Tung rôh livestream a mơ’nui khế 4/2026 xua Khu Cheăng kơmăi kơmok ƀă tê mơdró Gia Lai tơrŭm ƀă Khu ngăn Tê mơdró điê̆n tưh ƀă Cheăng kâ kơxô̆ (Khu xiâm ngăn Kơmăi kơmok ƀă tê mơdró) tơkŭm po, kơƀăn ít hlá gai Hoàng Đông (cheăm Bình An, kong pơlê Gia Lai) hiăng tê lối rơpâu to kơƀăn bu tung pơla iâ chôu.

Nâ Hồ Thị Mỹ Phúc – ngế ki ngăn tíu pro kơƀăn ăm ‘nâi, kơƀăn kố châ pơkâ OCOP 3 hơlŏng sap ing hơnăm 2019, la hdrối nah bu tê to a tâ tá cheăm xua hâi khế ‘măn rak gá iâ. Klêi kơ’nâi xúa túa ki tâ tung tơdrong (khĕn cho hút chân không) vâ mơdon hâi khế xúa, tơtro vâ pơtroh troh a kơpong hngế, kơƀăn kố hiăng hmâ tê đi đo tung điê̆n tưh, ƀă mâu rôh ki vâi roê kơƀăn troh lối hrĭng to.

“Rêm rôh po Megalive dêi Khu ngăn cheăng kơmăi kơmok ƀă tê mơdró, mê kơƀăn dêi ngin châ tê tung măng pơlê pơla, rêm ngế ‘nâi troh hên tâ. Kố cho túa tê ki pro ăm khu mơdró rĕng mơnhông. Môi rôh po Mega live châ tê troh rơpâu đơn ki vâi roê. Kơƀăn ngin kô hút chân không, 2 troh 3 hâi kô troh a kŏng tơmối, mê ối rak ki lĕm dêi kơƀăn”.

Xuân môi tiah mê, Khu pêi cheăng tơrŭm Nông ngư nghiệp Mỹ An (cheăm Phù Mỹ Đông, Gia Lai) hdrối nah trâm hên xơpá ‘na tơdroăng ki tê têa rơmâ dêi tơná châ tiô pơkâ OCOP. Klêi kơ’nâi pơhlêh tê tung troăng hyôh internet, khu pêi cheăng tơrŭm hiăng po rơdâ kơchơ tê mơdró tê, ƀă kơxô̆ liăn châ xo tâk hên tung péa hơnăm hdrối.

Nâ Nguyễn Thụy Thúy Vi, Phŏ kăn hnê ngăn Hô̆i đong Kuan trĭ Khu pêi cheăng tơrŭm ăm ‘nâi: tê tung điê̆n tưh ôh ti pro ăm tơmối châ hlo châ roê xo hên mê ối pro tơ’lêi hlâu tung tíu ki tê mơdró tơdrêng, ing mê, pơhlêh mâu tơmeăm tê ƀă túa tê tơmeăm tơtro ƀă tơdroăng ki rơhêng vâ tê tung kơchơ tê mơdró.

"Hdrối nah, ngin bu tê to cheăm tê la klêi kơ’nâi mê drêng hlê plĕng ki ai hlâu dêi tê tơmeăm online mê ngin hiăng xup um mơđah tơbleăng clip ƀă po mâu rôh livestream tê tơmeăm tung tíu tê mơdró điê̆n tưh, lơ tung trang fanpage xiâm dêi khu pêi cheăng tơrŭm ƀă klêi mê kơxô̆ tơmeăm vâi roê tâk hên, ngin rế hía rế tơbleăng rơdêi ‘na ki rơdêi tê tơmeăm online hên tâ”.

Nôkố Gia Lai ai dâng 400–450 tơmeăm OCOP, ki hên cho tơmeăm pêi lo ing chiâk deăng dêi kong pơlê. Laga, mâu khu ngế ki rak ngăn tíu mơjiâng pro tơmeăm OCOP a kong pơlê ki hên cho ối pro iâ pro kŭn, tá hâi rơkê xúa ‘na kơmăi kơmok kơxô̆ ƀă tơdroăng ki châ tê tung kơchơ tê mơdró, tíu tê tá hâi tơniăn.

Tung péa hơnăm hdrối nah, hên rôh hnê ‘na tơdroăng ki tê tơmeăm ing troăng hyôh internet, livestream, mơjiâng pro tơdroăng kal kơxô̆ ƀă hên ki ê hiăng châ tơbleăng, gum kuăn pơlê pêi chiâk ƀă khu pêi cheăng tơrŭm rế hía rế hmâ ƀă tơdroăng ki tê mơdró tung măng pơlê pơla. Ing mê, po rơdâ kơchơ tê mơdró, mơjiâng pro inâi.

Pôa Nguyễn Đình Kha, Phŏ pơkuâ Khu ngăn kơmăi kơmok ƀă tê mơdró Gia Lai ăm ‘nâi, tung hneăng la ngiâ, kong pơlê pơtối mơnhên tê mơdró tung điê̆n tưh cho tíu tê ki kal. Hneăng hơnăm 2026 – 2030, kong pơlê kô tơmiât troh mơdêk rơdêi tê mơdró ing điê̆n tưh tơkâ luâ tíu tơkăng kong, ing mê ôh ti xê rế thăm mơdêk ki kơnía dêi tơmeăm pêi lo ing chiâk mê ối rế hía rế ăm inâi kong pơlê mơ-eăm châ tê tung kơchơ tê mơdró plâi tơnêi têa.

“Ngin hiăng chêh pro túa pơkâ pơhlêh kơxô̆ dêi kơvâ cheăng tê mơdró kơmăi kơmok. Tung mê, kơvâ tê mơdró tơtrŏng xúa kơmăi kơmok kơxô̆ tung mâu kơvâ cheăng tung mâu tíu tê mơdró điê̆n tưh. Ƀă kơvâ ki tê tơmeăm ngi kong têa ê, ngin tơtrŏng tung tê mơdró điê̆n tưh tơkâ luâ tơkăng kong tơrŭm ƀă mâu tíu tê mơdró điê̆n tưh lâp plâi tơnêi. Tiô tối hdrối tung khế 5 kố, ngin kô tơkŭm po môi rôh hôp, rôh trâm mâ tơpui tơno ‘na tê mơdró tơmeăm ing điê̆n tưh tơkâ luâ tíu tơkăng kong”.

Xúa kơmăi kmok kơxô̆ dế rế hía rế pro pơhlêh kế tơmeăm pêi lo ing chiâk deăng Gia Lai châ tê tung kơchơ tê mơdró, po mâu tíu tê ki rơkê ƀă tơƀrê tâ. Drêng kuăn pơlê pêi chiâk hiăng xúa rơkê kong ngê̆, mâu tơmeăm mơjiâng pro dâi lĕm dêi kong pơlê ôh ti xê châ rĕng tâ, mê ối mơnhông krá tơniăn drêng ai kơchơ kân.