Tung pơla kong tôu troăng prôk khăng lĕm, kuăn pơlê thôn Kim Môn, cheăm Chư A Thai, kong pơlê Gia Lai lo pro troăng mot tung thôn, po rơdâ troăng prôk kân troh 8 mét. Vâ troăng prôk kố rĕng pro klêi, hên rơpŏng kuăn pơlê hiăng ‘nhiê tah dêi kơnâng, pleăng dêi tơnêi. Rơpŏng pôa Phạm Văn Hùng cho môi tung mâu rơpŏng ki djâ troăng ahdrối, ‘nhiê tah dêi kơnâng, pleăng lối 74m2 tơnêi. Tung toăng hngêi ki ối achê troăng dế châ po rơdâ, pôa Hùng tối ki ro drêng hlo pơlê cheăm rế hía rế pơhlêh:

“Rơpŏng á pleăng tơnêi sap ing víu troăng ki ton mot tung plông ai 3 mét, ngin môi tuăn rơtế ƀă Tơnêi têa pro troăng prôk vâ pơlê cheăng gá krúa lĕm, troăng prôk tơ’lêi hlâu, tơmeăm pêi lo ing chiâk deăng châ chơ tơ’lêi lĕm”.

Hdrối nah, mot tung rơnó poê xo tơmeăm, rơxế kân ôh tá châ mot tung kố vâ roê tơmeăm pêi lo ing chiâk deăng xua troăng gá kŭn, hên tíu hiăng tơ’nhiê. Vâ tơbleăng po rơdâ mâu troăng prôk tung thôn pơlê, rơtế ƀă mâu khu kăn ƀô̆ a cheăm, kuăn pơlê cho ngế ki hnê tối, mơhnhôk dêi rơpó rơtế veăng pêi. Pôa Dương Văn Phon, a thôn Hải Yên ăm ‘nâi, ƀă vâi krâ kuăn pơlê akố, pleăng môi iâ tơnêi  vâ ai troăng prôk kân rơdâ ăm nôkố ƀă xo ah hmôi cho tơdroăng ki tơxâng.

“Ôh tá ai tơdroăng klâi kăn ƀô̆ mơhnhôk, kuăn pơlê ngin ối mơhnhôk dêi rơpó, vâi krâ kuăn pơlê pêi pro xua rêm ngế, rêm ngế xua tơná mê rơtế mơeăm. Lŭp cho pin hía môi iâ tơnêi, la ki pơxúa cho troăng Tơnêi têa pro ăm pin kân rơdâ pin prôk lăm troh tá ah, ôh tá xê to rơxông pin, rơxông kuăn ‘nĕng pin ai troăng prôk kân rơdâ, tiah mê kuăn pơlê nếo mơnhông”.

Pôa Trần Văn Nguyên, Kăn pơkuâ hnê ngăn Chi ƀô̆, Ngế xiâm pơkuâ thôn Hải Yến, cheăm Chư A Thai ăm ‘nâi, tơdroăng ki ro cho 79 rơpŏng kuăn pơlê dêi péa to thôn ki rêh ối drô troăng mê tâi tâng pơrá môi tuăn pleăng tơnêi vâ po rơdâ troăng, ăm hlo ki môi tuăn khât vâ pêi pro troăng hơlâ pơkâ dêi Tơnêi têa.

“Vâi krâ kuăn pơlê phiu ro xua troăng prôk kố hdrối nah gá trâp hliâk tơ’nhiê. Drêng hnê tối ăm vâi krâ kuăn pơlê bô bố xuân môi hiâm mơno pleăng tơnêi, ‘nhiê tah dêi kơnâng hdrối nah hiăng mơ-eăm pro krá kâk. Ai rôh châ Đảng, Tơnêi têa pro ăm troăng prôk kố mê vâi krâ kuăn pơlê phiu ro khât”.

Cheăm Chư A Thai cho kơpong pêt báu klâng ki kân peăng má hâi Lâ kong pơlê Gia Lai. Mơnhên troăng prôk cho ivá cheăng ki kal ăm mơnhông, cheăm hiăng pro 18 to troăng mot tung thôn pơlê ƀă tâi tâng kơxô̆ liăn pro lối 17,4 rơtal liăn. Tung mê, kuăn pơlê hiăng pleăng vâ chê 5.000m2 tơnêi pro troăng, veăng gum lối 1,1 rơtal liăn. Pôa Phạm Văn Lượng, Phŏ Kăn pơkuâ hnê ngăn Đảng ủi, Kăn hnê ngăn Vi ƀan cheăm Chư A Thai ăm ‘nâi, cheăm dế pơtối tơbleăng pro tơ’nôm 7 to troăng nếo ƀă châ xo tơdroăng ki môi tuăn khât dêi kuăn pơlê.

“Tơbleăng pro mâu troăng prôk hiăng châ xo tơdroăng ki môi tuăn khât dêi kuăn pơlê kuăn pơlê a mâu thôn, gum kăn pơkuâ rĕng tơbleăng pro mâu tơdroăng tơkêa. Tung pơla tơbleăng ngin hiăng mơjiâng tôh mơhnhôk hnê tối xo tơnêi ƀă hiăng tơkŭm mơhnhôk hnê tối, tá khu pơkuâ cheăng kal kí dêi mâu thôn veăng mơhnhôk hnê tối ăm vâi krâ kuăn pơlê pêi pro rôh mơhnhôk pleăng tơnêi pro troăng”.

Mâu troăng prôk dế rế hía rế châ po rơdâ a Chư A Thai, kong pơlê Gia Lai ôh tá xê pro tơ’lêi hlâu tung prôk lăm, chơ tơmeăm mê ối cho mơhno ăm hiâm mơno tơrŭm, môi tuăn dêi kuăn pơlê tung mơjiâng thôn pơlê nếo.