Tơdroăng tơkêa bro xing xoăng tíu tơkŭm ăm kơpong ki hmâ tro têa lân lu a cheăm Ia Hiao (kong pơlê Gia Lai) châ pro a thôn Điểm 9, ƀăng tơnêi lối 15 ha, tâi tâng kơxô̆ liăn pro lối 120 rơtal. Tơdroăng tơkêa bro kố xoăng tơnêi ối ăm lối 180 rơpŏng kuăn pơlê. Nôkố, mâu tíu pêi cheăng pro dế hiăng vâ pro klêi troăng prôk tung kơpong, on tơhrik, mâu kế tơmeăm xúa ki kal môi tiah têa ôu kâ hum roh, hngêi hôp tơdjuôm, hngêi trung mầm non.

Pôa Ksor Tin cho môi tung mâu ngế ki apoăng a ƀuôn Chư Plah Jai, cheăm Ia Hiao, troh tơdah xo tơnêi nếo vâ pro hngêi ối ăm ‘nâi:

“Ngin lăm troh ngăn tơnêi a tíu kố hlo gá lĕm. Akố achê hngêi trung hriâm, ai plông kơtu ƀa long. Tơnêi a ‘ngêi, a ngo gá lĕm khât, ối tơniăn tâ ăm vâi kuăn ‘nĕng dêi vâi krâ kuăn pơlê; ôh tá kal kơtâu xâu têa kân lân lu môi tiah mâu hơnăm hdrối nah; tíu kố gá lĕm tâ tâng vâ pơchông ƀă tíu ối hdrối nah. Châ Tơnêi têa gum, kăn pơkuâ kong pơlê pro ăm tíu ối nếo ăm kuăn pơlê, á ôh tá ‘nâi tơpui klâi ôh, bu ‘nâi mơnê hên khât”.

Vâ vâi krâ kuăn pơlê môi tuăn lo ing tíu rêh ối ki hmâ maluâ trâm kong mê khía mơhot têa lân lu vâ troh ối a tíu ối nếo, kăn pơkuâ cheăm bêng hiăng tơkŭm po hên rôh trâm mâ, tơmâng tơdroăng púi rơhêng vâ ƀă tiâ mơnhên tŭm mâu tơdroăng ki kuăn pơlê tôu tuăn. Vâi krâ kuăn pơlê châ ngăn um ki khât mâu kơpong ki hmâ tro têa lân lu, séa ngăn tơdroăng ki pro kơpong pro pơlê ối, tăng ‘nâi troăng hơlâ tŏng gum. Mâu rơpŏng kuăn pơlê châ rah xo mâu hngêi ối ki vâi vâ, rup kơxô̆ tíu ối ƀă lăm ngăn tơdrêng tíu kơpong kuăn pơlê ối. Rơpŏng ngoh Nay Chúc a ƀôn Sô Ma Lơng, cho môi tung 67 rơpŏng ki apoăng troh ối a kơpong tíu ối kố, phiu ro xua hiăng rup kơxô̆ châ tíu ối ki lĕm tâ tơdroăng ki tơná tơmiât”.

“Rơpŏng á hdrối nah rêh ối a kĭng têa kroăng, tôu tuăn khât xâu tơnêi tơhnah tơhnâp. Mơhúa rup kơxô̆ châ kơxô̆ 63, tíu ối achê hngêi trung mâuh yăo, klăng rôh kuăn á hơnăm kố mot hriâm mầm non, lâm hriâm ki má mơ’nui”.

Hdrối vâ gum kuăn pơlê lăm troh ối a tíu ối nếo, cheăm tơkŭm po Leh lo lăm pêi cheăng “Mơgrúa lĕm hngêi ối – Tơnêi tơníu krúa lĕm” a Kơpong tíu kuăn pơlê ối. Akố, kăn pơkuâ cheăm, mâu khu tơrŭm rơtế ƀă kuăn pơlê pêt 250 xiâm loăng bàng Đài Loan drô tiô kuăn pơlê ối. Leh lo lăm pêi cheăng mơhno ivá khŏm mơ-eăm dêi khu pơkuâ cheăng kal kí ƀă tơdroăng ki môi hiâm mơno dêi kuăn pơlê tung tơdroăng pro tíu ối nếo tơniăn krá ton. Pôa R’Ô Thí, Phŏ pơkuâ ƀơrô cheăng kâ cheăng Ia Hiao ăm ‘nâi, tơdroăng tơkêa bro kố dế vâ pro klêi mâu tơdroăng ki kal pro vâ tơdah dâng 180 rơpŏng kuăn pơlê lăm troh ối tung to lâi khế la ngiâ.

“Pơla hdrối nah, cheăm Ia Hiao hiăng pêi pro tro cheăng hnê tối, mơhnhôk mâu rơpŏng kuăn pơlê tro tơdjâk xua kong mế têa lân lu, lăm troh ối a tíu ối tơniăn, troh nôkố hiăng châ 100 rơpŏng. Tiô tối hdrối tung khế 8, khế 9 pơtối mơhnhôk tâi tâng mâu rơpŏng ki u ối lăm mot ối a kơpong pro pơlê nếo, vâ tơniăn ivá châ chăn ƀă tơmeăm ăm kuăn pơlê”.

Rơtế ƀă troăng hơlâ tŏng gum dêi tơnêi têa, tung pơla hdrối nah, mâu tíu pêi cheăng mố đô̆i ki pro đông a cheăm bêng hiăng lăm ngăn, pêi pro túa pơkâ gum kuăn pơlê xĕn dêi hngêi ƀă tơmeăm troh a tíu ối nếo a Ia Hiao. Lối 50 ngế kăn ƀô̆, mố đô̆i Đăi đô̆i ƀô̆ ƀinh 1, Khu pơkuâ ngăn lêng kơpong 3 - Thống Nhất (Khu pơkuâ ngăn lêng kong pơlê Gia Lai) hiăng troh Ia Hiao vâ gum vâi krâ kuăn pơlê ‘nhiê dêi hngêi ối, xĕn dêi kế tơmeăm ƀă vêh pro hngêi a kơpong tíu ối nếo.

Môi tung mâu tíu ối nếo dế rế hía rế hiăng vâ pro klêi a kơpong tơnêi Điểm 9. Sap ing mâu tíu ối ki tiah hmâ hmâ tro têa lân mơnhâu troh châ chăn, kuăn pơlê Ia Hiao ro lăm troh ối tơkŭm, ai tŭm troăng prôk, ƀă ai tơdroăng rêh ối tơniăn lĕm.