Tung roh trâm mâ, péa pâ khĕn kơdeăn tơdroăng tơrŭm cheăng rế rak kal khât tung tơdroăng tơrŭm cheăng péa tơnêi têa ƀă tối nhên pêi cheăng trâu rơdâ tâ nếo ‘na tơrŭm pơla mâu kơ koan kring tơniăn, pêi pro tiô luât ƀă pơkâ luât tŏng gum.

Ing tơdroăng tơrŭm pêi cheăng ƀă dêi rơpó tung tŭm tơdroăng dêi Việt Nam - Ấn Độ, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa ƀă pôa Ajit Kumar Doval Ngế kum pêi hnoăng cheăng kring tơniăn Ấn Độ tối nhên tơdroăng ki kal tơrŭm pêi tơbrê tung tơplâ mơdât khu lêng ‘mêi, mâu ki ai xôi tơkâ luâ kong têa, mâu ki hêak pơloi tung măng ƀă mâu ngế ki mơnhâu pro tơdroăng ôh tá tro nếo nôkố. Ing mê, veăng kring vế tơniăn tơnêi têa ƀă rak tơniăn pơlê pơla dêi tơrêm tơnêi têa.

Péa pâ xuân môi tuăn mơdêk tơrŭm kring vế tơniăn ƀă hlối mơnhông po rơdâ tơrŭm tung mâu kơvâ cheăng kong ngê̆ môi tiah tơdroăng cheăng ‘na tuăn ngôa rơkê kuăn mơngế pro, pơ‘lêh kơxô̆, on tơhrik ƀă hnê mơngế pêi cheăng rơkê. ‘Na tơdroăng tung kơpong ƀă lâp plâi tơnêi, péa pâ vâ môi tuăn ‘na pơtối rak vế hơniâp lĕm, kring tơniăn ƀă pro tơniăn a troăng têa kơxĭ, troăng tơbai; tơleăng mơnhên ki tơbriât dêi rơpó ƀă tơdroăng tơpui pro hơniâp lĕm tro tiô luât lâp plâi tơnêi, cho Tơdroăng luât kĭ tơhrâ dêi Khu lâp kong têa ‘na Luât têa kơ xĭ 1982 (UNCLOS 1982).

Tơdrêng tung rôh lăm pôu râ kăn xiâm Ấn Độ, kơmăng hai lơ 5/5, pôa Tô Lâm hiăng troh pôu ƀă hlối pơkuâ hôp trâm mâ mâu kăn ƀô̆ mơngế pêi cheăng a tíu pêi cheăng teăng mâ ƀă kơdrâm mơngế Việt Nam ki rêh ối a kong têa Ấn Độ.