A cheăm Thanh Yên, mơdĭng ki kal - mơdĭng kơxế têa dêi hdroâng kuăn ngo Lếo nếo châ po ôh ti xê to tơdroăng loi tĭng apoăng hơnăm, mê dế rế hía rế châ tơkŭm po tiô túa ki krâu tâ, tro ƀă mơđah tơbleăng ôm hyô. Mơdĭng kố cho vêh mơhno tŭm mâu tơdroăng rơkâu xối chal krâ môi tiah rơkâu xối pâ tơdroăng mơhúa, kât kơxái prế a kŏng, rơkâu xối xeăng têa ƀă hên ki ê mâu tơdroăng kố cho hmâ trâm tung tơdroăng rêh ối tuăn mơno dêi kuăn pơlê. Nâ Nguyễn Thị Nguyệt, a Điện Biên Phủ, kong pơlê Điện Biên tối:

“Rôh apoăng ‘nâi ƀă troh veăng ngăn a rôh po mơdĭng kơxế têa a Thanh Yên, maluâ troăng prôk ối xơpá ƀă hơngế la troh ai mâ akố á hlo ro khât xua tơdroăng kố ai kơdrâm kuăn pơlê mê á hlo tâng mơdĭng kố châ tơkŭm po đi đo mê vâi krâ kuăn pơlê kô ai tíu xah hêi vâ ối châ rak vế túa lĕm tro hdroâng kuăn ngo dêi Lếo”.

Pôa Trần Thế Hoàn, Phŏ Kăn hnê ngăn Vi ƀan cheăm Thanh Yên, kong pơlê Điện Biên ăm ‘nâi, sap ing tơdroăng ki tơkôm ton tơbrê dêi kuăn pơlê tung mơdêk mâu ki kơnía ‘na túa lĕm tro ƀă rơhêng vâ châ lăm ngăn dêi mâu tơmối, kăn pơkuâ cheăm Thanh Yên dế pơkâ troăng pêi ăm mơdĭng chiâng tơdroăng ôm hyô túa lĕm tro loi tĭng krê, tro ƀă tơdroăng cheăng tung la ngiâ, rak vế kế tơmeăm kơnía dêi cheăm.

“Vi ƀan hnê ngăn cheăm dế ai túa pơkâ rak vế ƀă mơnhông mâu tơdroăng ki kơnía lĕm dêi tơdroăng mơdĭng kố vâ chiâng túa lĕm tro ki lĕm ƀă tơdroăng ki kơnía git dêi cheăm. Kố châ mơnhên cho hnoăng cheăng ki kal tung tơdroăng pơkâ rak vế mâu tơmeăm kơnía git mơhno túa lĕm tro a cheăm dêi kong pơlê tung la ngiâ”.

Bêng Mường Lay cho tíu ki tơkŭm tơdroăng túa lĕm tro dêi mơngế Thái Trắng a kĭng têa Đà giang, túa pro ôm hyô pơlê pơla dế ăm hlo tơƀrê nhên. Mâu toăng hngêi trá chal krâ ôh ti xê to tíu rêh ối, mê ối chiâng tíu ối pơtê; mâu rôh kâ hmê dêi rơpŏng hiăng chiâng rôh ki châ ngăn mâu kế kâ kơhiâm; mâu um méa xuăng xòe, túa tơlá chiâng tơdroăng túa lĕm tro vâ mơđah tơbleăng ăm tơmối ngăn. Nâ Lò Huyền Giang, ngế ki ối a pơlê Chi Luông 1, bêng Mường Lay, kong pơlê Điện Biên ăm ‘nâi, tơdroăng ki tơdrêng dêi kuăn pơlê tung tơdroăng pro ôm hyô hiăng ai liăn pêi lo tơniăn.

“Drêng veăng pro ôm hyô pơlê pơla, á rơtế ƀă rơpŏng hngêi hiăng pêi lo liăn tơniăn sap ing mâu tơdroăng ki tơdah tơmối, pế pơchên kế kâ ƀă mơđah tơbleăng mâu tơmeăm dêi cheăm. Pakĭng mê, tơná á ối hriâm ƀối tơ’nôm hên mâu tơdroăng ki tơpui tơno ƀă tơmối, hriâm tê mơdró ƀă tơdah tơmối. Ing mê, pro ăm á hlo hâk tơngăm drêng veăng rak vế, mơđah tơbleăng túa lĕm tro dêi hdroâng kuăn ngo tơná troh ƀă mâu vâi pú tung tơnêi têa ƀă kong têa”.

Ngoh Lường Văn Muôn, Ngế pơkuâ pơlê ôm hyô pơlê pơla Phiêng Lơi, bêng Điện Biên Phủ, kong pơlê Điện Biên ăm ‘nâi: mâu kế kâ chal krâ dêi mơngế Thái, malối cho mâu kế kâ ki pôh dế châ vâi krâ kuăn pơlê tung pơlê xúa vâ pro tơmeăm ki kơhiâm sap ing rôh ki pế poh troh túa ki mơđah tơbleăng, vâ veăng mơdêk ki rơkê tung tê mơdró, pro ton hâi chôu lăm ngăn ƀă ối pơtê dêi tơmối ôm hyô.

“Ƀă mâu kế kâ dêi pơlê mê nôkố ngin hiăng ƀă dế pế pơchên kế kâ ‘na mâu kế kâ dêi mơngế Thái. Malối ngin hmâ pêi ‘na têa ôu vâ tê ăm tơmối. Ki hên tơmối drêng troh a pơlê mê pơrá hâk vâ”.

Môi tung mâu tơdroăng pơhlêh khât tung túa pro ôm hyô nôkố dêi kong pơlê Điện Biên cho tơdroăng ki pơtroh mâu tơdroăng cheăng, tơdroăng túa lĕm tro sap ing tíu pêi cheăng vêh a mâu pơlê. Xua kố cho tíu ‘măn rak tŭm ƀă tro khât mâu tơdroăng ki kơnía ‘na túa lĕm tro, hlối pro tơ’lêi hlâu vâ kuăn pơlê châ hlo tơdrêng lăm ngăn tung tơdroăng kơnía ‘na ôm hyô. Tiô pôa Trần Hải Hà, Ngế ki châ pơkâ thế Kăn pơkuâ Khu ngăn Túa lĕm tro, Tơ’noăng Ivá ƀă Ôm hyô kong pơlê Điện Biên, túa pêi kố ôh ti xê to pro thăm mơdêk ki châ ngăn châ hlo ăm tơmối, mê ối pro tơ’lêi hlâu tơrŭm rak vế ƀă mơnhông drêng kuăn pơlê chiâng ngế ki pro rế rak vế, rế tí tăng tơ’nôm ki kơnía ‘na túa lĕm tro.

“Tung rôh tơkŭm po mâu tơdroăng ‘na túa lĕm tro, ngin kô tơkŭm po hên tâ a mâu pơlê pro ôm hyô pơlê pơla, pơlê mơhno túa lĕm tro vâ pro tơ’lêi hlâu ăm mâu pơlê pro ôm hyô pơlê pơla, pơlê mơhno túa lĕm tro, mâu ngế ki pro Homestay ai rôh châ tơrŭm ƀă kơchơ mơdró, mơđah tơbleăng ƀă mơjiâng pro ôm hyô a pơlê, a thôn dêi tơná. Drêng tơmối troh akố, vâi kô châ ngăn, châ hlo ‘na túa lĕm tro, châ kâ mâu kế kâ akố, thăm mơnhông tơdroăng ki châ lăm ngăn ƀă thăm mơnhông hiâm mơno tơmối hâk vâ troh akố”.

Mâu pơhlêh ki nhên dêi ôm hyô Điện Biên châ mơhno ing mâu khế apoăng hơnăm 2026, kong pơlê tơdah dâng 550.000 ngế tơmối, tâk vâ chê 30% tâng vâ pơchông ƀă khế kố hơnăm hdrối. 72 hơnăm klêi kơ’nâi châ ƀlêi trâng Điện Biên Phủ, ivá hâk tơngăm mê xuân pơtối ối tơdjâk, chiâng tơdroăng tŏng gum tuăn mơno vâ Điện Biên hâi kố mơnhông tơƀrê. Drêng mâu tơdroăng kơnía ‘na túa lĕm tro khôi hmâ châ mơnhông, rak vế ƀă pơhlêh chiâng tơmeăm ôm hyô krê, tơnêi ki hdrối nah cho tíu tơplâ ki ó mê nôkố dế rế hía rế tối rơdêi tíu ối cho tíu troh ‘na mơhno túa lĕm tro.