Xông tơpui a roh hôp, pôa Trần Thanh Mẫn, Kăn xiâm hnê ngăn Kuô̆k hô̆i tối, hvái ngăn hneăng cheăng Kuô̆k hô̆i hneăng má XV cho môi hneăng cheăng pá puât hên, pơloăng mơnúa drêng ai pơreăng kân COVID-19, lâp plâi tơnêi ai hên tơdroăng ki ôh tá tơniăn, tung tơnêi têa ai mơhot têa kân lân lu, pêi pro tơdroăng rah xo bro lế lĕm tro khu pêi cheăng tơnêi têa. Tung pơla mê, Kuô̆k hô̆i hiăng mơ-eăm, krá chân pêi pro troăng prôk la ngiâ, troăng pơkâ, troăng hơlâ dêi Đảng, luât dêi Tơnêi têa ƀă kơxô̆ tơdroăng cheăng kân.

Ai drêng Kuô̆k hô̆i hiăng thế pêi tơdrêng hlối, pêi kơmăng, pêi tá hâi Tơdrốu, Hâi tĭng gum ăm tơdroăng rah xo bro lế lĕm tro khu pêi cheăng tơnêi têa, tơkŭm po, tơdroăng ki kô djâ ăm châ tơƀrê, xêt khât, châ tơƀrê păng ‘nâng... Pôa Trần Thanh Mẫn, Kăn xiâm hnê ngăn Kuô̆k hô̆i kheăn kơdeăn mâu tơdroăng châ tơƀrê hiăng châ tung hơnăm 2025 tối krê ƀă tá hneăng cheăng Kuô̆k hô̆i hneăng má XV. Mơhnhôk tơdroăng tơ’noăng tung la ngiâ, Kăn xiâm hnê ngăn Kuô̆k hô̆i tối, hneăng cheăng Kuô̆k hô̆i hneăng má 16 cho hngăm, thế pơtối pơhlêh nếo troăng tơmiât pêi mơjiâng luât, pêi pro mâu troăng pơkâ, mâu mơgêi dêi Khu xiâm kal kí, Khu pơkuâ tơdroăng cheăng Đảng, vâ cheăng kâ – rêh ối pơlê pơla mơnhông mơdêk, rak tơniăn kring vế tơnêi têa, mơjiâng khu cheăng kal kí. Pơkâ má mơ’nui cho mơdêk tơdroăng rêh ối, gum ‘na kế tơmeăm khoăng ƀă ihiâm mơno dêi kuăn pơlê.