A Tíu pêi cheăng chêh pro mơ-éa cheăm Tây Sơn, bu tá hâi teăm châ 10 phut, ngoh Nguyễn Minh Phi, a Khô̆i Tây Xuân, hiăng pro klêi tâi tâng tơdroăng ki chêh rơpŏng tê mơdró tung hyôh internet. Sap ing tơdroăng ki nâp hồ sơ ing troăng hyôh internet, mơnhên điê̆n tưh troh nâp liăn ôh tá xúa liăn mâ, mâu tơdroăng pro pơrá châ kăn ƀô̆ hnê pêi pro tơdrêng hlối a tíu pêi cheăng pơtroh pêi ing troăng hyôh internet. Ngoh phiu ro tối:

“Á hlo cheăng chêh inâi rơpŏng tê mơdró kố gá rĕng. Hdrối nah cho 3 hâi la nôkố chêh pro mơ-éa gá rĕng khât, kơdĭng hâi chôu. Kăn ƀô̆ tŏng gum hơniâp lĕm, kơhnâ khât”.

Tơdroăng ki pơhlêh kố cho klêi kơ’nâi dêi tơdroăng pro tơkŭm hên tơdroăng cheăng tung hyôh internet a Tíu pêi cheăng chêh pro mơ-éa dêi cheăm Tây Sơn, gum kuăn pơlê bu kal pêi pro môi xôh ing troăng điê̆n tưh teăng ăm lăm pro hên xôh môi tiah hdrối nah.

Sap ing apoăng hơnăm troh nôkố, Tíu pêi cheăng chêh pro mơ-éa cheăm Tây Sơn hiăng tơdah xo lối 3.400 hồ sơ; tâi tâng châ chêh pro klêi tro hâi pơkâ lơ hdrối tâ hâi pơkâ, chêh pro mơdrếo ing troăng hyôh internet ƀă chêh pro tŭm. Troh mơ’nui khế 7/2027, cheăm hiăng pêi pro klêi ƀă luâ 9/10 tơdroăng pơkâ mơjiâng cheăm ki xiâm tung kơxúa tơdroăng cheăng chêh pro mơ-éa ing hyôh internet, kơxô̆ kuăn pơlê hâk vâ châ tâi tâng.

Ngoh Trần Lam Sơn, Bí thư Đoân Droh rơtăm cheăm Tây Sơn, ăm ‘nâi, cheăm dế tơbleăng tơdâng mâu tôh pêi cheăng ing troăng hyôh internet a tâi tâng 10 to thôn.

“Tôh pêi cheăng chêh ‘mot tung internet ngin kố lăm troh tŏng gum vâi krâ kuăn pơlê cài đặt mâu tơdroăng ki pơxúa ‘na tơdroăng ki vâ xúa ing hyôh internet. Ƀă 10 thôn, cheăng tơbleăng lăm pêi cheăng kố châ pêi rêm hâi, malối cho cài đặt ứng dụng iGiaLai gum vâi krâ kuăn pơlê châ xúa kong ngê̆”.

Ôh tá pơtê to a pơhlêh chêh pro mơ-éa, pơhlêh xúa internet a Tây Sơn dế tơdjâk troh hên kơvâ cheăng dêi tơdroăng rêh ối kuăn pơlê. Kăn pơkuâ pơkuâ ƀă internet; kơchơ tê mơdró tiah hmâ hiăng rế hía rế pơhlêh chiâng ăm liăn ing troăng hyôh internet; khu pêi cheăng tơrŭm ƀă rơpŏng tê mơdró xúa hlá mơéa đơn điê̆n tưh; kơvâ khăm pơlât tí tăng ngăn hồ sơ khăm pơlât ing điê̆n tưh; hnê hriâm tơbleăng hok ƀă ing troăng hyôh internet ƀă hngêi trung hriâm rơkê.

Mâu tơdroăng kố dế mơjiâng hê̆ sinh thăi ing troăng hyôh internet saơ ing râ cheăm. Pôa Đỗ Thành Quyết, Phŏ pơkuâ Ƀơrô Túa lĕm tro – Pơlê pơla Tây Sơn, kong pơlê Gia Lai ăm ‘nâi, tung môi hơnăm hdrối, cheăm hiăng tơkŭm po 34 rôh hôp ôh tá xúa mơ-éa, tơbleăng pêi túa kơchơ ing troăng hyôh internet ƀă 155 khu tê mơdró veăng ăm liăn ôh tá xúa liăn mâ ƀă châ mơ’no xúa hyôh 5G tâk troh 99,3% pơ’leăng mâ mơngế. Vâ rak vế ƀă mơnhông tơƀrê túa pêi xúa internet, cheăm hiăng xúa 37 hnoăng cheăng ki nhên tiô pơkâ xua kong pơlê Gia Lai mơ’no.

“Cheăm Tây Sơn tơtrŏng mơjiâng Tíu pêi cheăng chêh pro mơ-éa tiô túa. Troh nôkố, tíu pêi cheăng kố hiăng pêi klêi mâu hnoăng cheăng, tơdroăng pơkâ mơ’no. Tung la ngiâ ah, cheăm mơ-eăm tơrŭm ƀă mâu khu râ, kơvâ cheăng, tíu pêi cheăng pơkuâ hnê mơhno pêi pro klêi tiô túa pơkâ dêi kong pơlê”.

Mâu tơdroăng pêi pro ƀlêi chiâng ki apoăng dêi cheăm Tây Sơn hiăng pro tơdroăng ki ai khât ki kal vâ kong pơlê Gia Lai chêh pro túa pơkâ po rơdâ túa pêi “cheăm xúa hyôh internet” lo a 30 to cheăm tung la ngiâ. Pôa Lâm Hải Giang, Phŏ hnê ngăn Vi ƀan kong pơlê Gia Lai, ăm ‘nâi, cheăng po rơdâ ôh tá xê to tiô ƀối túa pêi dêi cheăm Tây Sơn, mê tơmiât troh mơjiâng môi tơdroăng pơhlêh xúa hyôh internet tơdâng tơ’mô a râ cheăm, tro ƀă tơdroăng púi vâ pêi pro ki ai khât ƀă pro pơxúa tơƀrê nhên ăm kuăn pơlê. Pơkâ pêi xiâm troh tá ah cho mơjiâng kăn pơkuâ ing troăng hyôh internet, cheăng kâ ing troăng internet ƀă pơlê pơla ing troăng hyôh internet sap ing cheăm bêng, vâ pơhlêh xúa pêi cheăng ing troăng hyôh internet chiâng ivá mơnhông cheăng kâ rêh ối pơlê pơla dêi kong pơlê tung hneăng ki nếo.

“Mâu túa pơkâ pêi nếo ‘na pơhlêh chêh pro mơ-éa ƀă pơhlêh nếo tơmiât pêi rơkê mơ’no tơdroăng ki tơ’lêi hlâu khât ăm kuăn pơlê, khu mơdró kâ tơbleăng chêh pro mơ-éa, veăng gum pro kơdroh hâi chôu chêh pro mơ-éa. Hên tíu ki chêh ‘măn tơdroăng kal tung internet hiăng châ pro klêi, pro tơ’lêi hlâu vâ kăn pơkuâ pêi pro hnê mơhno ngăn tung tíu chêh ‘măn tơdroăng kal ing troăng hyôh internet, ‘nâi nhên tơdroăng ki ai khât vâ mơ’no tối mâu pơkâ gum tro tâ ăm mơnhông tơdjuôm dêi tá kong pơlê”.

Sap ing môi túa pơkâ, cheăm Tây Sơn dế ăm hlo pơhlêh xúa internet ôh tá xê to tơdroăng dêi kong ngê̆, mê hdrối tâ cho pơhlêh túa pơkuâ ngăn ƀă gum kuăn pơlê. Drêng mâu tơdroăng ki pơxúa ing xúa internet mâu hlá mơ-éa, mâu tơdroăng tê mơdró ƀă rêm tơdroăng cheăng pêi tơdjuôm, túa pêi cheăm pêi ing troăng hyôh internet kô chiâng tơdroăng ki xiâm vâ Gia Lai mơjiâng kăn pơkuâ ing troăng hyôh internet, cheăng kâ ing troăng hyôh internet ƀă pơlê pơla ing troăng hyôh internet, pro ivá nếo ăm mơnhông rĕng ƀă krá tơniăn tung hneăng la ngiâ.