Ƀă tơdroăng pơxá “Tơdjêp túa lĕm tro khôi túa, vêa vong”, mơđah tơbleăng ăm kuăn pơlê ngăn 100 kơtâ um xup dêi mâu ngế ki rơkê xup um dêi Việt Nam ƀă Hàn Quốc. Tung mê, ai 60 kơtâ um dêi mâu ngê̆ sih Hàn Quốc tơbleăng ki lĕm mơnâ ‘na kong kế, túa lĕm tro ƀă kuăn mơngế Hàn Quốc. 40 kơtâ um dêi mâu ngê̆ sih Việt Nam tơkŭm mơđah a mâu um kơchuâ lĕm hên mơngiơk ki eăng bâ, tối tơdroăng rêh ối túa lĕm tro ƀă ki pơ’lêh dêi kơpong tơnêi Dak Lak tối krê, Tây Nguyên tối tơdjuôm.

Tiô pôa Hồ Sỹ Minh, Phŏ kăn xiâm hnê ngăn Khu xup um Việt Nam, mơđah mê cho tơdroăng pêi pro ai pơxúa tung tơdroăng trâm mâ mơhno tơbleăng túa lĕm tro pơla mâu ngê̆ sih ki rơkê xup um dêi péa tơnêi têa, veăng pro trâu rơdâ tâ nếo tơrŭm cheăng tung tŭm tơdroăng pơla Việt Nam – Hàn Quốc.

Mơđah tơbleăng um hơnăm kố hdró 5 hơnăm nếo trâm mâ pơla Khu xiâm ngăn ‘na ngê̆ sih xup um Việt Nam - Khu xiâm ngăn ‘na ngê̆ sih xup um Hàn Quốc ƀă cho mơđah um ki má 2 tơkŭm po a Việt Nam.

“Mâu um xup ‘na Hàn Quốc mơhno khôi túam vêa vong dêi vâi, xuân ai mâu tơdroăng pro mơdĭng, xuân ai mâu kuăn ngo, ƀă mâu um ‘na tơnêi têa pin. Mê a tơmiât mơđah tơbleăng um rôh kố cho môi tơdroăng trâm mâ trâu rơdâ tâ ‘na túa lĕm tro, ‘na ôm hyô ƀă malối cho hlê plĕng ‘na kuăn mơngế dêi kơpong tơnêi kố. Mơđah tơbleăng ối pro ăm péa tơnêi, péa hdroâng kuăn ngo achê dêi rơpó ƀă hlê dêi rơpó hên tâ”.

Tíu mơđah um châ tơkŭm po a Tíu mơđah um tơmeăm khoăng Dak Lak, pakĭng Hngêi trá xŏn dêi mơngế Rơđế, pro tíu ki vâ tối mơhno túa lĕm tro ki tơviah ăm tơdroăng trâm mâ rôh kố.

Klêi leh pơxiâm po, mâu ngê̆ sih  xup um Việt Nam ƀă Hàn Quốc kô veăng pêi mâu tơdroăng lăm xup um tơdrêng, tăng ‘nâi plĕng tơdroăng rêh ối, ƀă túa lĕm tro kuăn pơlê mâu hdroâng kuăn ngo kong pơlê Dak Lak. Hdrối mê, sap hâi lơ 7/5, khu ngê̆ sih 2 tơnêi têa hiăng ai hâi pơkâ pêi cheăng hriăn lăm xup um, tơkŭm ƀă lăm ôm hyô ngăn a mâu tíu ki vâi ô eăng a mâu kong pơlê kơpong kĭng têa kơxĭ ‘na hdroh Tơdế tơnêi têa.. Pôa (Son Bi-eông Hyồ) Soun Byeong Hyo, Ngế pơkuâ djâ Khu xup um Hàn Quốc, tối ki tơviah lĕm ƀă um kơpong tơnêi ƀă kuăn mơngế a Việt Nam tối tơdjuôm ƀă Dak Lak tối krê.

“Rơtế ƀă mâu ngê̆ sih xup um dêi Việt Nam tung mâu hâi lăm xup um mê khu kố hiăng châ xup hên mâu um lĕm ƀă drêng djâ vêh troh Hàn Quốc mê kô tơbleăng ăm kuăn pơlê Hàn Quốc ‘nâi mâu um, ‘na tíu ki lĕm krip dêi Việt Nam, malối cho a Dak Lak ƀă Buôn Ma Thuột. Á hiăng lăm troh a Việt Nam hên rôh, tung mê ai Mù Cang Chải cho tíu ki ai hên um xup vâ ki lĕm chôu pâ tung tuăn ƀă pơtối cho tíu kố, a Buôn Ma Thuột xuân ai mâu um ki lĕm. A kô pơtroh ăm mâu um mê vêh nếo klêi mê rah ing mâu um tung rôh lăm prôk kố''.