kơxô̆ liăn pê lo. Starup  ai tơmiêt ‘ló kô châ tơkŭm hriâm tâp, kơjo pê klêi ing tuăn tơmiêt, tơdjêp ƀă mâu ngê ki rơkê, khu ‘no liăn pêi cheăng vâ mơjiâng pro chiâng mâu tơdroăng tơkêa bro ki châ tơƀrê.

Ƀảng Tơdroăng tơkêa bro mê ai mâu tơdroăng tơkêa bro pơ xiâm pêi cheăng hiăng ai tơmeăm, tê mơdró, túa vâ pêi cheăng hiăng châ tơbleăng lap lu lơ mơnúa ƀă mơngế ki rôe khât, ƀă  hiăng châ xo kơxô̆ liăn pê lo; lơ hâi ai kơxô̆ liăn pê lo la hiăng ai liăn vâ ‘no pêi cheăng  châ ăm hlo ƀă mâ ing tơdroăng chêh tung hlá mơ-éa tăm pŏng tâk a hlá mơ-éa, ai tŭm tơdroăng mơhno vâ tối ăm ‘nâi ki tơbrê  dêi liăn ngân.

Mâu tơdroăng tơkêa bro ki tơngah  châ tơƀrê kô ai rôh châ kơ jo kum pê klêi túa mơdró kâ, mơdêk ki rơkê plĕng tung tơdroăng tơpui tơbleăng tơdrêng a ngiâ pú hên, tơdjêp ing khu ai liăn ngân  hlối veăng mơ núa pơxiâm pêi cheăng a kơlo ki hên tâ.

Phŏ Yăo sư, Tiê̆n sih Lê Đức Niêm, Phŏ ngế pơkuâ Hngêi trung Đại học Tây Nguyên, tối xiâm tơdroăng pơxá tơ’noăng hơnăm kố cho pêi pro khât, tối nhên pơkâ pơ‘lêh tuăn tơmiêt chiâng ai pơxúa khât.

“Pơxá Ing tuăn tơmiêt troh ki pơxúa cho tơdroăng vâ hnê ki nhên khât, mơhno tuăn mơ-eăm hơ’lêh hriê̆n plĕng ki nếo  tiô mâu pơkâ dêi Đảng, môi tiah Pơkâ kơ xô̆ 57. Mê cho tơdroăng djâ mâu troăng hơlâ, kong ngê̆ kơmăi kơmok xua tung pêi cheăng vâ ai pơxúa khât”. Kô cho rôh  vâ mâu ngế pưo xiâm pêi cheăng, khu mơdró nếo mơjiâng veăng pêi, ki hdrối cho hriâm ing dêi rơpó, klêi mê tơbleăng inâi, hlối pơ eăng mâu tuăn tơmiêt ƀă ki kơnâ ki khu mơdró pêi lo”.

Ƀă sinh viên, hneăng tơ’noăng xuân po rôh hriâm vâ ‘nâi, hlê, hriâm rơbot tung ngôa ƀă mơnúa ivá tơná ƀă mâu tơdroăng ki tuăn nếo tơmiêt. O Trần Thị Thiện Hạnh, sinh viên Hngêi trung Đại học Tây nguyên, tối:

“Hneăng tơ’noăng ai pơxúa. Gá gum a rơbot chôu vế  hlê plĕng tung pêi pro, ai rôh châ mơnúa ƀă ivá tơná, ing mê thămhlê tơ’nôm ƀă kô pro pơxúa ăm tơná tung pơla pêi cheăng xo ah hmôi”.

Pôa Trần Thanh Sơn, Phŏ kăn pơkuâ Xiâm khoa hok ƀă kong ngê̆ kong pơlê Dak Lak, ăm ‘nâi tơdroăng pêi cheăng hơ’lêh hriĕn plĕng ki nếo dế ai xiâm pêi pro ƀă troăng vâ pêi nhên tâ ƀă tơdroăng Pơkâ kơxô̆ 57 ƀă Luât khoa hok, Kong ngê̆ ƀă Hơ’lêh hriê̆n plĕng ki nếo. Hneăng tơ’noăng vâ mơhnhôk mơdêk mâu tuăn tơmiêt, tơdroăng tơkêa bro rơtế ƀă tơdroăng mơ jiâng khu mơdró ai ivá pê lo mâu tơmeăm ki pơ xúa hlối veăng ‘no hnoăng ăm pơlê pơla. Khu  cheăng Khoa hok ƀă Kŏng ngê̆ kô mơ-eăm tâi ivá tơdjêpo ƀă khu mơdró, khu ‘no liăn kơjo gum pêi cheăng vâ rơtế ƀă mâu tơdroăng tơkêa bro châ kâ pri, kơjo gum mơnhông khu mơdró ƀă po rơdâ mâu túa pơêi cheăng ki pơxúa tơbrê.