Troh khăm a Hgêi pơkeăng cheăm Phú Hòa, nâ Lê Thị Bích Loan, ối a thôn Phú Thạnh, cheăm Phú Hòa 2, kong pơlê Dak Lak chêh inâi a kơmăi ki chêh xo xêh, ối tối cho kiosk khăm pơlât rơkê, ‘măn a kơpong tơdah xo mơngế. Bu kal mơhno mah QR a theh ƀaoh hiêm khăm pơlât lơ căn cước kuăn kong dân mot a tíu ki séa ngăn, kơmăi kô chiâng pơchuât xêh mâu tơdroăng, kum nâ kơdroh tơdroăng ki chêh tối dêi tơná ƀă xo kơxô̆ pơtroh tơdrêng a kơmăi. Nâ Loan hlo, tơdroăng ki xúa a kơmăi gá tơ'lêi hlâu, ing mâu ngế hơnăm ối nếo troh mâu ngế hơnăm hiăng krâ xuân chiâng xúa.

“Á hlo kơmăi kố gá tơ'lêi hlâu ăm mơngế ki châi tamo, tơdroăng chêh tối nhên. Môi tiah akố ối nếo, la mâu vâi xăng vâi tăm meh miê hiăng krâ xuân pú hơnăm hiăng krâ xuân chiâng xúa. Ai kơmăi ki kố mê pin tiê kơxô̆ sap ing kơxô̆ iâ troh kơxô̆ hên rĕng tâ, ôh tá êa tơkôm ton, hía rôh khăm ai ngế ki ‘nâ hía troh hdrối la khăm mơ’nui, ngế ki troh kơ’nâi châ khăm hdrối”.

Kơmăi chêh inâi khăm xêh châ xúa a Tíu xiâm khăm pơlât Phú Hòa sap ing khế 9 hơnăm kố, rêm hdroh chêh inâi hâi teăm châ 1 phut hiăng klêi. Kơmăi ki kố kum kơdroh kơxô̆ mơngế pêi cheăng ki thế ối đi đo a kơpong tơdah xo mơngế khăm, vâ ăm mơngế ki tơdah xo mê pêi mâu tơdroăng cheăng  ki ê.

Ƀok thái pơkeăng Lương Văn Phước, Ngế pơkuâ hngêi ngăn pơkeăng ƀă khăm Phú Hòa ăm 'nâi, ki tơ-ƀrê ăm hlo nhên drêng sap ing mơ'nui khế 7 troh nôkố, tíu xiâm tơdrêng tơbleăng khăm ivá tâi tâng kuăn pơlê, ƀă lối 3.500 roh ngế hiăng châ khăm.

“Sap ing tơbleăng kơmăi, mê tơdroăng rak ngăn mơngế châ tơ'lêi hlâu tâ, hdrối nah athế xing xoăng hên ngế, nôkố bu kal 1 troh 2 ngế mê hiăng klêi tơdroăng cheăng ki mê. Ai tơdroăng ki tơ'lêi vâ pin xing xoăng ăm mâu kăn ƀô̆ troh tŏng gum ăm mâu kơvâ ki ê khăm, malối cho kơpong khăm ivá ăm kuăn pơlê dế rơtế tơbleăng pêi. Bu kal tơdah xo akố vâi kô chiâng mơdêk tơdrêng kơpong khăm, lôi tơdroăng ki séa ngăn kơmăi kơmok dêi mâu kơvâ cheăng".

Tơdroăng kơmăi pơchuât xêh mâu tơdroăng 'na mơngế châi tamo tung tơdroăng tơdah gum Hngêi pơkeăng khăm pơlât Phú Hòa kơdroh hnoăng cheăng chêh 'mot tung kơmăi ƀă xing xoăng mơngế pêi cheăng. Kố xuân cho tơdroăng ki rơhêng vâ khât tung pơhlêh kơxô̆ a tíu pêi cheăng: tơmeăm khoăng tơtro, tơ'lêi xúa, kơdĭng chôu ăm tá kuăn pơlê ƀă kăn ƀô̆ pêi cheăng.

Jâ Huỳnh Thị Son, Kăn hnê ngăn Đảng ủi cheăm Phú Hòa 1, kong pơlê Dak Lak tối, rơtế ƀă kơxô̆ liăn dêi hngêi rak liăn, tung pơla hdrối kô nah hiăng châ xo hên tơdroăng veăng kơjo kum ing pơlê pơla. Kơmăi chêh inâi khăm a Hngêi pơkeăng Phú Hòa xua Agribank ki ai tíu pêi cheăng a Phú Yên tŏng gum cho môi tung mâu kơxô̆ ki mê.

"Tung pơla hdrối kố nah, cheăm Phú Hòa 1 châ xo hên tơdroăng ki rơtế prôk, tối ăm dêi rơpó, tŏng kum dêi mâu kŏng ti, mâu khu mơdró kâ tung cheăm, malối cho tơdroăng cheăng pơ'lêh kơxô̆. Kố xuân cho tơdroăng ki tŏng kum kal khât, veăng kum pro tơ'nôm ivá ăm cheăm Phú Hòa 1 tung tơdroăng cheăng pơ'lêh kơxô̆ tung tâi tâng mâu kơvâ cheăng".

Tiô Khu pơkuâ ngăn pơkeăng ƀă khăm pơlât Dak Lak, pơ'lêh kơxô̆ dế châ tơbleăng sap ing hlá mơ-éa, hồ sơ khăm pơlât điê̆n tưh troh ăm liăn ôh tá xúa liăn mâ ƀă mâu tơdroăng ki pơxúa ăm tơdroăng khăm pơlât. Hneăng hơnăm 2026-2030, Dak Lak hiăng môi tuăn troăng hơlâ xing xoăng vâ chê 484 rơtal liăn ăm 7 tơdroăng tơkêa bro khăm pơlât kơxô̆. Rơtế ƀă kơxô̆ liăn 'no dêi Tơnêi têa, kong pơlê xuân mơhnhôk tăng liăn pơlê pơla vâ tơ'nôm, mơdêk ki dâi lĕm tơdroăng cheăng a mâu tíu ki tơtro.

Klêi kơ'nâi 'mot tơdjuôm, kong pơlê Dak Lak ai 36 tíu khăm pơlât ai xoăng koi pơlât ối tung khu, ai 14 hngêi pơkeăng ƀă 22 tíu khăm pơlât. Kiosk khăm pơlât rơkê nôkố hiăng châ ‘măn a 15 tíu pêi cheăng. Tung mê, Agribank Tíu pêi cheăng Phú Yên tŏng kum tơmeăm xúa tng khăm a Tíu xiâm khăm pơlât Phú Hòa ƀă Tíu xiâm khăm pơlât Sơn Hòa. Pôa Phan Thông Thái, Kăn pơkuâ Agribank Tíu pêi cheăng Phú Yên ăm 'nâi, tíu pêi cheăng dế ai pơkâ pơtối tŏng kum mâu tơmeăm xúa tung khăm pơlât ƀă tơdroăng pro hlá mơ-éa a mâu cheăm, bêng tung kong pơlê.

“Ngin dế ai tơdroăng pơtối tŏng kum Kiosk khăm pơlât rơkê plĕng ƀă mâu Kiosk ăm mâu kăn kong pơlê nếo, tŏng kum mâu kế tơmeăm ai pơxúa pro ti lâi vâ kum kuăn pơlê châ xúa mâu tơdroăng ki pơxúa dêi tơdroăng pơ'lêh kơxô̆".

Kơxô̆ liăn pơlê pơla ôh tá pơhlêh 'no liăn cheăng dêi Tơnêi têa, la kô chiâng tơ'nôm a mâu tơdroăng kal vâ ki nhên a pơlê cheăm. Ƀă mâu tơmeăm kal xúa ƀă kơxô̆ liăn mê tơtro ƀă tơdroăng kal vâ xúa khât a pơlê cheăm, ki tơƀrê tơdroăng pơhlêh kơxô̆ kô hlo tơdrêng ing mâu tơdroăng ki hơ'lêh. Môi tiah a mâu hngêi pơkeăng dêi kong pơlê Dak Lak, ki tơƀrê mơhno ing tơmeăm ki châ xúa châ gum kuăn pơlê kơdroh chêh ƀă kơdroh chôu tơkôm.