Luât tŏng gum mâu ngế hơnăm hiăng krâ ki hâi ai ƀaoh hiêm khăm pơlât kơdroh pá puât ‘na kơxô̆ liăn ‘no drêng pơlât, kô ai tơ’nôm rôh châ khăm pơlât ivá. Ngế ki châ kơjo kum mê xap 60 hơnăm troh pá xôp 75 hơnăm, ai chêh inâi ối a kong pơlê Dak Lak ƀă hâi teăm ai ƀaoh hiêm khăm pơlât. Kơlo tŏng gum dâng 100% kơlo rôe ƀaoh hiêm khăm pơlât tiô pơkâ nôkố, tơ’mô dâng 1.366.200 liăn/ngế/hơnăm.

Kơxô̆ liăn ki mê xua hngêi rak liăn kong pơlê Dak Lak ‘no rôe, châ ‘măn tung kơxô̆ liăn ki vâ hbrâ rêm hơnăm. Tiô tối hdrối, rêm hơnăm Dak Lak ‘măn lối 114 rơtal liăn vâ tơbleăng luât tŏng gum mê. Krê hơnăm 2026, tơdroăng kơjo gum châ pêi pro sap hâi lơ 30/10. Luât pơkâ mê veăng po rơdâ ngiâ kơxô̆ mơngế rôe ƀaoh hiêm khăm pơlât, malối ƀă mâu hơnăm hiăng krâ ki châ liăn ngân tơnêi têa kơjo gum.

Ing mê, gum kuăn pơlê kơdroh kơxô̆ liăn khăm, pơlât, kơdroh tơdroăng lăm rôe xêh lơ mơdoh tơdroăng pơlât châi tamo xua xơpá ôh tá ai liăn pơlât.