Mơnhên a ‘núa têa kơxĭ Quy Nhơn, mâu hâi kố, tơmối troh akố kơdrâm phiu ro. A kơpong tơbăng kĭng kơno hum, ngoh Hồ Văn Thắng, ngế pêi cheăng tŏng gum hngêi ối pơtê kâ koi Hải Âu, đi đo hbrâ rơnáu, râng ếo ki đông pêng têa vâ tŏng gum, mâ séa ngăn rêm têa rơlâu. Ƀă ngoh, tơdroăng kố ôh tá ăm phêp ngoh tơngôu, xua tơdroăng trâm xía vâ kô ai drêng lâi ôh tá ‘nâi ôh.

“Á cho ngế tŏng gum, tơmối hum a têa kơxĭ kơpong peăng á mê xuân thế tơmâng ngăn, thế ngăn tơmối hum ti lâi lơ tâng ai tơdroăng thế chu lăm tŏng gum tơmối teăm tơdrêng, thâ gum teăm tơdrêng’’.

Ôh tá xê to a Quy Nhơn, a Kơpong ôm hyô Kỳ Co, kơxô̆ tơmối xuân tâk hên, tá drêng kong tô a kơhâi dế. Khu tŏng gum châ rah xo pêi cheăng hên, cano đi đo hbrâ rơnáu. Tơmối châ pơchân tối ôh tá chiâng klê pa kong kơpong kế ki đông pêng têa ki kât pro pơkâ. Ngoh Lê Thanh Hùng Anh, ngế tŏng gum akố tối ăm ‘nâi, drêng khu tơmối rế kơdrâm hên, ki pá tơdroăng cheăng rế kân, pơkâ thế tơdroăng tơkŭm hên.

“Hum têa kơxĭ a Kỳ Co pơkâ mâu kơpong ai kế ki đông pêng têa mê kô tơniăn. Mâu vâi o mê hum a kĭng, tâng lăm a hơngế mê hlŭm xơplê tơbleăng mot a kĭng. Tâng mơngế kân lo a têa têa trâu luâ ko ai têa hiu mê xuân hlŭm xơplê tối tơbleăng prôk mot a kĭng. Tơdroăng ki thâ kô xúa mô tô têa rơtế phôn ki tơpui vâ tơbleăng vâ rêm ngế rơtế tŏng gum’’.

Tơdroăng ki ai mâ hmâ đi đo dêi khu tŏng gum, rơtế kế ki đông pêng têa khoa hok hiăng pro tơdroăng ki tâ tơniăn lĕm ăm tơmối. Ngoh Nguyễn Hoàng Anh, tơmối ôm hyô troh ing Hà Nội, mơnhên tơdroăng tơniăn akố:

“Á hlo cho lĕm, rơkê, hên tíu ôh tá ai khu tŏng gum môi tiah akố, ai kố ai khu ki tŏng gum ƀă kế ki đông pêng têa kơxĭ xua mê á hlo cho tơniăn ƀă hmiân tuăn tâng klê’’.

Tiô mơnhên, mâu tíu ôm hyô têa kơxĭ môi tiah Quy Nhơn, Kỳ Co, Eo Gió, Nhơn Lý lơ Bãi Xép dế mơhnhôk kơdrâm kuăn pơlê ƀă tơmối. Laga, tơdroăng ki tơ’lêi klâk têa xuân ai drêng hên ngế ôh tá bê tơmâng, klê lo pakong tơniăn lơ mot a kơpong têa hiu hơngế kĭng. Drêng ai tơdroăng kố, khu râ kăn pơkuâ hiăng tơrŭm ƀă mâu khu cheăng thăm pơtâng tối, pơchân tối ƀă xing xoăng khu ki gâk a hên tíu.

Pôa Phan Tấn Hoàng, Phŏ Kăn hnê mơhno má môi Vi ƀan bêng Quy Nhơn tối ăm ‘nâi, kong pơlê hiăng rah xo tŭm tâi tâng khu tŏng gum ƀă tŭm tơmeăm tŏng gum, tơkŭm po gâk pêi cheăng tiô chôu ki tơtro, tơdrêng amê pơtối mơdêk ivá séa ngăn.

“Mơhé ai khu tŏng gum ƀă troăng tŏng gum laga xuân mơhnhôk kuăn pơlê drêng hum têa kơxĭ thế sâp ếo ki đông pêng têa drêng klê hơngế vâ tơniăn lĕm. Pakĭng mê bêng xuân dế krếo mâu tíu ki hnê mơhno séa ngăn vâ krâ camera kring tơniăn hlối hbrâ mơdât klâk têa. Drêng rĕng châ hlo mâu mâu tơmối troh ƀă Quy Nhơn mê kơmăi camera kô tơbleăng tơdrêng vâ ai troăng pêi teăm tơdrêng’’.

A râ kong pơlê, tơdroăng tơniăn ăm tơmối xuân châ hnê mơhno kơtăng. Kăn hnê ngăn Vi ƀan kong pơlê Gia Lai hiăng pơkâ mâu kơvâ cheăng, bêng thăm mơnhên ngăn, séa ngăn mâu tơdroăng xah hêi ro a têa. Pôa Bùi Trung Hiếu, Phŏ Kăn pơkuâ Khôi túa lĕm tro, Tơ’noăng Ivá ƀă Ôm hyô kong pơlê Gia Lai tối ăm ‘nâi, tơdroăng mơjiâng troăng ki pêi cheăng rĕng, rơtế ƀă lăm séa ngăn, mơnhên ngăn krá kô ai troăng pêi ki xiâm tung rơnó ôm hyô.

“Kăn hnê ngăn Vi ƀan kong pơlê Gia Lai hiăng ai hnê mơhno tơmâng troh tơniăn ăm tơmối troh lăm ngăn a kong pơlê, Khu pơkuâ Khôi túa lĕm tro, Tơ’noăng ivá ƀă Ôm hyô hiăng tơrŭm ƀă mâu kơvâ cheăng, mâu bêng séa ngăn mâu tơmeăm ki tơniăn ăm tơmối drêng hum têa kơxĭ, pro ti lâi ăm rơnó tô mơdrăng kố tơmối troh ƀă kơpong têa kơxĭ dêi Gia Lai tơniăn tung tơdroăng xah hêi’’.

Ki nhên khât ăm hlo, pakĭng tơdroăng mơ-eăm dêi khu cheăng, hlê plĕng dêi rêm ngế kuăn pơlê ƀă tơmối xuân cho tơdroăng ki pơkâ. Tơdroăng pêi tiô mâu pơchân tối, ôh tá klê lo pa kong kơpong tơniăn, hbrâ xúa ếo ki đông pêng têa drêng kal kô gum kơdroh mâu tơdroăng ki trâm xía vâ, vâ rêm troăng prôk troh ƀă têa kơxĭ đi đo cho mâu tơdroăng ki châ tâ châ hlo tŭm tâi tâng ƀă tơniăn lĕm.