Tơpui tơno mơhnhôk kơdrâm văn ngê̆ sih, giảng viên, kăn ƀô̆ mâu lêng ƀă sinh viên veăng, rơtế tơpui ‘na ki kơnâ dêi mâu ƀai chêh ‘na Pôa Hồ Chí Minh, Kăn xiâm hnê ngăn tơnêi têa hneăng apoăng ƀă hnoăng dêi khôi túa lĕm pơchuât tung tơbêng tơdroăng rêh ối, tơdroăng ki ‘nâi hriâm xêh ăm rơxông ối nếo nôkố. Hên rơkong tơpui tối, tung chal xúa kŏng ngê̆ kơxô̆, tơdroăng pơchuât kơxop mơ-éa ‘na Pôa Hồ ôh tá xê to gum rơxông ối nếo hlê plĕng tơ’nôm ‘na tơdroăng roh ton nah hdroâng mơngế mê ối gum mơjiâng vêa mơno, tơdroăng rêh ối ƀă hnoăng cheăng ƀă pơlê pơla.

Tiô Thak sih Nguyễn Thị Phương, Giảng viên Hngêi trung Đăi hok Luât Hà Nội a Dak Lak, tơdroăng châ achê mâu ƀai chêh ‘na Pôa Hồ nôkố ôh tá xê to ing kơxop mơ-éa in mê ƀă hên troăng ki ê tơtro ƀă rơxông ối nếo.

‘’Khôi túa lĕm tro pơchuât cho lĕm tro ‘nâng. Laga nôkố ôh tá kal pó thế rôe kơxop mơ-éa vâ pơchuât mê kô chiâng tơmâng kơxop mơ-éa tơpui, pơtih môi tiah VOV Live, ngăn phim tư liê̆u lơ mâu tơdroăng ‘na tơdroăng roh ton nah. Mê xuân cho tơdroăng ki vâ châ ‘nâi tơdroăng ki rơkê plĕng’’.

A tơpui tơno kố, jâ Linh Nga Niê Kdăm, ngê̆ sih, ngế hriăn plĕng khôi túa lĕm tro tối hên tơdroăng ki pâ vế tung ngoâ tung mâu roh châ trâm Pôa Hồ, ing mê pâ vế tung ihiâm mơno um méa môi ngế kăn xiâm pơkuâ rêh ối môi tiah kuăn pơlê há, achê ƀă kuăn pơlê ƀă đi đo ăm tơdroăng tuăn pâ ki má môi ăm kuăn pơlê, vâi hdrêng. Jâ xuân tối troăng tơmiât mâu ƀai văn hok ‘na Pôa Hồ xuân ai tơdroăng ki troh lâp lu ó rơdêi ƀă rơxông vâi hdrêng hâi kố.

“Á pói tơngah mâu tơdroăng hơ’muăn, mâu tơdroăng ki á tối hâi kố ôh tá xê to vêh tơbâ um méa Pôa Hồ Chí Minh, Kăn xiâm hnê ngăn tơnêi têa hneăng apoăng, ngế ki ô eăng châ pơlê pơla mơnhên nhuô̆m khôi túa lĕm tro lâp plâi tơnêi, mê ối pro ăm tơdroăng ki hâk vâ ăm rơxông nếo ti tăng pơchuât mâu kơxop mơ-éa ‘na Pôa Hồ vâ ai tơ’nôm troăng prôk la ngiâ ăm tơdroăng rêh ối ƀă troăng tơmiât mơnhông dêi tơná’’.

Rơtế ƀă tơdroăng ki tơpui tơno, tơdroăng ối ai mâu tơdroăng rơhdruê, rơngê, vọng cổ ƀă trâm mâ tơpui tơno ti tăng ‘na tơdroăng rêh, tơdroăng pêi cheăng dêi Pôa Hồ Chí Minh, mơhnhôk kơdrâm sinh viên veăng. O Quản Phạm Anh Thương tối ăm ‘nâi, tơdroăng gum sinh viên ai tơ’nôm víu ngăn ‘na tơdroăng rêh ối, troăng prôk kăch măng dêi Pôa Hồ xuân môi tiah ki kơnâ dêi tơdroăng pơchuât kơxop mơ-éa tung hriâm tâp ƀă pơtâp dêi châ.

“Roh tơpui tơno cho kơnía ‘nâng. Ngin o châ ‘nâi trâu hơngế tâ ‘na mâu kơxop mơ-éa chêh ‘na Pôa Hồ Chí Minh, Kăn xiâm hnê ngăn tơnêi têa hneăng apoăng, châ trâm mâu ngế chêh văn, ngế chêh thơ ƀă mâu ngế pơchuât kơxop mơ-éa ƀă mâu tơdroăng ki tơmiât ƀă mâu víu ngăn phá dêi pó ‘na mâu kơxop mơ-éa chêh ‘na Pôa Hồ, kô chiâng hlê plĕng nhên tâ ‘na tơdroăng rêh ối Pôa Hồ, troăng rêh ối pêi cheăng dêi Pôa Hồ’’.

Tiô Ngế chêh văn Niê Thanh Mai, Kăn hnê ngăn Khu Văn hok Ngê̆ thuât kong pơlê Dak Lak, tơdroăng ki troh lâp lu mâu ƀai văn hok, tơdrá chêh ‘na Pôa Hồ kô pơtối châ pêi pro ƀă hên troăng vâ djâ ki kơnâ ‘na ihiâm mơno, ihiâm tuăn, troăng pêi cheăng dêi Pôa Hồ Chí Minh troh achê tâ ƀă pơlê pơla.

“Rơtế ƀă mâu tơdroăng djâ ki păng ‘nâng tơdrêng mê ngin xuân kô thâu mâu ƀai thơ, mâu ƀai rơhdruê ‘na Pôa Hồ ƀă ngin xuân kô pơtroh mâu tíu pêi cheăng, tung mê ai mâu bêng ƀă thăm nếo cho ngin xuân hiăng pêi cheăng ƀă mâu hngêi kroăng phâk ƀă mâu tíu kroăng phâk vâ kô chiâng mơ’no mâu ƀai mê ing rơ’jíu troh ƀă tâi tâng rêm ngế’’.

Tơpui tơno ôh tá xê to gum tơbêng tuăn pâ, ihiâm mơno nhuô̆m pâ ƀă Pôa Hồ Chí Minh, Kăn xiâm hnê ngăn tơnêi têa hneăng apoăng mê ối troh lâp lu khôi túa lĕm tro pơchuât tung pơlê pơla, ki rơhêng vâ tối cho rơxông ối nếo. Ing mâu kơxop mơ-éa, tơdroăng hơ’muăn ƀă tối ăm ‘nâi pó ki kơnâ ‘na Pôa Hồ, tơdroăng hiăng pro tơ’nôm tơdroăng hâk vâ rêm ngế tăng troh kơxop mơ-éa môi tiah troăng hriâm tâp, pơtâp ƀă păn tơdroăng ki pói vâ lĕm, rêh ối ai pơxúa.