‘Noăng têa kơxĭ Xóm Rớ ối tung bêng Phú Yên, kong pơlê Dak Lak mâu hâi achê kố tơ’mot hên kơdrâm kuăn pơlê ƀă tơmối. Hyôh kong prâi rơngiâp lĕm, pakĭng ‘noăng mê cho kơno cá Đông Tác, ‘na ngiâ cho bo cheăng têa kơxĭ Đà Diễn ƀă mâu plong tuk mot lo. Ngăn ngi ‘na Kơnhŏng cho ngo Chóp Chài ƀă kơphô̆ Tuy Hòa. Ngăn tơrôu ngi troăng mâ hâi Lâ cho kông Hùng Vương ối a kĭng têa kroăng Đà rằng. Tâi tâng pro chiâng um kchuâ ki lĕm dêi kong kế ki chiâng xêh.

Dâng 3 hơnăm kố, mot tung rơnó pơtê hriâm, tíu kố tơ’mot hên mâu vâi pú hơnăm ối nếo lăm troh a kơxê măng. Sap ing môi pơlê ki tro têa kơxĭ tâk đik pro tơ’nhiê, nôkố Xóm Rớ chiâng tíu troh dêi tơmối pro kuăn pơlê, pơlê têa kơxĭ kố phiu ro tung ihiâm mơno. Môi ngế kuăn pơlê phiu ro ăm ‘nâi:

“Nôkố ‘mêng rơnêu, sơng pik môi tiah kố tơmối ôm hyô vâi troh akố hên. Mê nôkố kuăn pơlê akố tơkŭm lo tê mơdró xuân hên, mê liăn ngân pêi lo nôkố xuân chía hên tâ há”.

Tơdroăng ki lĕm dêi ‘noăng têa kơxĭ Xóm Rớ ai vâi troh hên sap ing tơdế khế 6 pơla hdrối kố nah, drêng mâu ƀê tong kơdât têa châ pơhlêh pro nếo ƀă mâu mơngiơk drêh, tum, trĭng, prâp ƀă hên mâu mơngiơk ki ê rơ-eăng tung dế kong ƀă a têa kơxĭ drêh ngiât. Hên kuăn pơlê akố ƀă tơmối troh ngăn, xup um malối cho a kơxo má ƀă a kơxê măng, drêng tôu mâ hâi pro chiâng mâu tơdroăng ki ngăn tơviah phá. Môi ngế tơmối ro rih tối:

“Hdrối nah á hiăng troh akố, drêng mê nah akố nếo sơng pik mê drêng kố á lăm troh nếo. Chi view rơtuh dollar yoh, lĕm khât”.

Sap ing têa sơng dêi môi ngế tŏng gum ăm, bêng Phú Yên hiăng mơhnhôk mâu ngế ki pleăng dêi hnoăng rơtế ƀă ngế cheăng sơng pik ki rơkê mê sơng mơngiơk ăm mâu ƀê tong ki kơdât khía ‘noăng têa kơxĭ Xóm Rớ. Mâu ngế ki pleăng dêi hnoăng ăm ‘nâi, nhŏng o ngin pêi plâ hâi măng pêi tung pơla kong tôu, cheăng sơng pik ƀă mâu tơdroăng ki pro krúa ‘na ngiâ, sơng hdrối, sơng tâi mâu mơngiơk la vâi hlo ro drêng châ hên ngế troh ôm hyô.

“Pơhlêh nếo, hlo gá lĕm tâ ăm bêng ngin, nhŏng o ngăn hlo xuân kơdroh iâ ki tơbrêi. Pro to lâi hâi hlối mê kố hiăng klêi cho tơdroăng cheăng dêi ngin châ kuăn pơlê, tơmối hâk vâ mê tâ ro khât”.

Tơdroăng “xâp ếo nếo” ăm mâu ƀê tong ki kơdât khía têa kơxĭ a ‘noăng Xóm Rớ ôh tá xê to gum pro lĕm tơnêi tơníu kĭng têa kơxĭ mê ối pro tơ’nôm tơmeăm ki châ lăm ngăn ăm tơmối tung rơnó pơtê hriâm 2026. Kố ôh tá xê to mơdêk ki kơnía dêi tơnêi tơníu ki chiâng xêh, thăm mơdêk mơjiâng pro ôm hyô a bêng, mê ối ăm hlo, ivá tơ’mot tơmối ôm hyô ôh tá xê kal troh ing mâu tơdroăng ki ‘no liăn pêi cheăng hên, mê sap ing tơdroăng tơpui tối dêi tơná kăn pơkuâ ƀă kuăn pơlê ƀă tơnêi tơníu a bêng dêi tơná.