Tiô tơdroăng ki hmâ loi sap ing chal vâi krâ roh nah dêi mơngế Rơđế, klêi kơ’nâi tung rơpŏng hngêi lơ tung pơlê ai mơngế hlâ, ki rơhêng vâ tối xua châi tamo, mê ki xú ŭm, tơdroăng hơgốu ki krêa tung hngêi trăng kal athế xut tah lôi vâ tơdroăng rêh kâ ối pơtối châ vêh trối hdrối nah nếo. Xua ti mê, klêi kơ’nâi hiăng ‘mế kiâ, rơpŏng, hdrông hdrê ƀă mâu ngế ki veăng lăm ‘mế kiâ mê hmâ pêi pro tơdroăng ki lăm hum têa, pro mơgrúa dêi châ chăn ƀă hmân ếo a kơno têa lơ a têa kroăng ki hmâ tơkŭm kơdrâm mơngế. Pôa Zôn - Krâ pơlê, ối a ƀuôn Wiâo A, cheăm Krông Năng tối ăm ngin ‘nâi ‘na khôi túa ki kố hiăng ai sap ing ton nah tung tơdroăng rêh ối, ‘na tuăn loi dêi hdrông Rơđế:

“Vâi hmâ khĕn mê cho khôi túa ki tah lôi ki ‘mêi, ki ŭm ki krêa a châ chăn kuăn mơngế, lăm roh ếo pơtâk, hmân a kơno têa lơ a têa kroăng vâ têa kroăng mơhiu tah lôi mâu kơmôu, mâu pơreăng, ôh tá ăm mâu tơdroăng ki ‘mêi, ki xú ŭm ối vêh krêa a châ chăn kuăn pơlê”.

Ôh ta xê to klêi kơ’nâi lăm ‘mế kiâ, mê klêi kơ’nâi lôi tơnâp kiâ, mơngế Rơđế xuân hmâ tơkŭm po mơdĭng ki tah lôi ki ŭm, ki ‘mêi. Klêi kơnâi rơkâu xối koh pơ’lâng mơngế ki hiăng hlâ, tâi tâng pơlê lo a têa kroăng vâ i hum, lăm tăng gui ká, lăm kriê kơchâi tung kong vâ kơdroh tah lôi tơdroăng sĭng khéa ƀă rơkâu xối ivá châ chăn, tơdroăng ki tơniăn ăm kuăn pơlê ki ối rêh. Pâ Roma, mơngế ki châ kuăn pơlê a ƀuôn Wiâo B ai tối tiah kố:

“Chal vâi krâ nah vâi ối rak dêi tiah mê păng ‘nâng, tung pơlê klêi kơ’nâi ‘mế kiâ cho mơngế tung rơpŏng hngê hiăng hlâ, lơ tung rơpŏng, hdrông hdrê, ai drêng ‘nâ klêi kơ’nâi lôi tơnâp kiâ, vâi hmâ pêi pro tơdroăng ki xut tah lôi tơdroăng hơgốu, tah lôi ki xú ŭm, ki ‘mêi vâi hmâ brôk dêi pó chu a têa kroăng hum roh jíu. A rơnó tôu mơdrăng mê vâi hmâ brôk dêi pó lăm tah ki xú ŭm, xú ‘mêi a têa kroăng, ai drêng ‘nâ vâi hum, roh, jíu, ƀă tăng gui ká, kơto rui vâ tăng lăm rup ká ƀă lăm kriê kơchâi tung kong vâ i kâ tung kong, ing mê, vâ tah lôi tơdroăng ki hơgốu ƀă piu hiât lôi tơdroăng ki sĭng khéa tung rơpŏng hngêi. Ahdrối nah, klêi kơ’nâi pêi pro mâu tơdroăng ki kố, mê tơdroăng ki rơkâu xối, ôu kâ kô pro klêi tung môi hâi, vâi hmâ brôk dêi pó lăm chu a têa kroăng hum roh jíu, tí tăng lăm rup ká, nốkố, ngăn to tung tơdroăng ki tơ’lêi hlâu, ai drêng ‘nâ vâi ối pêi pro hên tơdroăng ki kố ki mê”.

Hâi kố, xua tơdroăng rêh kâ ối hiăng pơhlêh, khôi túa ki xut tah ki ‘mêi, ki xú ŭm ôh tá châ tơkŭm pro trối hdrối nah xếo. Méluâ ti mê, hên rơpŏng hngêi a Krông Năng, kong pơlê Dak Lak xuân ối pơtối rak vế khôi túa, vêa vong ki kố, ngăn mê cho khôi túa ki vâ mơhnhôk tuăn mơno klêi kơ’nâi ai mơngế hlâ. Ngoh Pâ Bi, mơngế ối tung Khu kăn teăng mâ mơngế hơnăm hiăng krâ a cheăm Krông Năng tối ăm ngin ‘nâi:

“Tiô khôi hmâ dêi kuăn ngo akố, drêng ai mơngế hlâ, méluâ mê cho ai tơdroăng hlâ ki klâi, rơpŏng hngêi ƀă hdrông hdrê klêi kơ’nâi lăm ‘mế, vâi ting tông djâ lăm ‘mế a tơnâp, hâi kơ’nâi mê, vâi tơkŭm troh a têa krông, têa kroăng, pói rơhêng vâ: Ki má môi, pói tơngah ăm rêm ngế ai ivá mo rơdêi têi ‘răng, rêh ối tơniăn lĕm, tah lôi mâu tơdroăng ki hơgốu tung rơpŏng hngêi. Ki má péa nếo cho hum, roh, jíu, mơgrúa tah lôi tâi tâng ki kơmôu, ki xú ŭm, xú ‘mêi vâ ga pôi ta krêa tung châ chăn, roh krúa lĕm ăm hmân ếo, châ chăn dêi tâi tâng rêh ngế tung rơpŏng hngêi. Ki má pái nếo, tah lôi tâi tâng mâu tơdroăng ki pro pin sĭng khéa hơ’nêng, tơbrê tơbrêh, khéa kho tung mâu hâi klêi kơ’nâi ‘mế kiâ mê. Xua mê, athế tơkŭm po tơdroăng ki lăm tah lôi ki xú ŭm, xú ‘mêi a têa kroăng, rế lăm xah hêi, lăm kriê kơchâi, tăng rup ká rơtế ôu kâ tung kong. Ahdrối nah, tung pơlê ai rui, vâi ối djâ rui lăm tung têa vâ pro têa mơ’nok vâ ing mê, rêm ngế gui ká, ai drêng ‘nâ tâi pơlê lăm tŭm. Nốkố, xua ai hên tơdroăng cheăng, tơdroăng rêh kâ ối hiăng phá mê bu tơkŭm po to tung rơpŏng hngêi, hdrông hdrê achê, ôh tá ai tơdjâk troh hên ngế tung pơlê xếo”.

Khôi túa ki tah lôi ki xú ŭm, xú ‘mêi dêi mơngế Rơđế a Krông Năng, kong pơlê Dak Lak ôh tá xê to pro mơgrúa châ chăn klêi kơ’nâi lăm ‘mế kiâ mê ối cho tơdroăng ki vâ hnê tối ăm kuăn pơlê pơtối rak vế. Ngăn mê cho túa ki rêm ngế rơtế vâ tah lôi tơdroăng ki sĭng khéa, hơ’nêng hơ’no klêi kơ’nâi ai mơngế tung rơpŏng hngêi hlâ, kơdroh tah lôi tơdroăng ki khéa hơ’nêng, mơhnhôk dêi pó pơtối rêh ối tơniăn lĕm, ivá mo sêi, ro rih ƀă tơrŭm tơrôa tung pơlê pơla, cheăm bêng.