Hâi lơ 10 khế 8 hơnăm 10947, a buôn Ma Hinh, nôkố cho buôn Đất Bằng, Chi ƀô̆ Đảng apoăng dêi tơring Cheo Reo (ối tung kong pơlê Gia Lai ton) châ mơjiâng ƀă 3 ngế đảng viên: Ksor Ní, Rơchŏm Thép ƀă Rơchŏm But. Pôa Ksor Ní châ pôk pro kăn pơkuâ Chi ƀô̆. Tung mâu khế hơnăm  kăch măng ối ai hên xơpá, mâu đảng viên hiăng mơjiâng pro tíu cheăng kal kí, mơhnhôk, tơkŭm kuăn pơlê, rế hía rế djâ tơdroăng kăch măng mơnhông. Nếo achê kố, tíu ki mơjiâng Chi ƀô̆ ki apoăng dêi tơring Cheo Reo châ Vi ƀan hnê ngăn kong pơlê Gia Lai ‘no liăn pro kơpong tíu chôu vế a ƀăng tơnêi dâng 1,7 ha. Tíu kố chiâng “tíu ki xiâm” hnê hriâm khôi hmâ kăch măng ăm mâu rơxông.

Drêng tơbâ 81 hơnăm Kăch măng Khế Tơheăm ƀlêi trâng ƀă Mơjiâng tơnêi têa lơ 2/9, veh pôu kơpong tíu chôu vế, pôa Trịnh Thanh Khiết – Phŏ pơkuâ ngăn Đảng ủi cheăm Phú Túc tối nhên.

“Ƀai hriâm ki kân má môi sap ing tơdroăng ki mơjiâng Chi ƀô̆ Đảng ki apoăng a Cheo Reo rôh ki mê nah cho tơdroăng ki krá tơniăn khât dêi kăn ƀô̆ đảng viên ƀă kuăn pơlê hdrông kuăn ngo tung kơpong kố ƀă hên ki ê athế ối achê ƀă kuăn pơlê, athế hmâ tơrŭm ƀă kuăn pơlê”.

Achê kuăn pơlê, hmâ ƀă kuăn pơlê cho ƀai hriâm sap ing mâu hâi ki apoăng mơjiâng Chi ƀô̆ Đảng a Cheo reo (Gia Lai) troh hâi kố pơtối châ pêi pro pơhlêh ƀă hnoăng cheăng pôu râng dêi rêm ngế kăn ƀô̆, đảng viên a pơlê cheăm. Klêi kơ’nâi ‘mot tơkŭm, nôkố buôn Đất Bằng ai vâ chê 800 rơpŏng, ƀă lối 3.180 pơ’leăng mâ mơngế, ki hên cho mơngế Jarai. Chi ƀô̆ nôkố ai 73 ngế đảng viên, cho khu ngế ki xiâm rơtế ƀă Măt trâ̆n Tơnêi têa ƀă mâu khu râ hnê tối, mơhnhôk Kuăn pơlê pêi pro troăng hơlâ dêi Đảng, luât dêi Tơnêi têa; mơnhông cheăng kâ, mơjiâng tơdroăng rêh ối túa lĕm tro. Cho kăn ƀô̆ hơnăm ối nếo hiăng hriâm klêi đăi hok, ngoh Rơchŏm Bết (kuăn ngo Jarai), Kăn pơkuâ Chi ƀô̆ hlối pro ngế pơkuâ buôn Đất Bằng tối rơdêi:

“Tơná á cho kăn pơkuâ Chi ƀô̆ thôn, đi đo mơnhên hnoăng cheăng dêi tơná cho athế hnê tối đi đo, mơhnhôk vâi krâ nhŏng o mơnhông cheăng kâ, pêi pro tro troăng hơlâ pơkâ dêi Đảng ƀă troăng hơlâ, luât dêi Tơnêi têa ƀă hên ki ê. Ƀă mâu tơdroăng ki ối tơvâ tơvân, ối trâm tung thôn, ngin đi đo hbrâ rơnáu ‘nâi nhên tơdroăng vâ teăm tŏng gum”.

Tơdroăng pơkuâ, hnê mơhno dêi khu râ kăn pơkuâ Đảng a Đất Bằng tơkŭm a mâu tơdroăng ki nhên tung tơdroăng rêh ối. Tung khế 7 kố nah, Chi ƀô̆ tơrŭm ƀă Măt trâ̆n, khu râ séa ngăn tŏng kum vâ chê 200 rơpŏng pêi pro tơdrêng hlá mơ-éa mơnhên hnoăng xúa tơnêi. 60 rơpŏng dế kâ liăn tŏng kum pơlê pơla châ mơhnhôk pơ'lêh sap ing xo liăn mâ troh xo ing tài khoản. Rơtế ƀă mê cho mâu tơdroăng tŏng kum rơpŏng ai hnoăng tơnêi têa, tŏng kum mơngế pá puât, khăm pơlât ăm mơngế hơnăm hiăng krâ, hbrâ mơdât pơreăng.

Rơtế ƀă tơdroăng hnê tối, mơhnhôk, kăn ƀô̆, đảng viên a Đất Bằng ối djâ troăng ahdrối tung hơ'lêh túa tơmiât, túa pêi, malối cho tung pêi cheăng kâ. Đất Bằng hâi kố hiăng mơjiâng mâu kơpong pêt báu klâng, pôm loăng, kơtếo; hên troăng prôk mot tung kơpong pêi cheăng châ 'no liăn, pro tơ'lêi hlâu vâ kuăn pơlê mơnhông cheăng kâ. Đảng viên hơnăm ối nếo Kpă Tuyên cho môi tung mâu ngế ki djâ troăng ahdrối tung tơdroăng xúa ki rơkê khoa hok kih thuât tung pêi cheăng, hơ'lêh túa pêi ton nah.

“Cho môi ngế đảng viên, tơná á đi đo hriâm tâp ƀă pêi pro tiô troăng ki lĕm dêi mâu ngế ki prôk hdrối tung pêi cheăng kâ. Hdrối nah, tơdroăng pêi chiâk deăng kơnôm to a rơnó mê pêi lo liăn ôh tá hên… Nôkố, kơnôm ing tơdroăng hnê mơhno ƀă hbrâ rơnáu xúa khoa hok - kih thuât, xúa kơmăi kơmok ƀă tôh têa kơdĭng tung pêi chiâk deăng… tơdroăng xúa kơmăi kơmok chal nếo hiăng kum mơdêk ki tơ-ƀrê tung pêi chiâk deăng”.

Sap ing "mâu pơ’leăng ki xiâm" châ mơdâ pêt a ƀuôn Ma Hinh 79 hơnăm hdrối, troh mâu ngế đảng viên hâi kố, troăng hơlâ kăch măng a ƀuôn Đất Bằng, cheăm Phú Túc, kong pơlê Gia Lai xuân ối châ pơtối ƀă mâu tơdroăng pêi pro ki nhên, ai pơxúa. Mâu tơdroăng mê cho achê kuăn pơlê, hlê kuăn pơlê, rơtế kuăn pơlê tơkâ luâ xơpá; cho djâ troăng ahdrối tung mơnhông cheăng kâ, xúa khoa hok kih thuât, mơjiâng tơdroăng rêh ối rế hía rế lĕm tro tâ.