Idrâp hơkâ chuât hiăng troh chôu pơtê hriâm, o Siu Nhi, hok tro lâm 8A, Hngêi trung phôh thong ai tíu kâ koi ối pơtê péa râ, râ má môi ƀă râ má péa Ia Púch, rơtế ƀă mâu vâi pú xo ‘măn dêi mâu hlá mơ-éa, tơpui tơno klêi kơ'nâi chôu hriâm a kơxo. Mâu vâi pú hngêi ối achê hngêi trung vêh dêi a hngêi kâ hmê kơhâi dế; mê Siu Nhi ƀă mâu vâi pú ối hơngế xo mâu kơhôp hmê ki nôu pâ hbrâ rơnáu sap ing kơxo má, rơtế dêi pó kâ hmê klêi mê pơtê a lâm vâ pơtối hriâm a kơxê. Kố cho troăng hơlâ ki pơtân gum rak vế tơdroăng hriâm péa rôh rêm hâi, tung pơla tơkôm hngêi kâ koi ối pơtê pro klêi. Ƀă Siu Nhi, hngêi trung nếo djâ ăm hên tơdroăng ki hơniâp ro ƀă tơ'nôm ivá mơhnhôk vâ o mơ-eăm:

“Tiah hmâ, á bu hlo tơdroăng môi tiah kố tung um tivi lơ a mâu hngêi trung ki ê xo. Nôkố á châ hriâm tung hngêi trung kân, rơdâ ƀă lĕm tiah kố, á tâ ro khât. Á kô mơ-eăm loi nguăn, hriâm rơkê”.

Mâu xiâm loăng ki nếo pêt tung plông Hngêi trung Ia Púch hiăng pơxiâm huăn mâu hlá ngiât ki apoăng. Kơpong tơkăng kong mâu hơnăm hdrối nah ôh tá ai mơngế, nôkố tâng to rơkong pơchuât ƀai. Pakĭng mâu kơbong hriâm, rêm khu kŏng nhân krâ 'măn mâu péa, sơng mâu mơnât vâ ăm gá klêi. Pôa Phan Thành Tiến - Ngế pơkuâ Hngêi trung phôh thong ai tíu kâ koi ối pơtê péa râ, râ má môi ƀă râ má péa Ia Púch ăm 'nâi, tơdroăng cheăng ki u ối ôh tá hên la tơdjâk troh rêm roh kâ hmê, koi pơtê ƀă tơdroăng rêh ối rêm hâi dêi hok tro mê athế châ séa ngăn, mơnhên nhên hdrối vâ xúa.

Hngêi trung ai ƀăng tơnêi pro lối 5ha, ƀă 23 to lâm hriâm ƀă mâu tơmeăm khoăng, tơxâng tơdroăng kal vâ hriâm tâp, ối pơtê ƀă ối pơtân dêi lối 700 ngế hok tro. Pakĭng mơngế pêi cheăng tiô pơkâ, kong pơlê Gia Lai ăm phêp mâu hngêi trung tơ'nôm mơngế gak ngăn, mơngế pêi cheăng ƀă mơngế pơkuâ ngăn hok tro pakĭng chôu hriâm; tơdrêng amê hlối ‘no liăn roê krâ 'măn camera a mâu tíu ki kal tung hngêi trung. Pôa Phan Thành Tiến ăm 'nâi, hngêi trung hiăng séa ngăn, xing xoăng mơngế thái cô, mơngế pêi cheăng păn roăng, gak ngăn ƀă mơngế pơkuâ ngăn hok tro pakĭng chôu hriâm.

Tơdroăng pơkâ cho drêng hngêi ăm kâ koi ối pơtê tŭm tơdroăng vâ pêi cheăng, mâu troăng hơlâ rak ngăn, păn roăng ƀă pơkuâ hok tro xuân hbrâ rơnáu nhên:

“Mot tung hơnăm hriâm nếo, tơdroăng ki hbrâ rơnáu ƀă hiâm mơno dêi hok tro ƀă nôu pâ vâi  hâk phiu, sôk suâ xua ai hngêi trung hriâm lĕm. Hngêi trung mơjiâng pơkâ tơtro ƀă túa hngêi trung ối pơtân ƀă tơdroăng kal vâ ‘nâi plĕng dêi hok tro a kong pơlê. Malối cho 'na hriâm pât ƀă ki hlê plĕng dêi tơdroăng hriâm tâp”.

Tíu tơkăng kong, hngêi trung ai tíu kâ koi ối pơtê xuân châ xo tơdroăng tơmâng ngăn dêi mô đô̆i gâk tơkăng kong kong pơlê. Đăi tă Đoàn Ngọc Báu, Phŏ pơkuâ ngăn Đảng lêng Khu pơkuâ mô đô̆i gâk tơkăng kong, kong pơlê Gia Lai, ăm 'nâi: hngêi trung ai tíu kâ koi ối pơtê tơkăng kong ôh tá xê to krá lĕm 'na kế tơmeăm khoăng mê ối cho túa pơkâ 'na tơdroăng rêh ối-hriâm tâp vâ mâu vâi o mơnhông tŭm têk. Xua mê, tíu pêi cheăng kô tŏng kum hngêi trung mơjiâng tơdroăng rêh ối, luât pơkâ, tơtro ƀă rêm hơnăm dêi mâu vâi o hok tro.

“Kố cho hnoăng cheăng ki kal khât. Ngin hnê mơhno mâu đông mô đô̆i gâk tơkăng kong tơrŭm pro nhŏng o ƀă mâu hngêi trung râ má môi râ má péa a tíu tơkăng kong; tơkŭm hnê tối troh mâu hok tro, thái cô 'na tơdroăng pơkâ. Mâu tôh pêi cheăng tơrŭm ƀă mâu khu râ kơvâ cheăng tung kong pơlê rơtế ƀă thái cô rak vế tơdroăng pơkâ tung hâi ƀă pêi pro kơtăng tiô luât pơkâ dêi hngêi trung, rak tơniăn ăm mâu vâi o hriâm tâp tơniăn tro sap ing mâu hâi mot hriâm ki apoăng”.

Ing mâu măng tĭng hriâm ki apoăng, môi troăng prôk nếo dế po ăm thái ƀă hok tro Hngêi trung Ia Púch. Tơdế kơpong tơkăng kong, rơkong hok tro tơpui rêm hâi, pơtroh tơ'nôm tơdroăng loi tơngah ƀă mơjiâng mâu tơdroăng pói vâ 'na môi tơdroăng la ngiâ kân rơdâ ing hngêi trung ki kố.