A 5 cheăm tơkăng kong mê cho: Bờ Y, Ia Tơi, Ia Đal, Đăk Long ƀă Đăk Plô, kong pơlê Quảng Ngãi, mâu tơdroăng tơkêa bro hngêi trung phôh thong ai tíu kâ koi ối pơtê tơdjêp râ Má môi – Râ má péa  rơtế châ pơxiâm mơjiâng pro sap khế 3/2026. Kố ôh tá xê to troăng ki mơnhông tung mơ’no liăn cheăng pro hngêi trăng, troăng klông hnê hriâm, mê ối gum mơjiâng xiâm rêi mơnhông mơdêk ton xŏn ăm kơpong tơkăng kong, kơpong hdroâng kuăn ngo peăng mâ hâi Luô Quảng Ngãi.

A cheăm Bờ Y, môi hngêi trung kân rơdâ, tŭm tơmeăm khoăng cho pói vâ dêi thái cô ƀă hok tro hên hơnăm hiăng hluâ. Cô hnê chư Võ Thị Tuyên, cô Hngêi trung râ má môi ƀă râ má péa Đắk Xú, cheăm Bờ Y pói vâ tơdroăng tơkêa bro châ pêi pro tro tơdroăng pơkâ:

‘’Nôkố châ Đảng ƀă Tơnêi têa tơmâng mơjiâng ăm hngêi trung ai tiô ối koi pơtê tơdjêp râ, mơni kô ai môi hngêi trung kân lĕm rơdâ ƀă lĕm. Ing mê, kô pro tơ’lêi hlâu vâ ăm thái cô ƀă hok tro dêi hngêi trung pêi pro lĕm hnoăng cheăng hnê hriâm dêi tơná. Mâu muăn hok tro xuân kô ai roh tơ’lêi hriâm tâp a môi hngêi trung tiô rơxông nếo’’.

Nôkố kong pơlê Quảng Ngãi dế mơjiâng 9 hngêi trung ai tíu kâ koi ối pơtê tơdjêp râ a mâu cheăm tơkăng kong. Mâu tơdroăng tơkêa bro châ pêi pro tơdâng tơ’mô, ai tơdroăng ki tơrŭm krá pơla khu râ kăn pơkuâ ƀă kuăn pơlê.

A cheăm tơkăng kong Dục Nông, tơdroăng rah xo tíu mơjiâng hngêi trung châ pêi pro tơbleăng, ai tơdroăng ki veăng dêi kuăn pơlê. Kơpong tơnêi a thôn Ngọc Hiệp ƀă ƀăng deăng dâng 4,2 hectar châ rah xo pro tíu mơjiâng hngêi trung. Pôa Trần Cao Bảo Việt, Kăn hnê ngăn Vi ƀan cheăm Dục Nông, kong pơlê Quảng Ngãi, tối ăm ‘nâi, cheăm hiăng hbrâ mơjiâng troăng pêi rah xo bro lế lĕm tro, xúa lâm hriâm:

‘’Tung tơdroăng mơjiâng hngêi trung tơdjêp râ mê ngin châ môi tuăn dêi mâu kuăn pơlê, ki rơhêng vâ tối cho mâu kuăn pơlê rơtâ tá thôn Ngọc Hiệp, thôn Dục Nhầy 3, mê tơdroăng cheăng châ pêi pro troh nôkố tơniăn tơdroăng mơjiâng pro’’.

A công trương Hngêi trung phôh thong ai tíu kâ koi ối pơtê tơdjêp râ Má môi – Râ má péa Dục Nông, hrĭng kŏng nhân rơtế hên kơmăi kơmok pêi cheăng đi đo. Thươ̆ng tă Vũ Thanh Khương, (Kŏng ti xiâm 319 Khu xiâm pơkuâ lêng), Kăn pơkuâ Khu pơkuâ tơdroăng tơkêa bro mơnhên, tíu cheăng tơniăn tơdroăng mơjiâng pro kêi đeăng mơjiâng hngêi trung tung khế 7 la ngiâ:

“Mơnhên kố cho hnoăng cheăng kal kí djâ ki kơnâ lĕm má môi, ngin hiăng tơkŭm hên mơngế pêi cheăng, kế tơmeăm khoăng ƀă tơniăn tơdroăng mơjiâng pro. Riân troh nôkố, tíu cheăng hiăng pêi pro 13/13 tơmeăm khoăng ƀă a kŏng trương nôkố mê vâ chê 200 kŏng nhân xuân môi tiah 10 to kơmăi, kơmok dế châ pêi pro rơtế mơdêk pêi cheăng, mơdêk tơdroăng cheăng vâ hbrâ drêng kong prâi tơniăn lĕm má môi, mơdêk tơdroăng mơjiâng pro, tơniăn djâ kế tơmeăm tro klêi rĕng’’.

Tiô Khu pơkuâ tơdroăng tơkêa bro mơ’no liăn cheăng mơjiâng mâu tơmeăm troăng klông, tơmeăm kuăn pơlê xúa ƀă kơmăi kơmok kong pơlê Quảng Ngãi, mâu tơdroăng tơkêa bro mơjiâng hngêi trung tơdjêp râ a Dục Nông, Sa Loong, Rờ Kơi ƀă Mô Rai dế châ pêi pro tơdâng tơ’mô. Tung mê, tơdroăng tơkêa bro a cheăm Rờ Kơi châ dâng 43%, Dục Nông ƀă Sa Loong châ dâng 40%, ƀă Mô Rai châ dâng 22% kơxô̆ tơdroăng cheăng.

Rơtế ƀă 4 tơdroăng tơkêa bro dế mơjiâng pro, 5 tơdroăng tơkêa bro a mâu cheăm Bờ Y, Ia Đal, Ia Tơi, Đăk Long ƀă Đăk Plô xuân hiăng châ pơxiâm mơjiâng pro, dế kêi đeăng pro mơ-éa vâ pêi pro tơdâng tơ’mô. Jâ Y Ngọc, Phŏ Kăn hnê ngăn hnê mơhno má môi Vi ƀan kong pơlê Quảng Ngãi pơkâ mâu kơvâ cheăng, mâu cheăm bêng hbrâ mâu tơmeăm vâ mơnhông châ tơƀrê mâu hngêi trung ai tíu kâ koi ối pơtê tơdjêp râ drêng kêi đeăng:

“Troh hơnăm 2026 – 2027, mơgêi hneăng má 1, 4 hngêi trung mot pêi cheăng mê khu kăn ƀô̆ pơkuâ, thái cô thế tơniăn vâ pin tơkŭm po pêi pro hnê hriâm sap apoăng. Khu mơ’no liăn cheăng pơtối po rơdâ pêi pro, hbrâ khu kăn ƀô̆ pơkuâ ƀă thái cô ăm hneăng hơnăm 2027 – 2028 drêng 5 hngêi trung ki ê mot pêi cheăng. Á xuân pơkâ Khu pơkuâ Hnê hriâm ƀă Hnê mơjiâng tuăn ngôa rơkê kong pơlê Quảng Ngãi tơmâng pêi pro sap ing nôkố vâ pin tơniăn tơxâng pơkâ hnoăng cheăng tung la ngiâ’’.

Mâu hngêi trung ai tíu kâ koi ối pơtê tơdjêp râ dế chôa ‘lâng mơjiâng tíu tơkăng kong dêi kong pơlê Quảng Ngãi ôh tá xê to tơmeăm hnê hriâm, mê ối cho tơmeăm dêi tơdroăng loi tơngah. Kuăn pơlê kơpong tơkăng kong kong pơlê Quảng Ngãi tơkôm hâi tơmeăm kêi đeăng, vâ kuăn ‘nĕng châ hriâm tung hngêi trung ki lĕm tâ.