Môi tung mâu tơdroăng ki kal châ mơngế pêi cheăng kal vâ ‘nâi cho tơdroăng ki rak tơniăn hnoăng pơxúa Ƀaoh hiêm xah hô̆i tung tơdroăng cho khu mơdró kâ ối hrá nâp. Pôa Cao Văn Bi, Kăn hnê ngăn Kŏng đoân môi tíu mơdró kâ a bêng Tuy Hòa, kong pơlê Dak Lak, pâ thế kal ai troăng hơlâ vâ mâu ngế pêi cheăng ôh tá tro tơdjâk troh hnoăng pơxúa drêng khu mơdró kâ tá hâi klêi tơdroăng ki nâp liăn ƀaoh hiâm xah hô̆i.

“Tơdroăng pơkâ 158 mê ƀaoh hiêm xah hô̆i bu mơnhên tiô hâi khế hơnăm ki khu mơdró kâ hiăng nâp liăn ăm ngế pêi cheăng. Tiah mê, ngế pêi cheăng chiâng tro lŭp khât. Xua mê xuân rơhêng vâ pâ thế pro tiah lâi ‘lo vâ mơnhên hâi khế hơnăm nâp liăn dêi ngế pêi cheăng troh rôh pơtê cheăng. Ối 2 khế, 3 khế lơ 1 hơnăm mê khu mơdró kâ tá hâi nâp mê tơnêi têa, kơ koan dêi tơná ai hnoăng pôu râng cho athế nâp liăn ki mê dêi khu mơdró kâ vâ ăm ngế pêi cheăng ôh tá tro tơdjâk”.

A rôh hôp, mâu rơkong tơpui tối dêi đoàn viên, kŏng nhân, viên chưk, ngế pêi cheăng ƀă kăn ƀô̆ công đoàn tơkŭm tung mâu tơdroăng ki xơpá dế trâm tung tơdroăng rêh ối, cheăng pêi ƀă tung pơla pêi pro mâu troăng hơlâ tơdjâk troh ngế pêi cheăng. Ki rơhêng vâ tối cho tơdroăng cheăng pêi tung pơla pơkâ thế kih năng tơdroăng cheăng, kih năng kơxô̆ rế hía rế kal; tơdroăng ki hrá ăm kâ liăn, hrá nâp ƀaoh hiêm xah hô̆i; tơdroăng púi vâ ai hngêi ối, hngêi kŏng nhân ƀă mâu tơdroăng ki tơvâ tơvân tung tơdroăng ki châ xúa mâu troăng hơlâ tŏng gum.

Tiâ mơnhên ‘na tơdroăng hnê cheăng pêi ƀă pêi cheăng a kong pơlê, pôa Nguyễn Quang Thuân, Phŏ pơkuâ Khu ngăn kong pơlê, cheăm bêng ƀă hnoăng cheăng mâu kăn ƀô̆ kong pơlê Dak Lak, ăm ‘nâi troăng hơlâ tơleăng mâu tơdroăng cheăng, mơdêk pêi lo liăn ƀă tơniăn tơdroăng rêh ối ăm mâu ngế pêi cheăng cho môi tung mâu hnoăng cheăng kong pơlê kal vâ ‘nâi.

“Ki hdrối tâ, kong pơlê hiăng tơrŭm ƀă mâu khu râ, kơvâ cheăng chêh pro túa pơkâ hnê mơhno, mơdêk tơdroăng cheăng pêi ăm ngế pêi cheăng tung la ngiâ ah. Tơdrêng amê hlối gum khu mơdró kâ tơdjêp tơdroăng cheăng pêi, tơtrŏng troh mâu rơpŏng kơtiê, ƀă hên troăng hơlâ tŏng gum môi tiah tăng cheăng pêi, tơdjêp mâu ngế pêi cheăng kong pơlê ki ê ƀă ăm mâu ngế pêi cheăng lăm pêi cheăng a kong têa ê, tung mê ai ngế pêi cheăng ai hâi khế pơkâ”.

Rơtế ƀă tơdroăng tŏng gum mâu tơdroăng tơvâ tơvân ‘na troăng hơlâ, pơhlêh xúa internet châ mơnhên cho môi tung mâu troăng hơlâ vâ mơdêk ki rơkê plĕng tung tơdroăng gum kuăn pơlê ƀă ngế pêi cheăng châ xúa troăng hơlâ tơ’lêi hlâu tâ, malối cho mâu troăng hơlâ ‘na ƀaoh hiêm xah hô̆i. Pôa Tạ Đức Hậu, Phŏ pơkuâ Ƀaoh hiêm xah hô̆i kong pơlê Dak Lak, ăm ‘nâi kơvâ Ƀaoh hiêm xah hô̆i dế rế hía rế pơhlêh túa ki vâ gum mâu ngế pêi cheăng châ xúa mâu troăng hơlâ tŏng gum tơ’lêi hlâu tâ.

“Kơvâ ƀaoh hiêm xah hô̆i mơnhên pơhlêh sap ing tŏng gum chiâng hbrâ rơnáu. Klêi kơ’nâi ai tíu chêh ‘măn pro krúa mê ngin hbrâ rơnáu tơdjêp ƀă Tíu chêh ‘măn tơnêi têa ‘na kuăn pơlê ối vâ châ hlo mâu ƀô̆ định danh dêi mâu ngế pêi cheăng ki tá hâi châ mơnhên, tá hâi châ pro bô bối tŭm mê ngin hbrâ rơnáu pơtroh inâi mâu ngế pêi cheăng ki ối tro xôi ăm kơ koan pơkuâ ngăn tơdroăng cheăng xuân môi tiah cho ngế pêi cheăng vâ teăm tơbleăng, ‘mêi rơnêu”.

Kăn pơkuâ kong pơlê Dak Lak tối nhên, mâu tơdroăng ki kal châ tơpui tơno a rôh hôp ôh tá xê to pơtê a tơdroăng ki pêi châ tiô tơdroăng tiâ mơnhên mâu rơkong kơ-êng mê ối pơkâ pơtối tơleăng klêi kơ’nâi tơpui tơno. Vi ƀan hnê ngăn kong pơlê Dak Lak tơdah xo, hnê mơhno mâu kơ koan ki ai tơdjâk hriăn plĕng ƀă tơleăng. Tơdrêng amê hlối pơkâ thế thăm mơnhông tơpui tơno tơdrêng pơla kăn pơkuâ, khu mơdró kâ ƀă ngế pêi cheăng; tơrŭm ƀă khu tơrŭm Kŏng đoân vâ tŏng gum rêh kâ ối liăn ngân, hiâm mơno ƀă rak vế hnoăng pơxúa, ki tơtro luât, tơxâng dêi đoân viên, ngế pêi cheăng.